Polisi y’u Rwanda yasubije Abakongomani moto zibwe mu Bufaransa

Yanditswe na Mutungirehe Samuel

Ku ya 14-08-2019 saa 17:41:41
Abakongomani batatu basinyira ko basubijwe moto zabo baguze batazi ko zibwe mu Bufaransa bashimye ko u Rwanda ruri maso mu gutahura ibyibwe mu bufatanye bwa Polisi Mpuzamahanga (Foto RIB)

Urwego rw’Igihugu rw’Ubugenzacyaha bw’u Rwanda, RIB, binyuze mu ishami rya Polisi mpuzamahanga rwasubije abagabo babatu bo muri Repubulika Iharanira Demokarasi ya Kongo moto eshatu zifite agaciro k’ibihumbi 17 by’amadorari y’Amerika, asaga miriyoni 15.5 z’Amafaranga y’u Rwanda, zibwe mu Bufaransa zifatirwa ku mupaka wa Rubavu.

Umuvugizi w’Urwego rw’Igihugu rw’Ubugenzacyaha RIB, Mbabazi Modeste, yabwiye itangazamakuru ko izo moto zo mu bwoko bwa BMW zafashwe ku bufatanye bw’ubugenzacyaha bw’u Rwanda n’ubwa Kongo Kinshasa, (NCB – Kinshasa) n’u Bufaransa, aho ba nyiri izo moto baba.

Yavuze ko binyuze mu bufatanye bwa Polisi mpuzamahanga, mu buryo bwitwa “INTERPOL’s i24/7 system” na Leta y’u Bufaransa, bukoreshwa mu kugenzura niba ibintu byibwe ari bwo bafashe izo moto zafashwe.

Ati “Abagenzacyaha ba hano (mu Rwanda) bafatanyije n’abagenzacyaha b’u Bufaransa ndetse n’ab’i Kinshasa (RDC) mu gukurikirana ibyibwe n’uburyo byasubizwa bene byo, ariko kubera ko ba nyirazo mu Bufaransa nyuma yo gukora ibisabwa byose, ibigo by’ubwishingizi bw’izi moto mu Bufaransa byishyuye ba nyiri izi moto kuko zari ziri mu bwishingizi, hanyuma ibyo bigo byagombaga gukurikirana.

Bamaze kumenya ko zafashwe ariko baza gusanga agaciro kazazitangwaho kugira ngo zisubire mu Bufaransa kazarenga agaciro zaguzwe. Basanga cyaba ari igihombo gikomeye, ahubwo bavugana n’ubugenzacyaha bw’u Rwanda ndetse n’ubugenzacyaha bwa Kinshasa kugira ngo izi moto zibe zasubizwa bene zo kuko abazibye na bo barimo bakurikiranwa mu Bufaransa.”

Umukongomani Masumbuko Gerard, umwe mu baguze izo moto batazi ko zibwe yavuze ko izo moto zitari nshya, baziguze amadorari y’Amerika asaga ibihumbi 17. Yasabye abantu kuba maso mu gihe nabo bagiye kugura ikintu n’undi muntu.

Yagize ati “Izi moto ntizari nshya, zari zarakoreshejwe. Twaziguze nk’uko imodoka zakoze, aho twaziguze amadorari y’Amerika asaga ibihumbi 17. Ndagira inama abanyumva bose kujya bagura ikintu babanje kukitondera.”

Abanyekongo bafatanywe izo moto ku mupaka i Rubavu zinjira mu Rwanda ari na bo bazisubijwe ni Masumbuko Gerard, Ntundere Ruzolo Mao na Olani Basisa Merveille.

Abakongomani batatu basinyira ko basubijwe moto zabo baguze batazi ko zibwe mu Bufaransa bashimye ko u Rwanda ruri maso mu gutahura ibyibwe mu bufatanye bwa Polisi Mpuzamahanga (Foto RIB)

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.