25°C , Partly sunny | Kigali-Rwanda

Prince Kid: Uwatunenze ‘gucyura abana mu gicuku’ ndamwumva 100%

Yanditswe na Nshimyumukiza Janvier Popote

Ku ya 23-01-2019 saa 12:29:55
Prince Kid ukuriye sosiyete ya Rwanda Inspiration Backup itegura Miss Rwanda kuva muri 2014

Ubwo Higiro Joally yasezererwaga mu irushanwa rya Miss Rwanda, kuwa 20 Mutarama 2019, abantu batandukanye bibajije impamvu umwana w’umukobwa acyurwa mu gicuku.

Ku mbuga nkoranyambaga, cyane cyane Twitter, Facebook na Instagram, abakurikirana iri rushanwa bibajije impamvu usezerewe atakwemererwa kuryama nibura agataha bukeye.

Aha Higiro Joally yari aherekejwe atashye, mbere yo kwinjira mu modoka

Ishimwe Dieudonné uzwi nka Prince Kid uyobora sosiyete ya Rwanda Inspiration Back Up itegura Miss Rwanda, avuga ko ntawe yarenganya mu babinenze.

Kanda hano wumve ikiganiro twagiranye na Prince Kid

Twamusanze mu mwiherero w’abakobwa bagomba gutoranywamo Miss Rwanda urimo kubera i Nyamata mu Karere ka Bugesera, ku mugoroba wo kuwa 22 Mutarama 2019.

Ibijyanye no gusezerera Higiro Joally mu gicuku, avuga ko ntawe yaveba kuba yarabifashe nabi, kuko abantu babibonye kuri televiziyo bagira ngo birimo kuba ako kanya kandi byabaye kare.

Ati, “Uko babibonye si ko byagenze kubera ko babikurikiye kuri televiziyo saa yine n’igice bibwira ko ari bwo icyo gikorwa kiri kuba ariko ibikorwa byari byabaye kare.”

Avuga ko 18:30 umukobwa usezererwa yari yamaze gusezererwa, hafatwa video y’iminota 22 yaje gucishwa kuri Televiziyo y’u Rwanda mu gicuku, kuva 22h30 , abantu bagira ngo ni ‘live’.

Prince Kid avuga ko ubundi bari bumvikanye na televiziyo ko biza gucaho ‘live’ saa 19:30, ariko havuka ikibazo cya tekiniki cyatumye bidakunda, hafatwa video yaje gucishwaho nyuma.

Abantu bari basabwe gukurikira televiziyo 19:30 babwirwa ko biza gucaho imbonankubone ‘live’, babibuze barijujuta, cyane ko bitaciyeho kuri iyo saha ntihabeho no kwisegura.

Prince Kid ati, “Abantu uko babifashe, nemera ko uwabibonye kuriya adafite amakuru, kuba yavuga ko atari ibintu byiza nanjye ndabyemera kuko na we uri umuntu utekereza ukumva umwana saa 22:30 ni bwo bamwohereje mu rugo, arasanga bimeze bite, aragerayo ryari…”

“Uwabibonye kuriya njye ndamwumva 100% kubera ko nta makuru yari afite y’ibyabaye.”

Uko gahunda iteguye, nk’uko Prince Kid yabwiye Imvaho Nshya, “18h:00 ni bwo amatora afunga ni na bwo habaho gusezerera utabashije gukomeza, nka 18:20 baba barangije.”

Gusa nubwo avuga ko 18:20 usezererwa aba yamaze kwimenya agataha, umuhango wo gusezerera Umurungi Sandrine mu ijoro ryo kuri uyu wa Kabiri warangiye mu ma saa 20:20

Abanenze gusezerera umwana ninjoro, bakunze kugaruka ku mpungenge z’umutekano we mu muhanda muri iryo joro, ariko Prince Kid avuga ko ikibazo cy’umutekano cyo nta gihari.

Ati, “Haba hateguwe imodoka yo kumutwara n’abamuherekeza bakamugeza mu rugo, ndetse n’ikindi cyiyongeraho, ni ubushake bwa bamwe mu bakobwa.”

Si itegeko ko usezerewe ahita ataha kuko ngo ashobora no guhitamo kurara i Nyamata muri hoteli basanzwe bacumbikirwamo, akagenda bukeye, ariko ngo usanga bashaka kurara batashye.

Prince Kid avuga ko abakobwa ari bo bihitiyemo kujya barara batashye, cyane ko usezerewe urugendo rwe ruba rurangiye kandi benshi baba mu Mujyi wa Kigali, ahantu imodoka ikoresha iminota nka 30 uvuye i Nyamata.

Nka Josiane Mwiseneza wo muri Rubengera mu Karere ka Karongi, ngo ntibyakunda ko ataha mu ijoro kuko iwabo ari kure, ariko ababa muri Kigali ngo nta kibazo, bapfa gutaha igicuku kitaraniha.

Prince Kid avuga iyo umukobwa asezerewe, mbere yo kumuha imodoka imucyura babanza guhamagara iwabo bakababwira ko umwana wabo aje, agahabwa imodoka imugeza mu rugo.

Aherekezwa mu modoka n’umukobwa basanganwe mu mwiherero, uwo akagarukana na shoferi wagiye abatwaye, ibyo byose kandi ngo bikaba atari mu gicuku nk’uko abantu babifashe.

Nyuma ya Higiro Joally wasezerewe ari uwa mbere, hamaze gusezererwa abandi babiri ari bo, Igihozo Darine na Umurungi Sandrine. Buri munsi hasezererwa umwe.

Reba bimwe mu bitekerezo by’abantu ku mbuga nkoranyambaga bamaganira kure isezererwa rya Higiro Joally bibwira ko byabaye mu gicuku.

Iyi nkuru turacyayikurikirana

Isezererwa rya Higiro Joally ryakurikiwe n’ibitekerezo byinshi byanengaga ko batamuretse ngo arare i Nyamata atahe bukeye

Umwanditsi:

Nshimyumukiza Janvier Popote

2 Comments on “Prince Kid: Uwatunenze ‘gucyura abana mu gicuku’ ndamwumva 100%”

  1. Agahugu kadafite umuco karacika, uburere buruta ubuvuke. Prince Kid yitaye ku nyungu akura muri Miss Rwanda kurusha kwimakaza umuco Nyarwanda. Uburere bwonyine bumubwira ko agomba kugira ubumuntu. Hano yasabwaga hospitalité. Kuba atarabitekereje mbere n’uko atabupfura yabitekerezanyije. Byongeye igisobanuro cya Nyampinga ntacyo yiyumvisha, amenya ibyanditse ku muringo, ntasoma ibiri hagati y’imirongo (ubushishozi n’ubusesenguzi). Nyampinga = Umwari = Umutima w’urugo = umubyeyi w’abantu = amata y’abashyitsi = Nyina w’abantu ugomba kumurinda icyamuhungabanya cyose. Uburyo yasohorwe ateretswe urukundo nk’igisambo byonyine ni ishusho mbi ku banyarwanda (si umuco = culture). Hari byinshi bizavugwa ariko ukuri kuzahora ari ukuri kandi kuzatsinda

  2. Turasaba MIJESPOC na LARC gukurikirana no kugenzura neza MISS rwanda nk’uko Leta ikurikirana ba Rwiyemezamirimo bakaryora ibyo bakoze nabi byose. Umuco w’igihugu werekana imigenzereze n’imigenzo myiza y’abenegihugu, ni ikirango cy’igihugu bityo kugifata ukagishyira mu ntoki z’umuntu umwe wakigaragura mi isayo cyangwa akagihata imbyiro uko yishakiye, generation(ibisekuruz) nyinshi zirabababarira kuko zitamenya ukuri zigakurikira buhumyi. Umuco mwiza utakaye bizambya igihugu. Amafaranga Leta ikoresha muri Miss ihemba rwiyemezamirimo yerekane impinduka Nyazo mu muco Nyarwanda kandi n’abanyamahanga bakaboneraho ibyiza tubarusha!

Tanga Igitekerezo

Email yanyu ntigaragazwa ku rubuga. Amazina na Email ni ngombwa.