22°C , Mostly cloudy | Kigali-Rwanda
Umuyobozi wa Polisi mu Mujyi wa Kigali, ACP Rutagerura Bahizi Felly aganira n'abamotari ku byarushaho kugabanya impanuka mu muhanda (Foto James R)

Polisi yasobanuriye abamotari ibyarushaho kugabanya impanuka

Yanditswe na MUTUNGIREHE SAMUEL

Ku ya 14-02-2018 saa 05:52:52

Umuyobozi wa Polisi mu Mujyi wa Kigali, ACP Rutagerura Bahizi Felly yabwiye abatwara abagenzi kuri moto ko akazi bakora kazarushaho kubabyarira inyungu no kubateza imbere igihe birinze ibyabateza impanuka zo mu muhanda akenshi zituruka ku makosa bakora mu gutwara moto mu muhanda.

Umuyobozi wa Polisi mu Mujyi wa Kigali, ACP Rutagerura Bahizi Felly aganira n’abamotari ku byarushaho kugabanya impanuka mu muhanda (Foto James R)

Ni mu kiganiro Polisi yagiranye n’abamotari ejo hashize, tariki ya 13 Gashyantare 2018, barebera hamwe uko harushaho gukumira ibiteza impanuka zo mu muhanda zidasiba gutwara ubuzima bw’abantu, no kunoza imigendekere myiza mu muhanda.

ACP Rutagerura yavuze ko gahunda zashyizweho zo kugabanya umuvuduko mu modoka zatumye impanuka zigabanuka ku kigero cya 65%. Ati “Biraterwa n’impinduka ziriho, bikorwa n’abafatanyabikorwa bose harimo namwe abatwara ibinyabiziga.”

Yavuze ko nubwo bimeze gutyo hakiri ibitera impanuka zo mu muhanda ari nabyo yasabye abamotari kwirinda kuko byinshi ari bo bakibikora.

Ati “Kimwe mu bizitera ni ugutwara ikinyabiziga uvugira kuri telefoni. Icyo ni ikintu gikomeye mu bituma impanuka ziyongera, ugasanga umushoferi aravugira kuri telefoni, arasubiza ubutumwa (message) cyangwa arandikirana na mugenzi we cyangwa se ukabona yashyizemo ekuteri (ecouteurs) zo mu matwi ukibaza niba nta kibazo bimuteye.”

Ikindi yasabye abamotari kwitwararikaho ni umuvuduko bakoresha mu muhanda, aho yaberetse amwe mu mashusho agenda (video) yafashwe na kamera ziri ku mihanda hirya no hino mu Mujyi wa Kigali zigaragaza uko impanuka zagenda ziba biturutse ku muvuduko mwinshi abatwaye moto bagenderagaho bikiyongeraho no kurangara ntibarebe ibindi binyabiziga bigiye gutambuka.

Bamwe mu bamotari bari bitabiriye icyo kiganiro, batangaje ko bajya babona bagenzi babo batitwara neza mu muhanda ariko ku rundi ruhande bakavuga ko biterwa na bamwe mu bashinzwe umutekano w’abamotari mu muhanda bakunze kubabuza guhagarara ahantu hatandukanye bigakurizamo kubangamira imigendekere mu muhanda bagerageza kubacika.

Uwiringiyimana Jean Baptiste yavuze ko abatitabira inama hakwiye kujyaho uburyo bajya babihanirwa kuko basiga icyaha bagenzi babo kandi bagerageza kwitwararika ku mabwiriza n’inama bagirwa za buri munsi.

Umuyobozi wa Polisi mu Mujyi wa Kigali yijeje abamotari ko bagiye kwegera abashinzwe umutekano w’abamotari mu muhanda bakabasobanurira ko inshingano zo gucunga ko umumotari yahagaze nabi ahantu runaka ari iza polisi gusa.

TANGA IGITEKEREZO

Leave a Reply

Be the First to Comment!

avatar