21°C , Intermittent clouds | Kigali-Rwanda
Umukuru w'Igihugu Paul Kagame yasabye ko Kigali Arena ibyazwa umusaruro, hagakinirwamo imikino kandi hakitorezwa n'urubyiruko

Perezida Kagame yafunguye ku mugaragaro Kigali Arena

Yanditswe na BUGINGO FIDELE

Ku ya 09-08-2019 saa 22:29:29

Perezida Paul Kagame yafunguye ku mugaragaro inzu igezweho izajya iberamo imikino, ibirori n’inama “Kigali Arena” ikaba izajya yakira abantu ibihumbi 10.

Uyu muhango wabaye ejo hashize tariki 09 Kanama 2019 aho iyi nyubako iherereye hagati ya Sitade Amahoro i Remera n’igicumbi k’Intwari.

Afungura ku mugaragaro Kigali Arena, Perezida Kagame yashimiye sosiyete yitwa Summa yo muri Turukiya yubatse iyi nyubako mu gihe cy’amezi 6. Aha akaba yarashimiye cyane umuyobozi wa Summa, Selim Bora, wari witabiriye uyu muhango.

Perezida Kagame yagize ati: “Bayubatse mu buryo buhambaye mu mezi 6 gusa bakora ijoro n’amanywa, ariko ni ko abantu bakwiriye gukora ubwo natwe tuziga gukora neza kandi vuba ibintu binoze.”

N’ubwo abubatse Kigali Arena bakoresheje igihe gito, Perezida Kagame yashimangiye ko yujuje ubuzirane. Yanishimiye kandi ko mu kubaka iyi Kigali Arena Abanyarwanda bahawe akazi bageraga kuri 70% mu gihe 30% yari abafatanyije n’abanyarwanda kubera ubumenyi bafite.

Mu kubaka Kigali Arena hakoreshejwe abakozi bagera ku 1700 barimo Abanyarwanda 1200 mu gihe abandi 500 bakomoka muri Turukiya.

Perezida Kagame yashimiye Abanyarwanda

Perezida Paul Kagame yavuze ko n’ubwo ashimira abubatse Kigali Arena ariko atakwibagirwa Abanyarwanda muri rusange kuko ibi byose byavuye mu mutungo wabo.

Perezida Kagame kandi yashimiye Ujiri Masai, umuyobozi mukuru w’ikipe ya Toronto Raptors ibarizwa muri shampiyona ya Basketball ya Leta zunze ubumwe z’Amerika ‘NBA’ ari nayo yegukanye igikombe  cya shampiyona uyu mwaka.

Yagize ati: “Yazanye igitekerezo cyo kubaka uyu mukino wa Basketball, kuwuteza imbere no kuwuzamura muri Afurika afatanyije na Amadou Fall bafashijwe na  Adam Silver,  komiseri wa NBA, aba bagabo ndabashimira cyane.”

Yakomeje avuga ko aba bagabo  bafite gahunda  bise “Giants of Africa”  igamije gufasha abana gukunda no gukina Basketball bakazaba ibihangange.

Perezida Kagame yagize ati: “Afurika ifite ibihangange  kandi tugomba kwitwara nk’ibihangange. Gusa kuba igihangange bituruka mu bikorwa,  kugira ngo ube igihangange  bisaba kugira ibikorwa si uko ugaragara.”

Perezida Kagame hari icyo yasabye urubyiruko

Perezida Paul Kagame yavuze ko Kigali Arena itubatswe ngo bage baza kuyireba kuri Noheli na Bonane ahubwo yubatswe kugira ngo ibihangange by’Afurika, iby’u Rwanda muri Basketball bishobore kuhitoreza, kuhakinira ndetse no  kuhatsindira nk’uko  bisanzwe bizwi mu Rwanda

Yakomeje avuga ko abana bagaraje ko bafite hazaza heza  muri uyu mukino bakwiye kwitabwaho kugira ngo bazakure bashaka kuba ibihangange kandi babe byo. Yagize ati: “Rubyiruko rwacu muzabe ibihangange mu mikino bityo n’igihugu mukigire igihangange.”

Nyuma yo gufungura ku mugaragaro Kigali Arena habaye imikino ibiri ya “Playoffs 2019” muri Basketball aho ikipe ya APR BBC yatsinze The Hoops amanota 56 kuri 52  mu bagore naho Patriots BBC igatsinda REG BBC amanota 67 kuri 58 mu bagabo.

Kigali Arena izajya iberamo ibikorwa binyuranye birimo imikino  itandukanye nka Basketball, Volleyball, Handball n’imikino njyarugamba. Hazajya haberamo kandi ibitaramo by’abahanzi ndetse n’inama zinyuranye zihuza abantu benshi.

Umukuru w’Igihugu Paul Kagame yasabye ko Kigali Arena ibyazwa umusaruro, hagakinirwamo imikino kandi hakitorezwa n’urubyiruko

Iyi ni yo nyubako ya Kigali Arena yatashywe na Perezida Paul Kagame

Uko umuhango wo gufungura Kigali Arena wagenze mu mafoto 

Ubwo Perezida Paul Kagame yari ageze kuri Kigali Arena

Perezida Kagame na Madamu Jeannette Kagame bari kumwe na bamwe mu bashyitsi bitabiriye uyu muhango

Perezida Kagame yinjiye muri Kigali Arena asuhuza abari bitabiriye ibirori

Perezida Kagame (Hagati), umuyobozi wa Summa, Salim (ibumoso) n’umuyobozi w’ishyirahamwe ry’umukino wa Basketball mu Rwanda, Mugwiza (iburyo) mu gikorwa cyo gufungura ku mugaragaro Kigali Arena

Perezida Kagame yashimiye abagize uruhare bose mu iyubakwa rya Kigali Arena

Ikimenyetso kerekana ko Kigali Arena yafunguwe ku mugaragaro na Perezida Paul Kagame

Perezida Kagame asinya ku mupira wa Basketball

Umutoza Mutokambali Moise (ibumoso) asobanurira Perezida Kagame uburyo batoza abakiri bato gukina Basketball

Mu gufungura Kigali Arena hari abantu benshi mu ngeri zitandukanye

Aba ni abakinnyi b’ikipe ya REG BBC

Uburyo Kigali Arena igaraga yicayemo abantu

Abakinnyi ndetse n’abakunzi b’imikino bari babukereye

Nyuma yo gufungura ku mugaragaro Kigali Arena, ikipe ya APR BBC yakinnye na The Hoops umukino wa nyuma ubanza muri Playoffs 2019 mu kiciro cy’abagore

Ikipe ya REG BBC na Patriots BBC nazo zakinnye umukino wa nyuma wa Playoffs 2019 mu bagabo

Kigali Arena uko igaragara

TANGA IGITEKEREZO

Leave a Reply

Your email address will not be published. Required fields are marked *