18°C , Partly cloudy | Kigali-Rwanda
Mukabalisa Donatille, Umuyobozi w'ishyaka PL, ubwo yerekwaga aho gutorera (Foto Mutungirehe S.)

 PL: Dufite ikizere cyo kubona amajwi menshi-Mukabalisa

Yanditswe na UWAYISABA FRANCINE

Ku ya 04-09-2018 saa 07:43:25

Ejo hashize ku itariki ya 03 Nzeri 2018 ni bwo hirya no hino mu gihugu Abanyarwanda bitabiriye igikorwa cy’amatora y’Abadepite bazabahagararira mu Nteko Ishinga Amategeko. Umuyobozi w’Ishyaka PL, Mukabalisa Donatille, yavuze ko bafite ikizere cyo kubona amajwi menshi.

Mukabalisa Donatille, Umuyobozi w’ishyaka PL, ubwo yerekwaga aho gutorera (Foto Mutungirehe S.)

Mukabalisa Donatille, umuyobozi w’ishyaka riharanira kwishyira ukizana kwa buri muntu PL, watoreye mu cyumba k’itora cyo ku mashuri ya SOS Kinyinya mu karere ka Gasabo, yavuze ko bafite ikizere cyo kubona amajwi menshi kuko igikorwa kiri mu bwisanzure bwa buri muntu.

Ati “Dufite ikizere ko tubona amajwi menshi kuko ndabona igikorwa cy’amatora kimeze neza. Iyi  ikaba ari intambwe ishimishije tugezeho ya  Demokarasi  Abanyarwanda twihitiyemo, abantu barimo gutora  neza mu mudendezo, bisanzuye, umutekano uhari nta kibazo”.

Nzeyimana Cleophas, umukandida depite wa PL  watoreye mu murenge wa Kimihirura, avuga ko bafite ikizere cyo guhagararira Abanyarwanda mu nteko kandi na bo batazabatenguha. Ati “Dukurikije uko abaturage bitabiriye amatora, biraduha ikizere. Ubu dutegereje uko komisiyo y’amatora izatangaza ibyavuyemo tukabyakira uko bizaba bingana tukabibyaza umusaruro mu gufasha Abanyarwanda.”

Nzeyimana kandi avuga ko hari  ibyo abaturage bashyigikiramo  cyangwa bashyigikiyemo PL bitanga ikizere. Ati “Icyo kizere tuzagikoresha mu kubakorera ibibafitiye akamaro tubatorera amategeko ababereye, tukabafasha mu buryo bwose ngo umunyarwanda arusheho gutera imbere, kandi icyo kizere ntituzagitatira, tuzahaba nk’aho ari bo bahibereye ubwabo.”

Mukangango Philomene uvuga ko agejeje mu myaka 80, avuga ko yishimiye cyane gutora uzamuhagararira mu nteko ndetse agahagararira u Rwanda muri rusange. Ati “Umukandida natoye nizeye ko ashoboye kandi ndamusaba ko ari abakuze ndetse n’abato twese yatureberera, buri wese akazamugeza ku kimukwiye.”

Munyaneza Jean Claude, umwe mu rubyiruko rwitabiriye aya matora, yavuze ko yishimiye cyane uburyo amatora agenda neza mu mutekano kandi afitiye ikizere cyuzuye abo yatoye.

Ati “Ibintu bimeze neza kuko buri muntu aza agatora mu mahoro akisubirira mu kazi ke nta kibazo.  Abo natoye rero nkaba mbafitiye ikizere 100% cyo gutsinda kandi nk’urubyiruko tubitezeho byinshi bizaduteza imbere”.

Munyaneza avuga ko yizeye cyane ko uwo yatoye azafasha urubyiruko rwose muri rusange kandi mu bikorwa bitandukanye, haba mu kuva mu bushomeri nk’ikibazo cyugarije urubyiruko ndetse n’abakiri mu biyobyabwenge akabafasha kubisohokamo.

Vuguziga Speciose, umuturage wari umaze gutora yavuze ko umukandida yatoye amwizeye kandi azamugeza kuri byinshi. Ati ”Uwo ntoye mwizeyemo ubushobozi bwo kungeza kuri byinshi kuko azamfasha kuriha amashuri y’abana, nkabona ubwisungane mu kwivuza ndetse nibinashoboka azanyubakire n’inzu ndetse nizeye ko azangirira akamaro muri byose.”

 

 

 

 

TANGA IGITEKEREZO

Leave a Reply

Your email address will not be published. Required fields are marked *