Advertisement
 
 
 
 
 
 
 
 

Politiki | Mu Rwanda

Ku bwa Depite Gatabazi Abanyarwanda baba mu mahanga bari mu byiciro bitatu   

  Yanditswe na MUKAGAHIZI ROSE
 3 weeks ago

 
 

Gatabazi Jean Marie Vianney, Umudepite mu Nteko Ishinga Amategeko y’u Rwanda asanga Abanyarwanda baba mu mahanga baba mu byiciro binyuranye ariko icyangombwa ari uko buri wese, mu rwego arimo, agomba kugira umusanzu atanga mu iterambere ry’igihugu cye.

Mu kiganiro cyanyuze kuri radiyo Rwanda ku nsanganyamatsiko yo kuba mu Rwanda Umunyarwanda yifuza, Hon. Gatabazi nk’umwe mu banyarwanda bahura n’Abanyarwanda banyuranye, yagarutse ku byiciro by’Abanyarwanda baba mu mahanga.

Yagize ati “ Abanyarwanda baba mu mahanga bari mu byiciro binyuranye. Ubusanzwe abantu baba mu mahanga bari muri ‘Diaspora’ ni abantu baba baravuye mu gihugu cyabo bakajya gutura ahandi, ariko akenshi na kenshi urebye Diaspora mu mateka byaturutse ku bantu babaga bavuye aho hantu bakajya gutura ahandi ariko bakahakurira badafite aho bahuriye n’ubutaka bwa ba sekuruza babo.

“Gusa, muri iki gihe, twavuga ko muri Diaspora Nyarwanda hari abarimo ariko hari n’abandi bacyumva ko bari mu buhungiro badafite aho bahuriye ahari no kuba bagaruka mu gihugu cyabo.”

Hon. Gatabazi asobanura ko Abanyarwanda baba mu mahanga muri rusange bari mu byiciro bitatu.

Ati “ Hari icyiciro cy’Abanyarwanda bari mu mahanga bari barahunze mbere ya 1994, hari icyiciro cy’Abanyarwanda bahunze mu 1994 mu gihe cya Jenoside na nyuma ya Jenoside yakorewe Abatutsi 1994, hari n’Abanyarwanda bagenda bahunga amakosa baba bakoze mu Rwanda, bafite ibyo bikeka, bakagenda muri iki gihe kuko ubu nta mpamvu yo guhunga u Rwanda iriho.”

JPEG - 186.4 kb
Depite Gatabazi asanga Umunyarwanda uba mu mahanga akwiye kugira uruhare mu iterambere ry’igihugu cye

Yakomeje agira ati “ Abo ngabo nibyo byiciro bitatu ariko noneho Abanyarwanda bari mu mahanga muri Diaspora na none bari mu bindi byiciro : Hari Abanyarwanda bari mu mahanga kubera ko bafite akazi, Abanyarwanda bari mu mahanga kubera ko bagiye kwiga, hari Abanyarwanda bari mu mahanga kubera ko bafiteyo imiryango yabo, hari Abanyarwanda bari mu mahanga bashakanye n’abanyamahanga ku buryo ubu babaye abanyamahanga ariko b’Abanyarwanda hari n’Abanyarwanda bari mu mahanga kubera ko hari n’imiryango bagiyemo bashobora kuba barabanje kubona n’ubwenegihugu bw’ibyo bihugu cyangwa barabonye ‘ Green card’ ku bihugu bimwe na bimwe bizitanga.”

Ibindi byiciro by’Abanyarwanda baba mu mahanga

Byongeye kandi, ngo muri abo banyarwanda baba mu mahanga hari Abanyarwanda Hon. Gatabazi avuga ko bari mu byiciro na none nka 3 “ hari Abanyarwanda bari mu byiciro by’abantu badashaka kumva ko hari ibyiza by’u Rwanda, badashaka kumva ko hari iterambere rumaze kugeraho, badashaka kumva uwabegera ngo ababwire.”

Aba nibo Depite Gatabazi yita ko baba bafite ‘nostalgie’ (urukumbuzi) ariko bakaba bumva bafite urubanza mu mitima yabo rubabuza kuba banarugarukamo dore ko u Rwanda rufungura imiryango ku bantu bose.

Ati “ Hari noneho n’abandi bari mu cyiciro cya kabiri navuga b’Abanyarwanda baba mu mahanga bumva bafite inyota, bumva bashaka kuba baza mu Rwanda ariko kubera kubana na babandi barusebya, batarwifuriza ibyiza bakumva bibakurura bibaganisha aho bari ariko bikanabakurura bibaganisha kuba baza mu Rwanda. Uwo akenshi iyo agize umugisha agahura n’umuntu umusobanurira akumva birangira atashye. Hakaba na babandi bari mu cyiciro navuga cya 3 baba mu mahanga ntacyo bishisha, ntacyo bikeka, ntacyo batinya ariko bakabona akazi barimo bakora kagenda neza, bafite imibereho.”

Uretse aba, Depite Gatabazi asobanura ko hari n’abavuye mu Rwanda bava mu miryango ikennye ariko mu mahanga bakahabonera akazi. Aba ngo nibo bibaza aho bazahera nibasubira iwabo.

Yagize ati “ Aba icyo tubasobanurira nkatwe tuganira nabo ntabwo tubahatira gutaha ngo bareke bizinesi. Tubabwira ko u Rwanda rufite amahirwe rubaha nk’abana barwo ariko na none ko u Rwanda bashobora kurubamo mu buryo bunyuranye, bashobora kuba bari mu mahanga bakagira imishinga mu gihugu cyabo, ibyo bakora mu miryango yabo, bashobora kuza kuruhukira mu Rwanda.”

Ku Banyarwanda baba mu mahanga ariko baba mu cyiciro gisa nkaho kirimo abantu barakaye, bazinze umunya benshi usanga hari ubwo bagaruka bagatemberera mu bihugu byo mu karere, bakagarukira hafi y’imipaka y’u Rwanda kandi bakabona atari ahantu heza haruta iwabo mu Rwanda.

Ngo hari ubwo bahatwa ibibazo n’abana babo bageze mu myaka 25 na 30 bababaza impamvu batajya iwabo mu Rwanda, mu gihe babona amakuru meza atandukanye kuri internet ndetse rimwe na rimwe abana babo ari abahamya kuko hari ubwo baza mu Rwanda gukora ubushakashatsi cyangwa kwimenyereza akazi.

Hon Gatabazi ati “ Aya ni amakimbirane usanga mu miryango hagati y’urubyiruko n’ababyeyi babo aho baba bashaka ko ababyeyi babo baza mu Rwanda.”

U Rwanda rufunguye imiryango ku mwana warwo washaka gutaha

JPEG - 103.9 kb
Hari Abanyarwanda baba mu mahanga kuko baboshywe n’abafite ingengabitekerezo mbi

Hon. Gatabazi asobanura ko uko Umunyarwanda yaba atekereza kose aba ari Umunyarwanda. Gusa, nanone uko byamera kose ngo uwahemutse azaza yisobanure, ufite icyo yakora yaza akagikora mu Rwanda, ufite n’icyo yakora mu mahanga yakomeza akagikora ariko azirikana ko igihugu cye ari u Rwanda kuko nta mpamvu yo kwitwa ko badafite iwabo.

Yunzemo ati “ Nta mpamvu yo kwitwa ko udafite igihugu kuko burya igihugu ni ikintu gikomeye. Kuba ufite aho ukomoka, aho uturuka ni ibintu bikomeye cyane ku buryo n’ababirwanya hari ikindi kiba kibyihishe inyuma ‘nostalgie’ ariko ubusanzwe igihugu gifite agaciro n’uburemere cyane cyane noneho igihugu kitwa u Rwanda kiyobowe neza, gitera imbere.”

Kugeza ubu, ngo hari abo bagenda baganira bavuga ko aho u Rwanda rugeze batahumva. Hon. Gatabazi, asobanura ko impamvu batabyumva ari uko batemeraga ko byashoboka ariko uyu munsi bikaba byarashobotse.

Yagize ati “Ariko hari nibyo badakwiye kwirengagiza : abantu bakora ubushakashatsi bari mu bihugu bikomeye bitandukanye byo ku mugabane wa Amerika, n’u Burayi bagashyira u Rwanda ku mwanya wa mbere.

“Ese ni bo badashaka kujya kuri uwo mwanya? U Rwanda ni urwa mbere mu isuku, umujyi mwiza, ese nibo badashaka kujya kuri uwo mwanya? Bavuga ngo mu Rwanda hari iterambere ryihuta. Nibo badashaka kujya kuri uwo mwanya? Ibindi bihugu nabyo biba bishaka kujya kuri uwo mwanya ndetse n’abakoze ubushakashatsi nabo bafite ibihugu byabo bakomokamo, baba bashaka kujya kuri uwo mwanya.

JPEG - 129.9 kb
Abanyarwanda baba mu mahanga basshimishwa n’iterambere ry’igihugu cyabo

“Kuki badushyira kuri uwo mwanya wa mbere kandi nabo bawushaka ni uko haba hari ibikorwa bifatika ubwabyo bishimishije, bigaragara, udashobora kuba wanahakana. Niyo mpamvu ari uruhare rwa buri munyarwanda wese kugira umusanzu atanga ku gihugu ke. Twifuza ko bahashora imari, twifuza ko bahatemberera, twifuza ko baharuhukira, twifuza ko abana babo bamenya ko bafite igihugu cyabo cya basekuruza babo, igihugu Imana yabahaye.”

“”Ese ubufatanye bwo kugera ku Rwanda Umunyarwanda yifuza busaba kubanza kugira imyumvire imwe kuri bose”

Kuri iki kibazo, Umwarimu muri kaminuza yigenga ya Kigali, ULK, akaba n’umusesenguzi mu bya politiki, Dr. Karambizi Venuste, asobanura ko atari ngombwa gutegereza ko Abanyarwanda bose barenze miliyoni 12 habariwemo n’ababa mu mahanga babanza kujya inama bakemeranywa kugira ngo babone kubaka igihugu.

Kuri we, icyangombwa ni uko abumvise bakora, bagahindura abandi bakoresheje ibikorwa.

Yagize ati “ Hari umugani w’Ikinyarwanda uvuga ngo uburo bwinshi ntibugira umusururu. Naha ngaha tugeze nk’u Rwanda, iyo dusubiye mu mateka dusanga hari ikipe yatangiye, u Rwanda ruyobowe na RPF / Inkotanyi, tuzi ko yashyizweho n’itsinda ry’abantu bake ndetse bato mu myaka ariko bakagenda ibitekerezo byabo bijya mu bandi kugeza ubu ngubu aho twavuga ko Abanyarwanda bari mu gihugu imbere bose muri rusange bafatanyije.

“Abo hanze hari itsinda ryitabira ibikorwa by’ibitekererezwa mu gihugu bityo rero abumvise bagomba gukora, abandi bakabareberaho kuko mu busanzwe abantu ntibumvira rimwe. Gusa, buri wese agomba kugira umusanzu atanga ku rwego mu iterambere ry’igihugu cyamubyaye.”

 

Comments

pre-moderation

Igitekerezo cyanyu kiragaragara kimaze gusumwa n'umwanditsi mukuru wa Imvaho Nshya

Izina Ryanyu
IGITEKEREZO

 
 
Perezida Kagame arakira indahiro z’abagize guverinoma nshya
Perezida Kagame arakira indahiro z’abagize guverinoma nshya

Perezida wa Repubulika y’u Rwanda, Paul Kagame arakira indahiro z’abaminisitiri n’abandi bayobozi bagize guverinoma yavuguruwe ku wa kabiri ku ya 4 Ukwakira 2016. Iyo guverinoma iyobowe na (...)

Trump na Hillary mu kiganiro mpaka cya kabiri ni inde uzatsinda?
Trump na Hillary mu kiganiro mpaka cya kabiri ni inde uzatsinda?

Abakandida bahatanira kuyobora Leta Zunze Ubumwe za Amerika, Donald Trump na Hillary Clinton baraye bagize ikiganiro mpaka. Mu kiganiro cya Mbere Trump yatsinze Hillary Ikiganiro mpaka cya (...)

 Kenya: Perezida Kagame yitabiriye inama ku buhinzi
Kenya: Perezida Kagame yitabiriye inama ku buhinzi

Perezida wa Repubulika, Paul Kagame, kuri uyu wa Gatatu, ari i Nairobi mu gihugu cya Kenya aho yitabiriye ihuriro ku mpinduramatwara mu birebana n’ubuhinzi butangiza ibidukikije ku mugabane wa (...)

Perezida Kagame  na Kabila  barahurira mu mujyi wa Rubavu
Perezida Kagame na Kabila barahurira mu mujyi wa Rubavu

Perezida wa Repubulika y’u Rwanda Paul Kagame, kuri uyu wa 12 Kanama 2016 yahuye n’uwa Repubulika Iharanira Demokarasi ya Congo, Joseph Kabila mu mujyi wa Rubavu. Biteganyijwe ko Perezida Kagame (...)

Amateka y’umuryango AU wateranyiriye ibihugu bisaga 50 mu Rwanda
Amateka y’umuryango AU wateranyiriye ibihugu bisaga 50 mu Rwanda

Inama ya 27 y’Umuryango w’Ubumwe bw’Ibihugu by’Afurika, AU yateraniye i Kigali mu Rwanda kuva ku ya 10 kugeza ku ya 18 Nyakanga 2016. Uyu muryango, uhuza ibihugu bya Afurika, abakuru babyo na za (...)

Advertisement

OPP. MAGERWA, EXPO GROUND, GIKONDO KIGALI, RWANDA PHONE NO : +250-784867952 / 53

© Copyright 2015: Imvaho Nshya. All rights reserved.
Powered by: RPPC.