27°C , Partly sunny | Kigali-Rwanda
Mwiseneza Josiane kuri uyu wa Gatatu tariki 23 Mutarama 2019, ubwo yasobanuraga ibijyanye n'ubumenyi afite ku ikoranabuhanga

Prince Kid: Abafana ba Josiane nta gitutu na gito badushyiraho

Yanditswe na Nshimyumukiza Janvier Popote

Ku ya 23-01-2019 saa 19:42:54

Biragoye kubona umukobwa washyigikiwe n’abaturage ku rwego rwa Mwiseneza Josiane kuva amarushanwa ya Miss Rwanda yatangira kuba, ariko ngo ibyo ntibihagije ngo ahabwe ikamba.

Ishimwe Dieudonne’ uzwi nka Prince Kid uyobora sosiyete ya Rwanda Inspiration Back-Up itegura Miss Rwanda kuva muri 2014, ati, “Kuba akunzwe ni byiza ariko nta gitutu bidushyiraho.”

“Umuntu wese aba abona ikipe ye igomba gutwara shampiyona, ati ‘umusifuzi yatwibye penaliti (n’igihe atayibye), mu irushanwa ni ko bigenda.”

Imbuga nkoranyambaga ziracicikanaho ubutumwa bushyigikira uyu mukobwa wo mu Karere ka Karongi witinyutse akiyemeza guhatanira ikamba n’abakobwa biganjemo abanyamujyi.

Yakoze benshi ku mutima ubwo yasitaraga agiye kwiyamamaza i Rubavu, aho yaje no gusitara agafotorwa ino rye ririho igikomere yagize ubwo yagendaga n’amaguru ajya kwiyamamaza.

Mwiseneza Josiane yigaruriye imitima ya benshi kuva ku munsi wa mbere ubwo yajyaga kwiyamamariza i Rubavu agakora urugendo rw’amaguru kubera amikoro make

Kwitinyuka kwe kwatumye akundwa na benshi babimugaragariza binyuze mu mbuga za Whatsapp zitandukanye bashinze ngo zibahuze mu rugamba basangiye rwo kumushyikira.

Ibyamamare bitandukanye birimo abahanzi bikomeje kumuvuga imyato, ndetse bamwe bamuhimbiye indirimbo zimutaka bavuga ko ari we mwari ukwiye ikamba ry’uyu mwaka.

Bamwe bati ‘Miss w’Abanyarwanda twamaze kumubona dutegereje Miss Rwanda Inspiration Backup’, abandi bakavuga ko ikamba nirihabwa utari we batazamwemera nka Miss Rwanda.

Ishimwe Dieudonne’ ukuriye Rwanda Inspiration Backup itegura iri rushanwa, avuga ko bene ibyo bitekerezo by’abafana ba Josiane na we abibona, akabibubahira nk’amarangamutima yabo.

Kuba hari abavuga ko Josiane nataba Miss Rwanda azaba yibwe amahirwe ye, uyu musore uzwi ku kazina ka Prince Kid avuga ko ibyo nta gitutu na gito bishyira ku kanama nkemurampaka.

Avuga ko aka kanama gafite amategeko kagenderaho y’ibyo nyampinga agomba kuba yujuje, ko kadashobora guha umuntu ikamba ngo kuko akunzwe cyane mu gihe hari ibindi atujuje.

Ati, “Kuba yakundwa ni ko Anastasie yakunzwe, ni ko Honorine yakunzwe, ba Kalimpinya, urumva ikijyanye n’amarangamutima y’abantu ntabwo dushobora kukigenderaho.”

“Miss Rwanda ni irushanwa rifite amabwiriza n’amategeko rigenderaho, ntabwo harimo kuba Miss ari we urimo kuvugwa n’abantu benshi, ahubwo Miss ni ufite ubwiza, ubwenge n’umuco.”

Prince Kid avuga ko ukunzwe cyane bimuhesha kuba Miss Popularity, uberwa n’amafoto akaba Miss Photogenic, uwabanye neza na bagenzi be mu mwiherero akaba Miss Congeniality, uha agaciro umuco cyane akaba Miss Heritage… Miss Rwanda akaba ari ufite amanota menshi muri buri kimwe muri ibyo byiciro.

Avuga ariko ko ibyo bidasobanuye ko Josiane ataba Miss Rwanda mu gihe yaba yujuje n’ibindi bisabwa bitari ukugira abafana benshi gusa, cyane ko umuntu ashobora kuba Miss Rwanda na Miss Popularity icyarimwe nk’uko byagenze kuri Kundwa Doriane muri 2015.

Avuga ko yizera ubunyamwuga bw’abagize akanama nkemurampaka, bityo ko Josiane naramuka abikwiye azaba Miss Rwanda ariko ko naba atabikwiye ikamba rizambikwa urikwiye.

Ati, “Umuntu wawe ushobora kuba umushyigikiye ukabona arashoboye cyane, ariko utemera gutsindwa nta n’ubwo yatsinda. Iri ni irushanwa, abafana kuba babivuga, njye mbyumva nk’ibintu bisanzwe, nk’uko nawe ushobora kuvuga uti byanze bikunze Arsenal iraza gutwara igikombe ejo igakubitwa na Tottenham, cyangwa uti Chelsea iragitwara ejo Arsenal ikayikubita…”

Prince Kid avuga ko kuba Josiane ashyigikiwe cyane n’abafana ari byiza ndetse ko bigaragaza ko irushanwa rya Miss Rwanda rirushaho gutera imbere, agasaba Abanyarwanda kuzamushyigikira mu gushyira mu bikorwa gahunda ze naba Miss Rwanda, ariko atanatorwa na bwo bakamuba hafi.

Abafana ba Mwiseneza Josiane ni benshi ku buryo kuva gutora kuri SMS byatangira kuwa 19 Mutarama 2019 ahorana amajwi aruta cyane ay’abamukurikiye.

Umunsi wa mbere yagize SMS 35.114 zikubye inshuro zisage ebyiri uwamugwaga mu ntege Bayera Nisha Keza wari ufite 14.527; umunsi wa kabiri Josiane atorwa kuri SMS 18.394 akurikiwe nanone na Bayera Nisha Keza (10.471), ku munsi wa gatatu Josiane aza ku isonga na SMS 21.937 akurikiwe na Uwicyeza Pamela (18.930) mu gihe ku munsi wa kane yongeye kuza na SMS nyinshi (21.937) akurikiwe nanone na Uwicyeza Pamela (18.930).

Gusa we ntazi uburyo ashyigikiwe ku mbuga nkoranyambaga n’uburyo atorwamo kuko, kimwe n’abandi bahatanye, ntiyemerewe gukoresha telefone kugeza umwiherero urangiye.

Kuva kuwa 19 Mutarama 2019, hasezererwa umukobwa umwe mu mwiherero, uwabimburiye abandi akaba ari Higiro Joally akurikiwe, Igihozo Darine, Umurungi Sandrine na Tuyishimire Cyiza Vanessa wasezerewe mu ijoro ryo kuri uyu wa 23 Mutarama.

Umunsi wa nyuma w’irushanwa uzagera hasigayemo abakobwa 15, hatorwemo Miss Rwanda mu muhango uzabera i Rosororo mu Karere ka Gasabo kuwa 26 Mutarama 2019.

Kuri ubu, akanama nkemurampaka gatoranya abakobwa baguma mu irushanwa bitwaye neza mu bibazo baba babajijwe bijyanye n’ibyo bize uwo munsi, abandi batanu bagaheshwa amahirwe n’ingano y’ababatoye kuri SMS, undi umwe agatorwa n’abakobwa bagenzi be, usigaye agasezererwa.

Iyo ufite amahirwe yo gukomeza kubera SMS yitwaye neza no mu bibazo yabajijwe n’abakemurampaka, atangazwa mu bakomeje kuri SMS noneho umwanya we mu bijyanye n’ibibazo yabajijwe ukajyamo ufite amanota akurikiraho, nk’uko Prince Kid abisobanura.

Mu yandi magambo, kuba umukobwa runaka yagaragara mu batambutse kubera SMS ntibisobanuye ko aba yasubije ibibazo nabi mu bibazo yabajijwe, ahubwo atangazwa mu ba SMS kuko atatangazwa mu byiciro bibiri.

Prince Kid avuga ko iri ari ryo pfundo ry’ikibazo cyagaragaye ku munsi wa mbere ubwo Higiro Joally yasezererwaga, aho MC Nzeyimana Luckman yahamagaraga amazina y’abakomeza kubera  SMS bamwe akababura kuko ngo bari bamaze gusomwa mu bakomeje kubera ibibazo babajijwe.

Ati, “Bamuhaye liste (urutonde) rw’abatambutse, bamuha na liste y’abatambutse kubera SMS, noneho hakaba hari uwatsinze muri challenge (ibibazo yabajijwe) yatambutse no muri SMS haba ikosa ryo kumuhamagara muri ibyo byiciro byombi, ni bwo rero abakemurampaka bahise bamubwira bati ‘dore abakomeje ni aba ngaba’.”

Kuba Luckman yaragezemo hagati akabura ayo acira n’ayo amira akiyambaza abakemurampaka, hari ababifashe nka ‘kata’ (uburiganya), ibintu Prince Kid avuga ko atari ko bikwiye gufatwa.

Prince Kid ukuriye sosiyete ya Rwanda Inspiration Backup itegura Miss Rwanda kuva muri 2014

Umva ikiganiro twagiranye na Prince Kid atubwira ku by’abafana ba Josiane. yatangiye atubwira uko bigenda iyo umukobwa yatsinze ‘challenge’ akanatorwa n’abantu benshi kuri SMS.

Inkuru yabanje: Prince Kid: Uwatunenze ‘gucyura abana mu gicuku’ ndamwumva 100%

TANGA IGITEKEREZO

9 Comments on “Prince Kid: Abafana ba Josiane nta gitutu na gito badushyiraho”

  1. Uko biri kose iyi niyo miss Rwanda duhanze amaso kukureba ukuri mwitorwa ryaba miss,dukeneye uso abanyagihugu bifuza,nkuko twitoreye uwo abanyagihugu bashaka,mucyo tumutore imishinga ye yatugeza kuri byinshi ejo hazaza( Ethiopia hava abakobwa beza ariko uwatowe twibaza icyo bagendeyeho nimureke amarangamutima mukoreshe ukuri)

  2. Niba Prince Kid yarize logique ni byiza ko umuntu ahita habiri hombi bigatangazwa, hanyuma abo bakemurampaka baba bafite umwanya uhagije bagashyiramo amazina y’abahabwa amahirwe. Dukeneye Professionalisme mu bakemurampaka, batwereke ubuhanga nyine kuko ariko kibabesheje hariya.
    Ibyo Kid yavuye ”
    Iyo ufite amahirwe yo gukomeza kubera SMS yitwaye neza no mu bibazo yabajijwe n’abakemurampaka, atangazwa mu bakomeje kuri SMS noneho umwanya we mu bijyanye n’ibibazo yabajijwe ukajyamo ufite amanota akurikiraho, nk’uko Prince Kid abisobanura.

    Mu yandi magambo, kuba umukobwa runaka yagaragara mu batambutse kubera SMS ntibisobanuye ko aba yasubije ibibazo nabi mu bibazo yabajijwe, ahubwo atangazwa mu ba SMS kuko atatangazwa mu byiciro bibiri.”
    Ni naho tuzahera tumenya ubuhanga bw’umuntu maze kata zivugwa zikavaho.
    Niba ” Universaire (ibihuriweho na benshi)” ari ukuri icyo uzafatamo cyose kizaba ukuri.
    (Tuzakomeza gusobanura ……)

  3. Hari ibyo wasobanura ugata benshi murujijo. Miss Rwanda niba ari iyabanyarwanda kuki wabigereranya nk’igitutu?! Aha ndumva harimo urwikekwe mukuri nyako! Nk’urugero, Abanyarwanda bajya kwihitiramo ubayobora uko mubizi hari igitutu bashyizweho? Ariko amahitamo yabo meza nawe byakwereka aho bigejeje igihugu kdi Iterambere riragaragarira bose. None rero ba Judges, niba koko Miss Rwanda mushaka ko ikomeza kubaka no gusigasira umuco w’Abanyarwanda, igakundwa kdi igahindura ya myumvire iri mubitekerezo by’abatari bake ko habamo gutekinika, ndetse ikaba yanarushaho gukundwa kurushaho aho kumva ko habamo akarengane. Ibyamamare, abasesenguzi n’abanyabwenge mwitonde batazabacishamo ijisho kuko nabo mpamya ntashidikanya ko bajya kuvuga ikintu bagitekereje. Guhitamo, gushaka kw’abanyarwanda bihabwe agaciro. Murakoze

  4. Ubwo se iyo umukobwa atasubije neza ibibazo yabajijwe n’abakemurampaka ariko yatowe cyane kuri SMS bigenda gute ? arakomeza cyangwa arasezererwa?

  5. Nyabuneka muduhe Miss dushaka nibwo irushanwa rizarushaho kugirirwa icyizere. Ngira ngo umusaruro wo kubaha icyo abanyarwanda bifuza mwarawubonye, rero ntimuzadutetereze kuko Josiane turabizi kandi byaragaragaye ko byose abyujuje. Ahubwo rero mujye mutangaza n’amanota yagize mu bibazo(Challenges) bahabwa kuko ntidushidikanya ko aza mu ba mbere kubera ubwenge bwinshi afite, ejo mutazavuga ngo ntiyatsindaga mu bibazo. Ibintu bigomba kuba byiza kurusha mbere rwose. Murebere n’ahandi si mu Rwanda gusa bahinduye umuvuno.

  6. KID NI KID nyine umuti barawukoze ntakundi gusa josiane yari uwa banyarwanda niba iyo ari miss Rwanda tuzabibona kuko nabatora Josiane ni abanyarwanda naho niba ari Miss Kid or MIss cogebank nabwo ubwo muzaduha uwo mushaka gusa wibuke duhindura itegeko nshinga ntago ari igitutu twashyize kuba depite ni ugushaka kwabanyarwanda so Kid rero ntube Kid wamugani ndore warakuze kora kigabo niba waranariye ak***** wihangane ntuzadutengehe ngo uduhe miss wigicupuri uzaduhe uwo twatoye josiane ntahandi muzi gusa nakunze uko yitinyutse agafata umwanzuro.

  7. Ubundi Miss Rwanda yakagombye kuba iy’Abanyarwanda koko.

    Vox populi vox dei. Icyo abaturage bashaka n’Imana iba igishimye.
    Natambara ikamba abana b’Abanyarwanda bazaba bimwe amahirwe. Afite ubwenge Josiane nk’uko bigaragazwa n’umushinga we.

    Nta Miss wigeze akundwa nkawe bitubeshya kuko byose byabaga duhari. Ubwo barashaka gukora bimwe byabo byo gutora uwo bishakiye ku nyungu zabo bwite? Ntabwo bazi icyo ijambo n’uguhitamo kw’Abanyarwanda bisobanuye mu gihugu cyacu se? Hhhhh.

    Ibi bintu leta yakagombye kubizamo. Ndabona sinzi.

    Vox populi vox dei= The voice of people is the voice of God.

    Nibareke guhinyuza Imana, nibareke guhinyuza Abanyarwanda

  8. Ubundi Miss Rwanda yakagombye kuba iy’Abanyarwanda koko.

    Vox populi vox dei. Icyo abaturage bashaka n’Imana iba igishimye.
    Natambara ikamba abana b’Abanyarwanda bazaba bimwe amahirwe. Afite ubwenge Josiane nk’uko bigaragazwa n’umushinga we.

    Nta Miss wigeze akundwa nkawe bitubeshya kuko byose byabaga duhari. Ubwo barashaka gukora bimwe byabo byo gutora uwo bishakiye ku nyungu zabo bwite? Ntabwo bazi icyo ijambo n’uguhitamo kw’Abanyarwanda bisobanuye mu gihugu cyacu se? Hhhhh.

    Ibi bintu leta yakagombye kubizamo. Ndabona sinzi.
    Vox populi vox dei: The voice of people is the voice of God.

    Nibareke guhinyuza Imana, nibareke guhinyuza Abanyarwanda

  9. Ibyo gukosora mu mitegurire y’iri rushanwa ni byinshi ariko ndagira ngo nisabire abafana ba Josiane akantu. Kumushyigikira si bibi ariko please mugabanye gutuka abatamushyigikiye kuko kumushyigikira si itegeko. Umuntu aramuvugaho gato mukamwanjama, yanavuga ku wo ashyigikiye mukamutuka, murumva abantu bose bazaba abafana ba Josiane? Niba mumwemera mumwemere ariko mwumve ko abatamwemera na bo bafite uburenganzira bwo kwemera uwo bashaka. Please mugabanye

Leave a Reply

Your email address will not be published. Required fields are marked *