26°C , Partly sunny | Kigali-Rwanda

Prof. Shyaka yamaze ubwoba abahunikira kubimara bibwira ko bigiye gushira ku masoko

Yanditswe na Sezibera Anselme

Ku ya 26-03-2020 saa 10:02:39
Prof. Shyaka Anastase, Minisitiri w'ubutegetsi bw'igihugu (Ifoto/Ububiko)

Minisitiri w’Ubutegetsi bw’Igihugu, Prof. Shyaka Anastase, aramara impungenge Abanyarwanda bifitemo ubwoba bw’uko ibigega bw’ibiribwa mu Rwanda byaba bigiye gushira bigatuma bahahira kubimara ku isoko bajya kwihunikira ngo batazicwa n’inzara muri ibi bihe byo kwirinda ikwirakwizwa rya koromavirusi.

Ni imwe mu ngingo nyinshi zitandukanye yakomojeho ubwo yari mu kiganiro “Ubyumva ute” kuri Radiyo KT Radio. Minisitiri Prof. Shyaka yasabye Abanyarwanda gutuza kuko ikintu kitigeze gikorwaho, kitarakorwaho kandi kitayegayezwa ari urwego rw’ubihinzi. Yagize ati: “ibijyanye n’ibyo Abanyarwanda bafungura icya mbere birahari, icya 2 bireze, icya 3 n’ibijyanye no guhinga ntibyahagaze biracyakomeza”.

Ibi arabisobanura nyuma y’uko abanyarwanda n’abaturarwanda basabwe guhagarika ingendo zitari ngombwa baguma mu ngo kugira ngo birinde gukwirakwiza ubwandu bwa Koronavirusi. Ibyo bakiyongeraho amabwiriza yatanzwe yerekana ingano y’ibiribwa abantu badakwiye kurenza bahaha ku isoko, bityo bigatuma hari abibwira ko byaba bigiye kuba bikeya.

  1. Coronavirus: Imipaka y’u Rwanda yose yafunzwe, ntibyemewe kuva mu ngo, ingendo hagati y’imijyi n’uturere ntizemewe
  2. Nyamagabe: Ingamba zo guhangana na Coronavirus zizatanga umusaruro buri wese nazigira ize
  3. Kamonyi: Abacuruzi basabwe kwirinda kuzamura ibiciro bitwaje coronavirusi

Prof. Shyaka asobanura kohari ba rusahurira mu nduru, aho usanga umuntu afite ububiko (stock) abakiriya bamugana akavuga ko ntabyo afite kugira ngo abone uko azamura igiciro cy’ibyari bihari.

Icya kabiri agaragaza n’uko hari abantu bashaka kugura ibiribwa by’amezi 3 ngo bahunike mu ngo iwabo. Ati: “Iyo ibyo bintu ubikoze cyangwa abantu benshi bagakora batyo usanga ibyabaga mu mangazini bigiye mu ngo z’abantu ubukungu bukahahungabanira ndetse bigatera ikibazo ku isoko”.

Akomeza avuga ko ibyo bidashobora kwemerwa kubera ko hari n’ubwo babijyana bikaborera mu ngo, ikindi ngo hakabaho no kuzamura ibiciro kuko umuntu icyo gihe yajya ku isoko agasanga rirera akibeshya ko byashize mu gihugu ahubwo byatewe n’uko abantu batabyumvikanyeho.

Prof. Shyaka akomeza ahamiriza Abanyarwanda ko nta kibazo cy’ibiribwa gihari cyatuma umuntu ahunika toni z’ibiribwa mu ngo ngo biteganyirize. Agira ati: “Ibiribwa birahari ahubwo iyo tutaza gushyiraho umurongo abantu benshi bari kuza bakagura imyaka noneho bakabeshya isoko hibeshywa ko inzara yateye nyamara ibiribwa byajyanywe guhunikwa mu ngo z’abantu. Icyo gihe na wawundi uzanye ibiribwa yasanga nta bihari agakuba igiciro inshuro eshatu bikazonga abantu n’ubukungu bw’igihugu”.

Muri rusange ahamya ko icyakozwe ari ukuvanaho ubwoba abantu bagize babonye ikemezo cyafashwe cy’uko abantu badakwiye guhunika mu ngo bikabatera kwishora mu masoko n’umubyigano biyumvisha ko ariwo munsi wa nyuma wo kurema isoko cyangwa ibiribwa bigiye gushira.

Nk’uko Prof. Shyaka abigarukaho yibutsa ko igihugu kiri mu gihembwe cy’ihinga B/2020 kandi abahinzi bakomeza bagahinga imbuto, ifumbire bigakomeza gutangwa. Aboneraho gusaba abari mu bikorwa by’ubuhinzi kubahiriza amabwiriza yashyizweho agamije kwirinda no gukumira Koronavirusi.

Minisitiri Prof. Shyaka yizeza ko ibiribwa bihari bihagije kandi ashimangira ko uyu mwaka wa 2019 ariwo igihugu cyejejemo ibiruta kure ibyo kejeje mu mwaka wawubanjirije wa 2018, cyane cyane ku biribwa by’ibanze.

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.