22°C , Mostly sunny | Kigali-Rwanda
Prof. Shyaka Anastase aganira n'abayisilamu mu muhango w'amarushanwa yo gufata mu mutwe igitabo gitagafitu cya Korowani

Prof. Shyaka yasabye Abayisilamu kugira uruhare mu kubaka amahoro mu karere

Yanditswe na Mutungirehe Samuel

Ku ya 19-06-2019 saa 09:59:39

Minisitiri w’Ubutegetsi bw’Igihugu, Prof. Shyaka Anastase, yasabye abayoboke b’idini ya Isilamu mu Rwanda kongera gushyira imbaraga mu kugaragaza uruhare rwabo mu kugera ku mahoro n’umutekano mu karere u Rwanda rurimo.

Yabibasabye ubwo basorezaga i Kigali amarushanwa mpuzamahanga ategurwa n’Umuryango w’Abayisilamu mu Rwanda (RMC), bamazemo igihe yo kurushanwa gufata mu mutwe igitabo gitagatifu bagenderaho cya Korowani igikorwa bavuga ko kibafasha kumenya icyo Imana isaba abantu bayo mu kubana n’abandi mu mahoro.

Prof. Shyaka yabanje kubizeza ko umutekano igihugu kiwufite ariko kuwugeraho no kuwusigasira na byo bisaba ubufatanye bwa buri wese n’abayisilamu barimo.

Ati “Igihugu cyacu murabizi kiratekanye, amahoro arahinda ku nkiko zose. Umutekano n’amahoro ni umusingi wubakiyeho amahitamo yacu; ni yo mpamvu rero mu byo dukora byose, byaba ari ibikorwa by’iterambere, byaba ari ibyo dukorana n’abandi ndagira ngo twese dukomeze gufatanya, uwo mutekano w’Abanyarwanda n’Abanyarwandakazi, w’abagenda iki gihugu cyacu ukomeze usagambe kandi tubigizemo uruhare. Nta gisibya tuzabishobora.”

Yabwiye abayisilamu ko mu myaka ishize, nka 15, wasangaga Umuryango w’Abayisilamu mu Rwanda ugira uruhare rukomeye mu bikorwa byo mu bihugu byo mu karere k’Ibiyaga bigari u Rwanda ruherereyemo ariko abona bisa n’aho batabigaragaramo kandi hari icyo byamaraga mu karere karimo amahoro.

Ati “Mu myaka ishize nka 10, 15, Umuryango w’Abayisilamu mu Rwanda wagiraga uruhare rushyushye, rukomeye cyane, ari mu guhuza abayisilamu bo mu karere ari no mu gufatanya n’andi madini n’amatorero mu Rwanda mu kubaka akarere karimo amahoro, karimo ubumwe, karimo ubwiyunge”.

Akomeza asobanura atya ati “Hashize igihe bisa nk’aho byasinziriye; niba ari uko idini ya Isilamu nayo yari yasinziriyemo gake, sinzi, kandi icyo gihe wabonaga ko abayobozi ba Isilamu bari babifitemo uruhare rugaragara. Nagira ngo rero mutumare inyota, turanyotewe; turagira ngo uwo munyu wa Isilamu iminjira mu yandi madini n’amatorero, nsabe bwa bushyuhe bwanyu n’umunyu wanyu wongere uzane icyo kibatsi mu madini n’amatorero aharanire gukorana no gukorera hamwe ariko anagure n’amarembo, cya kibatsi twabonaga mu Karere k’Ibiyaga Bigari mu myaka ishize cyongere cyake kandi twaragikundaga.”

Mufti w’Abayisilamu mu Rwanda, Sheikh Hitimana Salim, yahamije ko mu bufatanye n’andi madini n’amatorero binyuze mu ijwi rimwe ry’imiryango ishingiye ku myemerere mu Rwanda bazakomeza kureba.

Ati “Buriya ni inshingano zacu nk’abanyamadini, nk’abantu bavuga ijambo ry’Imana kugerageza gucengeza umuco w’amahoro n’ubworoherane n’urukundo hagati y’abantu kuko ni cyo idini risobanuye. Ubwo rero ni ukongera tukareba ni mpamvu ki bidakorwa mu buryo bwihuse niba binafite ibimenyetso bibigaragaza ku buryo abantu bishimira ko amadini afite uruhare.

Ndumva hari uruhare twagize rukomeye cyane ariko hari n’urundi tutari twashobora kugeraho, nibwira ko bizashoboka cyane ko uyu munsi dufite n’ihuriro nk’abanyamadini (RIC), zimwe muri gahunda rifite n’izo zirimo kandi mu bihe bya vuba mu bufatanye bwacu nk’Abanyarwanda twese uko dusengera mu madini atandukanye tuzabigeraho kuko dukeneye amahoro, umutekano, kuko ni wo musingi w’ibikorwa byose abantu bashaka gukora.”

Abayisilamu bo mu Rwanda basabwe kandi gutandukana n’abafata inyigisho z’idini ya Isilamu bakazumva nabi, bakazikoresha ibikorwa byabo bita iby’ubuhezanguni bashyize imbere kurwanirira idini ryabo bakarema imitwe ihungabanya umutekano, bakibuka ko iby’u Rwanda rugezeho rubikesha ko byubakiye ku mahoro n’umutekano.

Prof. Shyaka Anastase aganira n’abayisilamu mu muhango w’amarushanwa yo gufata mu mutwe igitabo gitagafitu cya Korowani

TANGA IGITEKEREZO

Leave a Reply

Your email address will not be published. Required fields are marked *