19°C , Partly cloudy | Kigali-Rwanda

Poritiki nziza ya Leta yatumye yiyemeza kumenyekanisha u Rwanda

Yanditswe na Gisubizo Gentil M.

Ku ya 07-11-2019 saa 08:22:55
Afite ikizere ko bizakundwa n'urubyiruko

Agendeye kuri Poritiki ya Leta y’u Rwanda ishishikariza urubyiruko kwihangira imirimo, yiyemeje kwihangira umurimo atekereza umushinga ujyanye no kumenyekanisha u Rwanda biciye mu bukerarugendo.

Mu kiganiro Imvaho Nshya yagiranye na Dushime  Daniel wihangiye umurimo ubwo yari avuye mu gikorwa yajyanyemo urubyiruko rugera kuri 30 rugizwe n’abasore n’inkumi, yayitangarije ko imbaraga zo kwihangira imirimo yazikomoye kuri gahunda nziza ya Leta y’u Rwanda ihamagarira urubyiruko gukura amaboko mu mifuka rugakora ndetse rukihangira imirimo.

Agira ati “Nyuma yo kwiga kaminuza mu bijyanye n’ubukerarugendo ndetse nkurikirana amahugurwa anyuranye ajyanye no kwihangira imirimo, natekereje uburyo nagira uruhare mu kumenyekanisha u Rwanda binyuze mu bukerarugendo. Natekereje uko byakorwa nsanga ibyiza ari ugukoresha uburyo bwo gutwara abantu ahantu nyaburanga Igihugu gifite.

Ikindi nahise ntekereza ni aho nzakura ibinyabiziga byo gutwara abo bantu, kuko nta bushobozi bwo kugura imodoka mfite niyemeza gutangira nkodesha imodoka ubwo inzozi nari mfite ziba zibaye impamo nshinga kampani yitwa ‘Alves Tours & Travel’ mbereye umuyobozi mukuru.”

Dushime Daniel ‘Alvez’ wahanze igitekerezo cyo kumenyekanisha u Rwanda ahereye ku rubyiruko

Akomeza avuga ko intego afite ari ukubyaza umusaruro ibyo yize agateza imbere ubukerarugendo bw’imbere mu gihugu abukundisha Abanyarwanda ndetse n’abanyamahanga, kandi akazagira igihe yigurira imodoka ze kugira ngo ibyo akora bimuhe inyungu igaragara kandi arusheho guha urubyiruko akazi.

Dushime avuga ko igikorwa cya mbere yakoze cyo kujyana urubyiruko muri Pariki ya Nyungwe cyagenze neza ndetse urubyiruko rurishima cyane maze bimutera imbaraga zo gukomeza bizinesi yiyemeje.

Agira inama urubyiruko n’abandi muri rusange zo gutinyuka kuko bashoboye, akabishingira ku mahirwe ubuyobozi bwahaye Abanyarwanda, agira ati “Tugira amahirwe ko buyobozi bw’u Rwanda buyobowe na Perezida Paul Kagame bwaduhaye umutekano. Turi mu Gihugu gitekanye kandi gishyigikiye buri wese ushaka gukora akiteza imbere by’umwihariko urubyiruko rugatekerezwaho cyane kubera ko ari rwo bajyambere n’abayobozi b’ejo hazaza.”

Akomeza asaba abagize amahirwe yo kwiga kubyaza umusaruro ibyo bize ntibatege amaboko nk’abatarize kuko bitesha agaciro umwanya bafashe bajya kwiga ndetse n’ibintu byose byabatanzweho bajya mu ishuri, ati ‘Nk’urubyiruko amikoro aba akiri ingorabahizi ariko ikintu wiyemeje kandi ukiri muto ukigeraho ntakabuza. Ikibi ni ugucika intege, iyo byangiye ibumoso unyura iburyo.”

Mutabazi Elia umwe mu rubyiruko rwasuye Pariki ya Nyungwe yanyuzwe n’urugendo yakoze asanga umuntu udasura ibyiza nyaburanga by’Igihugu ke yaracikanwe.

Agira ati “Abanyarwanda ntibafite umuco wo gutembera  ariko naje kumenya ko kudatembera ngo usure ibyiza nyaburanga by’Igihugu cyawe ari igihombo gikomeye. U Rwanda rufite ahantu habumbatiye amateka akomeye amwe ndetse akagaragaza imibereho ya ba sokuruza bacu.”

Uburyo yabonye Pariki ya Nyungwe, Mutabazi agira ati “Nyungwe ni ishyamba rya kimeza iyo uhageze ubona ugeze ahantu hadasanzwe kandi ugasanga hari amafu, ririmo amoko menshi y’ibimera n’amoko anyuranye y’inyamaswa; agizwe ahanini n’inyoni n’inguge”.

Akomeza avuga ko yishimiye kugera mu ishyamba ryavumbuwemo isoko y’uruzi rwa Nili ndetse ashimishwa n’ibisobanuro ababayoboraga babahaga.

Daniel abona amahirwe u Rwanda rugenera urubyiruko rudakwiye kuyapfusha ubusa

 

Basura ahantu nyaburanga mu rwego rwo kumenya ibyiza bitatse u Rwanda

Umwanditsi:

Gisubizo Gentil M.

One Comment on “Poritiki nziza ya Leta yatumye yiyemeza kumenyekanisha u Rwanda”

  1. Nibyiza gusura ibyiza nyaburana byigihugu cyacu kuko ntidukwiye kubwirwa Ibiza biri iwacu numunyamahanga nawe ibaze umuntu wakurusha kumenya ibyutunze munzu iwawe dufite amahirwe meshi tuyabyaze umusaruro rubyiruko rw urwanda

Tanga Igitekerezo

Email yanyu ntigaragazwa ku rubuga. Amazina na Email ni ngombwa.