22°C , Mostly cloudy | Kigali-Rwanda
Uvuye ibumoso ni Minisitiri Munyeshyaka Vincent, Minisitiri w'Umuco na Siporo Uwacu Julienne na Minisitiri w'Ubuzima Dr Diane Gashumba mu nama yo kureba uko havugururwa politiki y'umutungo mu by'ubwenge (Foto Samuel M)

Politiki yo kurengera umutungo mu by’ubwenge irimo kuvugururwa

Yanditswe na MUTUNGIREHE SAMUEL

Ku ya 19-01-2018 saa 07:09:30

Minisitiri w’Ubucuruzi n’Inganda, Munyeshyaka Vincent, yatangaje ko bikwiye ko havugururwa politiki yo kurengera ibihangano byaba ibyo mu nganda, iby’ubugeni n’ibyo mu bwenge mu rwego rwo kurushaho kurengera abafite ibyo bihangano no kugira ngo birusheho kugira uruhare mu iterambere ry’igihugu.

Uvuye ibumoso ni Minisitiri Munyeshyaka Vincent, Minisitiri w’Umuco na Siporo Uwacu Julienne na Minisitiri w’Ubuzima Dr Diane Gashumba mu nama yo kureba uko havugururwa politiki y’umutungo mu by’ubwenge (Foto Samuel M)

Yabitangaje ejo hashize, tariki ya 18 Mutarama 2018 ubwo inzobere zo muri Minisiteri y’Ubucuruzi n’Inganda n’izo mu muryango mpuzamahanga urengera umutungo mu by’ubwenge (WIPO) basuzumaga aho inyigo yo kunoza ingamba zo kurengera umutungo mu by’ubwenge igeze.

Munyeshyaka yavuze ko mu Rwanda hasanzwe politiki n’amategeko bigenga umutungo mu by’ubwenge guhera mu mwaka wa 2009 ariko bikwiye ko politiki n’itegeko ribigenga bivugururwa kugira ngo ibihangano birusheho kurengerwa.

Ati “Turagira ngo dusubire muri iyo politiki ndetse twitegure no gusubira mu itegeko kugira ngo koko turebe ukuntu twabasha kurengera ibihangano; hari ibihangano byaturuka mu nganda, ibyo mu bwenge, ariko hari n’ibihangano bijyanye n’ubugeni cyangwa ibindi abantu bakora nk’abahanzi.

Kubera ko ari igihugu kirimo gutera imbere, biragaragara ko abantu bahimba cyane, barimo kuzana ibitekerezo bitandukanye ariko ugasanga itegeko twari dufite na politiki twari dufite ntibirimo kubarengera cyane.”

Munyeshyaka yavuze ko ikizibandwaho mu kunoza iyo politiki ari imikoranire hagati y’inzego, aho bikunze kugaragara ko ibihangano by’abahanzi, iby’umuco n’ibyo kwiyitirira igihangano bibazwa Minisiteri y’Umuco na Siporo, ibihangano cyangwa ibicuruzwa biva mu nganda bikabazwa Minisiteri y’Ubucuruzi n’Inganda mu gihe mu mikoranire ya buri munsi ijyanye no kurengera abo bahanzi byo bijya mu Kigo k’Igihugu k’Iterambere (RDB) bigatuma rimwe na rimwe izo nzego zihurira ku nshingano imwe bikarangira nta bikozwe neza.

Ati “Dutekereza ko bishobotse twashyiraho urwego rumwe rubasha no kuvugana n’inzego mpuzamahanga ariko noneho buri Minisiteri cyangwa ibindi bigo bizishamikiyeho nabyo tukareba neza ni icyo bagomba gukora, bigakorwa mu bwuzuzanye ariko na none bikanakorwa muri wa muco wo kugira ngo duhe serivisi abahanzi bari mu gihugu cyacu n’abagenda bavumbura n’abakora ubushakashatsi ndetse n’ibivumburirwa mu nganda kugira ngo bikorwe neza.”

Prof. Nyasse Barthelemy, umwe mu nzobere zirimo gufasha Minisiteri y’Ubucuruzi n’Inganda kwiga ku ivigurura ry’iyo politiki, yavuze ko nk’uko u Rwanda ruri mu muryango wo kurengera umutungo mu by’ubwenge iyo nyigo nimara kunozwa izatuma abafite ibihangano bakorera mu mwuka mwiza bigafasha za kaminuza n’ibigo by’ubushakashatsi kugera ku bitekerezo byiza bishobora kuvamo ibintu byajya ku isoko mu bufatanye n’abikorera nta mpungenge.

TANGA IGITEKEREZO

Leave a Reply

Be the First to Comment!

avatar