Perezida wa Rayon Sports yagaragaje gahunda y’ivugurura mu  mibereho y’iyi kipe 

Yanditswe na BUGINGO FIDELE

Ku ya Aug 8, 2019

Perezida w’ikipe ya Rayon Sports, Munyakazi Sadate mu kiganiro yagiranye n’itangazamakuru tariki 08 Kanama 2019  yagaragaje  uko ikipe ya Rayon Sports igomba kubaho  mu minsi iri imbere ndetse n’uburyo yiteguye  gutangira imikino y’Afurika y’amakipe yabaye aya mbere iwayo « Total CAF Champions League 2019-2020 ».

Iyi kipe ya Rayon Sports izakina  na Al Hilal yo muri Sudani  tariki 11 Kanama 2019 mu mukino ubanza mu mikino y’Afurika. Perezida w’iyi kipe, Munyakazi Sadate yavuze ko ikipe yiteguye neza  kandi ko ikizere cyo gutsinda gihari.

Yakomeje avuga ko  hari abakinnyi  batazakina kubera ko ibyangombwa byabo bitabonekeye igihe  aba barimo  Commodor Olokwei ukomoka muri Ghana, Omar Sidibe ukomoka muri Mali, Irakoze Saidi na Ndizeye Samuel baturutse i Burundi.

Munyakazi akaba yaravuze ko ikipe ya Rayon Sports niramuka ikomeje aba bakinnyi bazakina mu kindi kiciro. Yavuze ko kandi ikipe ya Al Hilal yageze mu Rwanda  bagira ibyo batishimira ariko ubu byakemutse byose.

Ishusho y’imibereho ya Rayon Sports mu minsi iri imbere

Perezida w’ikipe ya Rayon Sports, Munyakazi Sadate yagaragaje ko bashyizeho gahunda y’imikorere ihamye itari isanzwe mu ikipe ya Rayon Sports.

Yagize ati « Buri cyose kizajya gikorwa kigomba kugira aho gikorerwa, iyi gahunda irimo uko tugomba kubaho, gukora, gufata  ibyemezo,  guha akazi abakozi, kureba ibyo bakoze, uko batanga raporo , uko amafaranga asohoka kuko  mbere yo gusohora amafaranga hagomba kumenyekana ngo uwo duha amafaranga  aba afite iki, agomba kuba afite amasezerano na Rayon Sports kandi yarayabonye mu buryo bunyuze mu mucyo.»

 Munyakazi yakomeje avuga ko kubona kontaro muri Rayon Sports bizajya binyura mu ipiganwa, umuntu agahabwa isoko yaritsindiye. Ati : « Bizatuma  habaho gukorera mu mucyo kandi habeho  guhangana mu bapiganwa bityo n’igiciro kizabe kitari hejuru.»

Kuri iyi ngingo, Perezida wa Rayon Sports yavuze ko ubu bamaze gutegura amasoko agera ku 10 ko  bitarenze tariki 30 Kanama 2019 bazaba bamaze kwakira abapiganwa  ku buryo n’abazaba batsinze bazasinya amasezerano.

Rayon Sports izakoresha asaga miriyari muri 2019-2020

Munyakazi Sadate yavuze ko  bateganya kwinjiza  miriyari 1, miriyoni 540 n’ibihumbi 800 bagakoresha  miriyari 1 na miriyoni 338 n’ibihumbi 150.

Muri aya mafaranga azinjira, Munyakazi yavuze muri shampiyona ya 2019-2020 bateganya ko bazinjiza miriyoni 152 azava mu kwinjira kuri Sitade  ndetse n’ibihembo. Yavuze ko   iyi kipe igize amahirwe igakomeza mu mikino y’Afurika ikagera mu matsinda yabona miriyoni 500 hajyaho n’ayo kwinjira ku bibuga  akaba yagera kuri miriyoni 800.

Mu gikombe cy’Amahoro bateganya ko hakwinjira miriyoni 49.5, abafana biteganyijwe ko bazatanga miriyoni 77. Munyakazi akomeza agaragaza ko abafatanyabikorwa bazatanga agera kuri miriyoni 336, abakinnyi bagurishwa hanze bakaba bavamo agera kuri miriyoni 124 naho  iby’amasoko bikaba byakwinjiza miriyoni 1,2.

Mu mafaranga azakoreshwa harimo  gutunganya ibiro by’ikipe ahagenda agera kuri miriyoni 14.5, gutwara abantu (miriyoni 18),  guhemba abakozi byatwara miriyoni 154, gutegura imikino birimo gucumbikira abakinnyi no kubatwara n’ibindi byatwara agera kuri miriyon 327.

Munyakazi kandi avuga ko mu madeni bafite bifuza ko byibura umwaka warangira bishyuye miriyoni 157.

Mu bigombwa kwishyurwa nk’uko abisobanura, harimo ideni ry’ikigo k’imisoro n’amahoro (RRA) aho bifuza kuzatanga miriyoni 75, hari kandi umwenda w’imodoka uganga na miliyoni 32 naho indi myenda bakaba bifuza kwishyura byibura miriyoni 50.

Kuri ubu Perezida wa Rayon Sports avuga ko  kugura abakinnyi byabahagaze amafaranga agera kuri miriyoni 108 ariko ashobora kugera ku 120. Aha yavuze ko abakinnyi hari abahawe make ariko ko babahaye igihe bazabahera andi.

Munyakazi avuga ko  bifuza ko  hajyaho abakozi bazaba   bahembwa buri kwezi, bayobowe n’umuyobozi ushinzwe ibikorwa bya buri munsi « CEO »  kandi ko muri  ibi by’imishahara mishya bagomba kwishyura  umusoro ari nabyo byatumye  habaho  guhanwa n’ikigo k’imisoro n’amahoro  ndetse  ko bagomba ko kwishyura ubwiteganyirize bw’abakozi.

Haragutswe no ku kibazo k’imodoka y’ikipe

Perezida wa Rayon Sports, Munyakazi Sadate yavuze ko iyi modoka yafatiriwe n’Akagera Motor kubera ideni rya miriyoni 2,7  ariko ubu bari mu biganiro kandi bizeye ko  bigomba gukemuka. Yavuze ko  bagomba kwishyura miriyoni 16 kuko buri kwezi bishyuraga 4 ariko hakaba harimo ibirarane.

Yagize ati:“Ikibazo k’imodoka turimo kukiganiraho  bitarenze amasaha 24 kiraba cyakemutse.”

Hagiye kujyaho ikigega  k’ingoboka

Perezida wa Rayon Sports avuga ko  bamaze gushyiraho gahunda y’ikigega k’ingomboka bateganya ko uyu mwaka wa 2019-2020 uzarangira kigezemo miriyoni 138. Aha yavuze ko aya mafaranga azajya muri iki kigega azava mu yo ikipe izajya yinjiza aho 10% ariyo azajya ashyirwa muri iki kigega.

Yagize ati : “Bigenze neza mu myaka iri imbere ntabwo ikipe ya Rayon Sports yahungabana kuko izaba ifite amafaranga .”

 Mu bijyanye na tekinike, Perezida wa Rayon Sports  yavuze ko bahaye abatoza  inshingano zo kugaragaza uko umukinnyi yitwara  kugira ngo bajye bagenzura niba abakinnyi baguze ari beza   bakitwara neza. Yanavuze ko kandi basabye abatoza kujya bashyiraho gahunda y’icyumweru buri munsi kuva saa tatu (09h00) kugera saa kumi n’ebyiri (18h00).

Perezida w’ikipe ya Rayon Sports, Munyakazi Sadate wagaragaje isura ya Rayon Sports bifuza mu minsi iri imbere