2017-09-25 08:12:44 clouds 27o High | Kigali Rwanda

Dukurikire:
 
 

Perezida Kagame yanenze abakabya mu gushima ibyo u Rwanda rwagezeho

Yanditswe na IMVAHO NSHYA

Kuya 2016-12-16 15:13:08

 
Share on:
 
Yasuwe:722
 
Yavuzweho:200
 
10
 
10

Ijambo Perezida wa Repubulika y’u Rwanda, Paul Kagame, yavuze asoza inama y’Umushyikirano ya 14 ryibanze ku mitangire ya serivisi, aho u Rwanda rushaka kugera, no kutirara ngo abantu bishimire ibyagezweho ntibakomeze gukora.

Umukuru w’Igihugu yabwiye abitabiriye inama y’Umushyikirano ko imitangire ya serivisi mibi ari ikosa ku wayitanze n’uwayihawe, kuko uhawe serivisi mbi aba afite inshingano yo kubivuga no kubikosora.

Yatanze urugero ku buryo cyera aho yabaga mu mahanga abantu bari baracengewe n’umuco wo guhwitura abatanga serivisi mbi, cyane cyane abashoferi.

Ati “Kera mu bihugu twabagamo hanze, abantu bari barigishijwe kuvuga ngo niba muri modoka mukabona umushoferi yiruka mufite uburenganzira bwo kumubwira ngo genda buhoro! Bakabanza bakanareba niba atanasinze basanga yanyoye iyo ntibayigemo. Nabwo yaba atasinze ariko ari kwihura bakamwegera bakamubwira bati genda buhoro yakwanga bakamuhambira.”

Perezida Kagame yasabye Abanyarwanda kutumva ko gutera imbere k’u Rwanda ari urugendo rurerure, asaba ko ibishoboka bikorwa vuba nta gutegereza maze n’ibidashoboka bikamenyekana hakiri kare.

Ati “Isomo dukura mu iterambere twagezeho nuko bishoboka. Niba bishoboka reka tubikore. Ibishoboka tugomba kubikora tukanashaka inzira itugeza ku bigoranye. Ntacyatubuza gukora ibishoboka. Tugomba guhora twumva uburemere by’ibyo dukora bishoboka ndetse n’ingaruka ziza iyo tutabikoze.”

Kagame yavuze no ku bantu bakunda gutaaka cyane ibyo u Rwanda rwagezeho bagakabya, abasaba kujya bashyira mu gaciro, bakavuga ibikwiye ibidakwiye bakabyihorera.

Yagize ati” Hari ikintu cyo kwinenga nagumye ndwana no kukihorera ariko umutima ugumya umbwira uti ‘urarwana n’iki wabivuze’ : Hari byinshi twakoze byishimirwa, ariko ntabwo nakongeraho na rimwe ngo ‘ariko murabizi turi ibitangaza murabizi ngo abantu baza no kutureba!.

“Ibyiza jya ureka abandi babivuge ariko ntukabyivugire. Iyo uvuga ngo abantu baza kukwigiraho, n’ibyo udakora neza se babikwigiraho? Kwanza nta n’ubwo tubikora ngo badushime. Ariko mujye mugarukira aho, nahoze kare hari abo nshaka kubwira nti rekera aho. Ariko nkavuga nti ni umwanya wanyu, reka ndeke bakomeze. N’ibyo mwitirira perezida buri kanya, … perezida nubwo yaba igitangaza ntacyo yageraho adafite abantu bamufasha.”

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE