Perezida Kagame yishimiye insinzi ya Arsenal yegukanye igikombe cya FA

Yanditswe na BUGINGO FIDELE

Ku ya 01-08-2020 saa 21:26:58
Abakinnyi b'ikipe ya Arsenal bishimira igikombe

Perezida w’u Rwanda, Paul Kagame yagaragaje ibyishimo myuma y’aho ikipe ya Arsenal    yegukanye igikombe  k’igihugu mu Bwongereza (FA  Cup)  itsinze ku mukino wa nyuma ikipe ya  Chelsea ibitego 2-1.

Uyu mukino wa nyuma wabereye kuri Sitade Wembley i London tariki 01 Kanama 2020, ikipe ya Arsenal  yitwaye neza itsinda Chelsea ibitego 2-1 byatsinzwe  na Pierre-Emerick Aubameyang ku ruhande rwa Arsenal naho igitego rukumbi cya Chelsea gitsindwa na Christian Pulisic.

Nyuma yo kwegukana igikombe, Perezida Kagame usanzwe ari umukunzi w’ikipe ya Arsenal  abinyujije ku rubuga rwa “Twitter”   yagize ati : “ Twishimiye iyi nsinzi mwari mukwiye kandi yari ikenewe. Twe nk’abakunzi tubafitiye ikizere, mukomeze mutere intambwe ijya imbere kandi muzagera ku birenze ibi. Byose birashoboka.”

Iki ni igikombe cya 14 Arsenal  yegukanye akaba ari nayo ifite iki gikombe inshuro nyinshi mu Bwongereza (1930, 1936, 1950, 1971, 1979, 1993, 1998, 2002, 2003, 2005, 2014, 2015, 2017 na 2020).

Muri iri rushanwa ry’uyu mwaka (FA Cup 2019-2020), Arsenal yageze ku mukino wa nyuma isezereye Manchester City  ku bitego 2-0 naho Chelsea isezerera ikipe ya Manchester United ku bitego 3-1.

Kwegukana iki gikombe byahesheje Arsenal kuzakina irushanwa ry’amakipe yitwaye neza iwayo ku mugabane w’u Burayi “Europa League 2020-2021” nyuma y’aho itari yabashije kubona itike kuko yasoreje ku mwanya 8 muri shampiyona y’uyu mwaka wa 2019-2020.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.