18°C , Mostly cloudy | Kigali-Rwanda

Premier Bet yageneye ibiribwa imiryango itishoboye

Yanditswe na KAYITARE JEAN PAUL

Ku ya 23-12-2020 saa 09:22:37

Isosiyete ikora ibikorwa byo gutega muri Siporo mu Rwanda (Premier Bet), kuri uyu wa Kabiri tariki ya 22 Ukuboza 2020 yageneye ibyo gufungura imiryango icumi itishoboye ituye mu Kagari k’Agateko mu Murenge wa Jali mu Karere ka Gasabo mu Mujyi wa Kigali.

Premier Bet itangaza ko yakoze ibi mu rwego rwo kwifatanya n’imiryango itishoboye kugira ngo yizihize Noheli ifite ibyo kurya.

Ishimangira kandi ko yafashe ingamba zo gutanga amafunguro kugira ngo imiryango igaburirwe mu gihe cya Noheli kandi inizihize umwaka mushya wa2021.

Inkunga yahawe imiryango itishoboye, irimo umuceri, ibishyimbo, ibirayi, kawunga, amavuta, umunyu, isukari n’amasabune.

Umuvugizi wa Premier Bet Kaka Patrick, yagize ati: “Uyu wabaye umwaka utoroshye ku bantu benshi, ik’ingenzi ni uko tugira abatishoboye dufasha mu miryango yacu bityo tugashimishwa no kuyiha ayo mafunguro muri iki gihe cya Noheli”.

Abagenewe amafunguro mu bihe by’iminsi mikuru bashimiye Premier Bet

Inkunga yatanzwe ku bufatanye n’ubuyobozi bw’Umurenge wa Jali, imiryango yahawe inkunga igera ku icumi.

Mukakabera Liberée utuye mu Kagari k’Agateko, umwe mu bagenewe inkunga na Premier Bet, yishimiye ibyo yahawe kandi avuga ko adashobora kugira icyo agurisha kuko ngo Imana yabimuhanira.

Ati: “Ndishimye kubera ibyo bampaye ngiye kurya Noheli neza.”

Niyoyigenera Matilde utuye mu mudugudu wa Rwankuba mu kagari k’Agateko, na we yishimiye impano zirimo ibiribwa bimara igihe kinini yahawe na Premier Bet.

Yagize ati: “Ibyo baduhaye twabyakiriye neza, Imana izajye iha umugisha abantu babiteguye. Muri iki gihe k’iminsi mikuru by’umwihariko kuri Noheli, ibyo mpawe bizamfasha kuyirya neza no kurangiza umwaka neza nishimye”.

Kaka Patrick uhagarariye Premier Project, avuga ko batanze inkunga ku miryango itishoboye irimo Akawunga, isukari, ibirayi, ibishyimbo, amavuta n’imiti y’isabune.

Avuga ko akenshi mu mpera z’umwaka Premier Bet ikora ibikorwa bitandukanye birimo gufasha abantu. Ati: “Mu mpera z’umwaka tugenda dukora ibikorwa byinshi bitandukanye”.

Ubuyobozi bwa Premier Bet bushima ko mu myaka ishize u Rwanda rwateye intambwe nini mu kugabanya ubukene no kwihaza mu biribwa.

Premier Bet ivuga ko izakomeza gufasha imiryango itishoboye mu Rwanda muri 2021.

Umwanditsi:

KAYITARE JEAN PAUL

Tanga Igitekerezo

Email yanyu ntigaragazwa ku rubuga. Amazina na Email ni ngombwa.