2017-08-18 19:28:21 clouds 27o High | Kigali Rwanda

Dukurikire:
 
 

Nubwo Polisi yacu imaze igihe gito yagejeje u Rwanda kuri byinshi – Perezida Kagame

Yanditswe na IMVAHO NSHYA

Kuya 2017-06-16 11:30:35

 
Share on:
 
Yasuwe:448
 
Yavuzweho:200
 
10
 
10

Perezida Kagame yashimye ibikorwa bya Polisi y’u Rwanda mu myaka 17 imaze ishinzwe, ariko avuga ko iyo myaka ari mike ku buryo igikomeza kwiyubaka kugira ngo irusheho kugera ku ntego zayo.

Mu ijambo yavuze mu birori byo kwizihiza isabukuru y’imyaka 17 Polisi y’igihugu imaze ishinzwe, yashimye uburyo yashoboye gucunga neza umutekano w’abanyarwanda anashimira abayifashije kuzuza inshingano.

Yasobanuye ko Polisi yo ubwayo ntacyo yashobora kwigezaho, ati “Nagira ngo nshimire abaturage bose b’igihugu cyacu, ndetse n’inzego zindi zavuzwe harimo n’ama clubs y’abantu bagiye bishyira hamwe kugira ngo buzuzanye na polisi y’igihugu mu nshingano polisi ifite yo kubungabunga umutekano no kubahiriza amategeko no kurwanya ibyaha muri rusange. Polisi ubwayo nta byinshi ishobora kugeraho yonyine. Akazi ka polisi kagenda neza kurushaho iyo polisi ifatanyije n’abanyarwanda, n’abaturarwanda.”

Perezida wa Repubulika yifurije akazi keza abofisiye ba polisi 363 barangije amasomo, bakambikwa impeta, abashimira umurava bagaragaje mu mahugurwa ariko abasaba no kuzawugaragaza biruseho mu kazi kabo.

Yagize ati “Abofisiye bahawe impeta uyu munsi, turabifuriza akazi keza, turabashimira akazi mwakoze mu gihe cy’amahugurwa n’ubu kandi imirimo nyayo akaba ari bwo igiye gutangira, turizera ko muzakoresha ibyo mwize, ibyo mwahuguriwe muri iki gihe cyose mumaze mu mahugurwa.”

Kimwe n’abandi bapolisi bose, perezida Kagame yasabasabye kurangwa n’imyitwarire ikwiye, bakiyubaha.

Ati “ Ntabwo twagera kuri byinshi tutagendera kuri discipline tutagendera ku muco mwiza ugomba kuturanga wo kwiyubaha… kubaha mugenzi wawe, kubaha ibikorwa biduteza imbere no kubaha uburyo bwo gushyiraho umutekano.”

Umukuru w’Igihugu yagarutse ku mpinduka ziherutse gukorwa, aho urwego rw’ubutasi rwa polisi y’u Rwanda, CID, rwahujwe na Minisiteri y’Ubutabera, ashimangira ko byari bigamije kuzuza intego Leta yimirije imbere zo kubungabunga umutekano no guharanira imibereho myiza y’Abanyarwanda.

Ati “Umutekano n’ubutabera kubishyira hamwe byuzuza imibereho myiza n’umutekano abaturage mu Rwanda twifuza ko bageraho. Binajyana n’imyiyubakire. Tuzakomeza kunoza amategeko, kubaka inzego, amahugurwa no kugenzura ko imikorere igenda irushaho kuba myiza.”

Polisi y’u Rwanda yashinzwe mu mwaka wa 2000. Yagiye ishimirwa kwitwara neza mu kubungabunga amahoro ku Isi, guca ruswa, guhangana n’ibyaha byambukiranya imipaka, kurwanya ihohoterwa rikorerwa abana b’abakobwa no gufasha abaturage batishoboye.

Kwizihiza isabukuru y’imyaka 17 imaze ishinzwe byabanjirijwe n’ibikorwa bya Police Week, aho ingo 3400 n’ibigo nderabuzima 20 byagejejweho amashanyarazi.

atlantis ad

TANGA IGITEKEREZO

 
 
AMATEGEKO AGENGA IYANDIKA RY'IGITEKEREZO CYAWE