Patrick na Klint da Drunk basekeje abantu baratembagara muri Seka Live

Yanditswe na Gisubizo Gentil M.

Ku ya 25-11-2019 saa 14:19:01
Klint da Drunk we yasekeje benshi bwa mbere akigera ku rubyiniro kubera uburyo aba agaragara nk'umusinzi kandi ari muzima

Seka Live ni igitaramo kimaze kubaka izina  mu Rwanda no hanze yarwo kubera abanyarwenya batandukanye bakomeye baba batumiwemo, kuri iyi nshuro hatumiwe abarimo Klint da Drunk wo muri Nigeria, Dr of Weneke wo muri Kenya n’abandi bo mu Rwanda.

Iki gitaramo cyabereye muri Marriott Hotel mu ijoro ryo Cyumweru tariki 24 Ugushyingo 2019, cyayobowe na Nkusi Arthur ‘Rutura’ ukuriye Arthur Nation igitegura, cyari kirimo kandi abanyarwenya batandukanye bo mu Rwanda bakizamuka barimo Patrick, Milly, Merci, Divine wamenyekanye nka Mabuja, Zaba Missed Call ndetse n’abandi.

Rutura yari ayoboye igitaramo

Neptunez Band ndetse na Nep Djs nibo basusurukije abari bitabiriye iki gitaramo cy’urwenya cyasize benshi bagoroye imbavu kubera kunyurwa n’abanyarwenya batandukanye babanyuze imbere.

Cyari igitaramo kinejeje ku buryo kuva ku munota wa mbere gitangiye kugeza ku musozo, abacyitabiriye basetse bikomeye kubera impano z’abanyarwenya zabatembagaje.

Uyu byamurenze yifata ku munwa

Buri jambo ryavaga mu kanwa k’aba banyarwenya ryabaga risekeje, rikajyana n’ibimenyetso byatumaga abantu baseka bagatembagara.

Rutura wari uyoboye iki gitaramo yanyuzagamo agasetsa abantu atera urwenya rwatumaga benshi baseka bakajya ku butaka.

Yagiraga ati, “Hari ikintu naje kumenya, ni nde wize ibintu bya provisoire aha? Reka mbabwire uziko ushobora gutsindwa ikizamini kubera ko utabizi ariko kiriya Kinyarwanda sha cyo ka… ikibazo kiba kimeze gutya; iyo umuyobozi atwaye ikinyabiziga cy’umutambiko uriho ibizenguruko bine bipima toni 12 akisanga n’undi mu masanganiro ni nde ukurikiza ibyapa bitanga inzira?”

Agakomeza akavuga ko ‘bari kubibaza mu buryo bworoshye bati iyo ikamyo y’amapine 12 ihuye n’imodoka nto ni nde ugenda mbere? Ugahita usubiza. Ariko babigira birebire….’

Hari n’aho yageze agaragaza igituma Imana itaragaruka gutwara abayo, avuga ko ari iterambere ryihuta umunsi ku wundi.

Ati “Nari ndi kubabwira impamvu Imana itaragaruka, Imana yohereza Yesu iti subirayo ariko yareba agasanga Shaddy Boo afite abamukurikira kuri Instagram kumurusha […] Ariko uribaza ageze hariya ku kibuga cy’indege i Kanombe bakamubaza bati ufite irangamuntu ati ntayo, icyangombwa cy’amavuko ati ntacyo, bati jya ku Irembo ugisabe.”

Abantu banyuzwe na Seka Live

Uyu musore yanibasiye abahanzi barimo Bushali na Meddy baherutse gufungwa mu minsi ishize umwe azira kunywa ibisindisha undi azira ibiyobyabwenge.

Ati “Ibintu bitatu Yesu agomba kumenya mbere y’uko aza; ni uko ataziyamamaza mu matora kuko abayoboke be bashobora kuzamwivugana, icya kabiri ntazakore kiriya gitangaza cyo guhindura amazi divayi kuko gahunda ya Gerayo Amahoro ntiyamubana neza!”

“Uribaza Yesu bamufashe ngo yahushemo ngo yahinduye amazi divayi? Bamufatiye hariya Kabeza bamujyanye Kicukiro yicaye hagati ya Meddy na Bushali. Umwe akaba aravuze ngo ‘Ese ni muebue?”Ibi nabyo byasekeje abantu benshi cyane.

Patrick uri mu banyarwenya bari kuzamuka neza nawe yasekeje benshi ubwo yateraga urwenya avuga ko ari bwo bwa mbere yakwambara ibintu bitari ibye.

Uyu musore yagize ati “Nibwo bwa mbere nakwambara ibintu bitari ibyanjye usibye amasogisi gusa, nihanangiriza abantu bari kumbwira ngo nambaye nk’abaseriveri ba hano kuko ikintu mbarusha bahembwa make […] abandi bantu bari kuntunga intoki ngo nambaye karuvate nyuma ya saa kumi n’ebyiri, umuntu wakunigira muri Marriott yaba ashaka iki koko?”

Dr of Weneke yateye urwenya agaragaza ukuntu abakobwa bakibyiruka usanga bashamadukira kuzunguza amabuno mu tubyiniro kugeza aho ‘usanga afite imyaka 20 ariko ikibuno cye gifite 40’ ibi nabyo byatumye benshi baseka barihirika.

Klint da Drunk yateye urwenya avuga ku muziki wo muri Nigeria avuga ukuntu Wizkid mu ndirimbo ya Beyonce yise ‘Brown Skin Girl’ yaririmbye neza neza Icyongereza cy’Abanyamerika yamwumva akabanzakwanga kwiyumvisha ko ariwe waririmbye ngo ‘Oya Totori mi one time toh, Totori mi two times toh toh!, Totori mi three times toh toh toh!, Totori mi four times toh toh toh toh!’

Bitewe n’ukuntu yabivugaga byatumye abantu bari bateraniye muri iki gitaramo cy’urwenya bose baseka byimazeyo.

Ibitaramo bya Seka Live bimaze kuba kumenyekana mu Rwanda no hanze, byanyuzemo abanyarwenya b’ibyamamare nka Eric Omondi, Anne Kansiime, Chipu Keezy, Teacher Mpamire n’abandi. Eric Omondi azagaruka gutaramira Abanyarwanda muri Seka Live kuwa 29 Ukuboza 2019 nk’uko Nkusi Arthur yabitangaje, ararikira abakunda urwenya kuzaza ku bwinshi kugorora imbavu.

Umwanditsi:

Gisubizo Gentil M.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.