29°C , Partly sunny | Kigali-Rwanda

Perezida Kagame yishimiye insinzi ya Arsenal

Yanditswe na Imvaho Nshya

Ku ya 30-08-2020 saa 09:23:45

Perezida wa Repubulika y’u Rwanda Paul Kagame  yagaragaje ko yishimiye insinzi y’ikipe y’Arsenal yegukanye igikombe cya FA Community Shield, ku wa Gatandatu tariki 29 Kanama 2020.

Arsenal yegukanye icyo gikombe itsinze Liverpool kuri Penaliti 5-4 nyuma y’uko umukino wari urangiye amakipe yombi anganya igitego kimwe kuri kimwe.

Insinzi ya Arsenal yashimishije abakunzi bayo mu bice bitandukanye ku Isi, Perezida akaba ari umwe mu bagaragaje imbamutima zabo bashimira iyo kipe bakunze kwita ‘The Gunners.’

Mu butumwa yanyujije ku mbuga nkoranyambaga Perezida Kagame yavuze ko yanyuzwe n’ubuyo iyo kipe ikomeje gusubira mu bihe yahozemo byo gutwara ibikombe.

Yagize ati; “Nishimiye Arsenal kuri #Community Shield. Ni ukubaka buhoro ariko bihamye dusubira ku budahangarwa. Mwishyuke.”

Igitego cya Arsenal cyabonetse ku munota wa 12 gitsinzwe n’umunya-Gabon Pierre Emerick Aubameyang ku mupira yahawe na Bukayo Saka.

Liverpool yishyuye iki gitego ku munota wa 73 ifashijwe n’umukinnyi mushya iherutse kugura ari we Minamino.

Igitego Aubameyang yatsinze cyari icya gatanu kuri Sitade ya Wembley cyatumye agera ku muhigo w’abatsindiye ibitego byinshi kuri sitade ya Wembley isanzwe iberaho umukino w’iki gikombe n’ibindi nka FA cup.

Iminota isanzwe 90 y’umukino yarangiye banganyije igitego 1 kuri 1 berekeza kuri Penariti Arsenal yegukana igikombe kuri penariti 5 kuri 4 za Liverpool .

Umukinnyi wa Liverpool wahushije penariti ni R. Brewster wayiteye ku mutambiko w’izamu, mu gihe ku ruhande rwa Arsenal abakinnyi 5 bayo bose : Reis Nelson , Soares , Aubameyang ,Maitland Niles na David Luiz bose bazinjije mu izamu ryari ririmo umuzamu Allison Becker .

Umwanditsi:

Imvaho Nshya

One Comment on “Perezida Kagame yishimiye insinzi ya Arsenal”

  1. Insinzi ya Arsenal ntamukunzi w’iyo kipe itanejeje hari hashize igihe tudafata kugikombe ibyishimo twari dufite byadusaze kandi turashimira umubyeyi wacu Nyakubahwa umuyobozi w’Igihugu cyacu nk’umukunzi w’Imena wa Arsenal yacu mubwira nti tukuri inyuma mukwishimira insinzi y’ikipe yacu ARSENAL OYEEEEE!!!

Tanga Igitekerezo

Email yanyu ntigaragazwa ku rubuga. Amazina na Email ni ngombwa.