27°C , Partly sunny | Kigali-Rwanda
Perezida Paul Kagame ibumoso ashyikiriza mugenzi we wa Misiri Abdel Fattah el-Sisi inkoni y'ubuyobozi bw'Umuryango w’Afurika Yunze Ubumwe (AU)

Perezida Kagame yashyikirije ubuyobozi bwa AU Abdel Fattah wa Misiri

Yanditswe na Mutungirehe Samuel

Ku ya 11-02-2019 saa 07:41:09

Perezida Paul Kagame yashyikirije inkoni y’ubuyobozi bw’Umuryango w’Afurika Yunze Ubumwe (AU) mugenzi we wa Misiri (Egypt), Abdel Fattah el-Sisi, ugiye kuyobora uyu muryango muri manda y’umwaka umwe wa 2019.

Ni umuhango wabereye i Addis Ababa muri Ethiopia ku kicaro cya AU kuwa 10 Gashyantare 2019, mu nama rusange ya 32 y’Abakuru b’ibihugu bagize uwo muryango, ari na bwo Perezida Kagame yasozaga manda ye yatangiye muri Mutarama 2018.

Perezida Kagame yabwiye bagenzi be ko Afurika ifite abayobozi bafite indangagaciro zo hejuru zikenewe kuri serivisi yose yakenerwa kandi bari mu bice byose by’umugabane, igikenewe ni uguha umwanya izo mpano zigafasha Afurika guteza imbere ibikenewe.

Ati: “Hamwe n’inkunga yacu yuzuye ntidushidikanya ko tuzateza imbere ukwishyira hamwe kwacu mu buryo budashidikanywaho tugamije kugera kure hashoboka.”

Mu ijambo yagejeje ku bateraniye muri iyo nteko rusange, Perezida Kagame yabanje gushimira no guha ikaze abakuru b’ibihugu babiri, ari bo Andry Rajoelina Perezida wa Madagascar na Félix Tshisekedi wa Kongo (RDC) batorewe kuyobora ibihugu byabo muri uyu mwaka.

Yabashimiye kandi ikizere bamugiriye cyo kuyobora uwo muryango mu mwaka wose ushize, asobanura ko intego ihuriweho ukubaka umuryango ukomeye kandi ushoboye hagendewe kuri gahunda z’umuryango zigeza mu 2063 no kurengera inyungu z’Afurika mu ruhando rw’amahanga.

Yagaragaje ko kuri manda ye umuryango wageze kuri byinshi bishoboka, birimo intambwe yo gusinya amasezerano ashyiraho isoko rusange ry’Afurika (AfCFTA), aboneraho gusaba ibihugu bya Guinea-Bissau, Botswana na Zambia na byo gusinya.

Perezida Kagame yavuze ko umwaka ushize hongeye gutangizwa ikigega cy’amahoro, kuri ubu kigezemo miriyoni 89 z’Amadorari y’Amerika aturutse mu bihugu 50 byatanze uruhare rwabyo.

Yijeje ko hakomeje gushyirwa imbaraga mu gushyiramo uruhushya rw’inzira rumwe (Passport) ku mugabane, ikintu abaturage b’umugabane banyotewe cyane mu koroshya urujya n’uruza rw’abaturage na byo byatowe muri manda ye umwaka ushize.

Yashimiye abakuru b’ibihugu bakiriye neza ingingo yo kongerera ubushobozi gahunda zo mu rwego rw’ubuzima muri buri gihugu, nka kimwe mu byo Isi ishyize imbere mu buzima bw’abaturage.

Yasabye bagenzi be ko kugira ngo ubukungu bw’umugabane burusheho gutera imbere hakwiye gushyirwa imbaraga mu ikoranabuhanga nka moteri yo kongera umusaruro no guteza imbere urubyiruko, gushyira imbaraga mu buhahirane n’indi miryango n’uturere, abikorera kugira ngo uburenganzira n’inyungu z’Abanyafurika bibe byizewe.

Perezida Paul Kagame ibumoso ashyikiriza mugenzi we wa Misiri Abdel Fattah el-Sisi inkoni y’ubuyobozi bw’Umuryango w’Afurika Yunze Ubumwe (AU)

Perezida Paul Kagame uwa 9 uhereye ibumoso ari hamwe n’Abakuru b’ibihugu bagize AU mu nama rusange ya 32

 

 

TANGA IGITEKEREZO

Leave a Reply

Your email address will not be published. Required fields are marked *