20°C , Partly cloudy | Kigali-Rwanda
S SP Ndushabandi Jean Marie Vianney, aganiriza abamotari ba Kicukiro uko bakwiye kwirinda impanuka

Polisi yasabye abamotari kureka kwikururira impanuka

Yanditswe na Mutungirehe Samuel

Ku ya 19-04-2019 saa 07:41:15

Umuvugizi wa Polisi y’u Rwanda ishami rishinzwe umutekano wo mu muhanda (Traffic Police), ryasabye kureka kwikururira impanuka zituma batakaza ubuzima.

Umuvugizi wa Traffic, SSP Ndushabandi Jean Marie Vianney, yabivugiye mu kiganiro Polisi yagiranye n’abamotari 500 bakorera mu karere ka Kicukiro, ku nsanganyamatsiko igira iti “Umutekano mu muhanda, umusanzu wo kubaka igihugu”.

SSP Ndushabandi yabakanguriye kwirinda kwica amategeko y’umuhanda n’uburangare buranga bamwe muri bo. Yabasabye kandi kwirinda bamwe mu bagenzi babahatira kwihuta.

Ati: “Bamotari, mutware moto mugamije kubaho, mutagamije gupfa. Ubuzima bwawe n’ubw’uwo utwaye ni ubw’agaciro ku gihugu”.

Polisi yongeye kwibutsa abamotari kwirinda kuba ikiraro cy’abatwara ibiyobyabwenge kuko byagaragaye ko abacuruza ibiyobyabwenge benshi, abajura n’abandi banyabyaha nk’abo bifashisha abamotari bakabagusha mu byaha. Yabasabye kandi gutanga amakuru ku gihe mu gihe bagiye gutwara umuntu bakekaho ibyo byaha kugira ngo bataba abafatanyacyaha.

Yabibukije kandi ko mu buryo bwiza bwo kugendera mu muhanda, umuyobozi w’ikinyabiziga asiga umwanya uhagije imbere ye n’ibindi binyabiziga. Akibuka kandi guha umwanya abanyamaguru bambukiranya umuhanda, akubahiriza ibimenyetso by’amatara yo ku muhanda n’ibindi bimenyetso byo mu muhanda.

Dr. Theophile Niyigena wo muri kigo ‘Healthy People Rwanda’ yabasabye abamotari kwirinda impanuka mbere ya byose, ariko anabahugura ku butabazi bw’ibanze bashobora guha uwakoze impanuka. Ababwira ko mbere yo kugira ubundi butabazi bakora bazajya babanza kwishyira mu mutekano.

Bamwe mu bamotari bakunze kugaragaza ko zimwe mu mpamvu zituma hari abisanga mu mpanuka zirimo umuvuduko mwinshi no gushaka gukora amasaha y’umunsi wose nta kuruhuka mu buryo bwo gushaka amafaranga menshi.

S SP Ndushabandi Jean Marie Vianney, aganiriza abamotari ba Kicukiro uko bakwiye kwirinda impanuka

TANGA IGITEKEREZO

Leave a Reply

Your email address will not be published. Required fields are marked *