23°C , Mostly cloudy | Kigali-Rwanda
Perezida w'u Bufaransa, Emmanuel Macron

Perezida w’u Bufaransa mu bazitabira Kwibuka ku nshuro ya 25 mu Rwanda

Yanditswe na Twagira Wilson

Ku ya 14-03-2019 saa 10:47:44

Ibihugu 27 byatumiwe kwifatanya n’u Rwanda mu Kwibuka Jenoside yakorewe Abatutsi ku nshuro ya 25.

Mu batumiwe harimo Perezida w’u Bufaransa, Emmanuel Macron, n’abahagarariye za Guverinoma bo hirya no hino ku Isi biganjemo abo muri Afurika.

Byatangajwe n’Umunyamabanga wa Leta muri Minisiteri y’Ububanyi n’Amahanga Amb. Nduhungirehe Olivier, mu kiganiro kihariye yahaye ikinyamakuru Imvaho Nshya.

Ati “Kugeza ubu Abakuru b’Ibihugu twatumiye ni 27 abenshi muri bo baturuka ku mugabane w’Afurika,  abandi  ni abo mu bihugu  by’abaturanyi  urugero nka Perezida wa Kenya azaza, uwa Uganda, uwa Tanzania, uwa Repubulika Iharanira Demukarasi ya Congo,  naho abo hanze y’Afurika ni Umukuru w’Igihugu cy’u Bufaransa, Minisitiri w’Intebe w’u Bubiligi, Tonny Blair,  Bill Clinton wahoze ari Perezida wa Leta Zunze ubumwe z’Amerika, n’abandi bakuru b’Ibihugu baturuka mu miryango y’ubukungu y’Akarere mu rwego rw’Afurika.”

Ambasaderi Nduhungirehe Olivier, Umunyamabanga wa Leta muri Minisiteri y’Ububanyi n’Amahanga

Minisitiri w’Ububanyi n’Amahanga akaba n’Umuvugizi wa Leta y’u Rwanda Dr. Sezibera Richard mu kiganiro aherutse kugirana n’ibitangazamakuru mpuzamahanga n’ibyo mu Rwanda, yatangaje ko ibikorwa cyo kwibuka ku nshuro ya 25  Jenoside yakorewe Abatutsi   bizashingira ku bumwe, kandi abantu bakibuka biyubaka.

Yagize ati “Kwibuka ku nshuro ya 25 Jenoside yakorewe Abatutsi, ni igikorwa kizashingira ku bumwe, kandi Abanyarwanda bakibuka biyubaka  hagamijwe guteza imbere ubumwe n’ibindi bikorwa bituma u Rwanda ruriho, kandi abantu bagaharanira ko ruzakomeza kubaho mu buryo buhamye.”

Umunyamabanga wungirije wa Leta zunze ubumwe z’Amerika ushinzwe Afurika, Tibor Nagy, mu ruzinduko yasoje mu Rwanda ku wa Mbere, we hamwe n’intumwa ayoboye basuye urwibutso rwa Jenoside rwa Kigali ku Gisozi, asura ibice bitandukanye birugize, asobanurirwa amateka y’u Rwanda kugeza kuri Jenoside yakorewe Abatutsi mu 1994,  avuga ko abantu bakwiye gufatanya kugira ngo Jenoside ntizongere kubaho ukundi nk’uko bikubiye mu butumwa yanditse mu gitabo cy’abashyitsi.

Umunyamabanga Nshingwabikorwa wa Komisiyo y’Igihugu Ishinzwe kurwanya Jenoside, Dr. Bizimana Jean Damascene, mu kiganiro aherutse kugirana n’itangazamakuru, cyabereye ku rwibutso rwa Jenoside rwa Kigali ku Gisozi, mu rwego rwo gusobanura aho imyiteguro yo kwibuka Jenoside ku nshuro ya 25 igeze, yavuze ko mu bizibandwaho ari ukugira ngo urubyiruko rusobanukirwe neza uruhare rwabo mu kurinda ko igihugu cyakongera gusubira mu mateka mabi cyanyuzemo.

Dr. Bizimana yibukije ko ibikorwa byo kwibuka ku nshuro ya 25 Jenoside yakorewe Abatutsi bizashingira kuri zimwe mu ngingo z’ingenzi zirimo kwibuka n’ubumwe n’ubwiyunge, ubutabera, kurwanya ihakana rya Jenoside no kubazwa inshingano n’ibindi.

Insanganyamatsiko ijyanye no kwibuka Jenoside yakorewe Abatutsi kuri iyi nshuro ya 25 iragira iti “Kwibuka Twiyubaka (Remember – Unite – Renew).

Perezida w’u Bufaransa, Emmanuel Macron

TANGA IGITEKEREZO

Leave a Reply

Your email address will not be published. Required fields are marked *