17°C , Partly sunny | Kigali-Rwanda
Ingamba zafashwe zo kubungabunga ingagi zatumye zirushaho kororoka

Pariki y’Ibirunga: Ingagi zikomeje kororoka  zigeze kuri 604

Yanditswe na IYAREMYE YVES

Ku ya 04-06-2018 saa 07:42:31

Ubuyobozi bw’ihuriro ry’ibihugu bitatu bikora kuri Pariki y’Ibirunga ari byo u Rwanda, Repubulika Iharanira Demokarasi ya Kongo na Uganda, butangaza ko ibarura ryakozwe muri 2015 na 2016 rigamije kugaragaza umubare w’ingagi ziba muri iriya Pariki ryagaragaje ko ziyongereye;  zavuye ku ngagi 480 mu mwaka wa 2010 zikagera  kuri 604 mu mwaka wa 2016.

Ingamba zafashwe zo kubungabunga ingagi zatumye zirushaho kororoka

Ikigo k’Igihugu gishinzwe Iterambere (RDB) gitangaza ko ingagi zinjirije u Rwanda amafaranga asaga miliyoni 18 z’amadolari umwaka ushize.

Mu nama yabereye mu karere ka Rubavu, Mutangana Eugene  ukuriye ibikorwa byo kubungabunga Pariki z’igihugu  muri  RDB, yavuze ko kororoka kw’ingagi  byatewe n’ubufatanye bw’ibyo bihugu bugamije kubungabunga iyi pariki no kwita ku buzima bwazo ndetse no kurwanya ba rushimusi bashoboraga kuzibangamira.

Ati: “Dukomeje gushaka uko ingagi zirushaho kutwinjiriza  amafaranga menshi binyuze mu bukerarugendo, turishimira ko uburyo zigenda ziyongera kandi bizakomeza kuko turimo  kuzibungabunga nk’uko bikwiye, kuzamuka k’umubare biterwa n’uko Pariki irinzwe neza, abaturage bahatuye bakabona umusaruro bityo bakahafata neza.”

Akomeza agira ati: “Ubukerarugendo bwo gusura ingagi bwinjirije igihugu cy’u Rwanda  amadovize arenga miliyoni 18 z’amadolari mu mwaka ushize wa 2017, kandi imbaraga dukomeje gushyiramo zitwereka ko bizakomeza kwiyongera, na ho ku ruhande rwa Uganda hinjiye miliyoni 10 zirenga  z’amadolari, ni ibintu byo kwishimira.”

Sam Mwandha ukuriye ikigo gishinzwe kubungabunga pariki za Uganda (Uganda Wildlife Association) yagize  ati: “ Nubwo usanga izi ngagi zigenda mu bihugu byacu ni umutungo duhuriyeho,  turashima uburyo igihugu cy’u Rwanda gikomeza gushyiraho ingamba zitandukanye mu kwita ingagi kandi tuzakomeza ubufatanye mu kwita kuri uyu mutungo kuko utwinjiriza ifaranga ritubutse”.

Ati: “Ubufatanye bwa za Leta zihuriye kuri iyi pariki hamwe n’abafatanyabikorwa ndetse n’abashinzwe kurinda iyi pariki batumye ubuzima bw’izi ngagi buba bwiza ni yo mpamvu uyu mubare wiyongereye.”

Aba bayobozi bavuga ko bagiye gukomeza gufatira hamwe  ingamba ku bibazo bikomeje kugaragara bijyanye n’imitego ya ba rushimusi batega ingagi, kuko imibare  y’iyo mitego yazamutse iva kuri  218 mu mwaka 2010 igera 384 mu mwaka wa 2016, ibi ngo bikaba bibangamiye ubukerarugendo n’ingagi by’umwihariko.

Ikindi cyagaragajwe nk’imbogamizi ni umutekano muke uterwa n’abitwaje intwaro ku ruhande rwa RDC bica abashinzwe gucunga iyi Pariki y’Ibirunga bagamije gushimuta ingagi.

Joel Wenga Mulayi umuyobozi ushinzwe itumanaho muri Pariki ya Virunga muri Repubulika iharanira Demokarasi ya Congo avuga ko ari ikibazo kibahangayikishije.

Ati: “Dufite ikibazo cy’umutekano muke, muri uyu mwaka twatakaje abarinzi ba pariki 8 bishwe, uyu mutekano muke utuma  ibikorwa by’ubukerarugendo  bihagarara, ba mukerarugendo ntibaze gusura ingagi.”

Binyuze mu masezerano y’ubufatanye,  ibi bihugu uko ari 3 byasinyanye muri 2015 agamije guteza imbere ubukerarugendo mu gace k’ibirunga yitwa “Greater Virunga Trans-boundary”, ibi bihugu byiyemeje gukomeza guhangana no kurwanya ba rushimusi.

Uretse ingagi 604 zabaruwe ziba muri Pariki y’ibirunga, hari n’izindi zigera kuri 400 ziba mu ishyamba rya Bwindi muri Uganda ariko ntizabaruwe  muri iri barura ryakozwe.

 

TANGA IGITEKEREZO

Leave a Reply

Your email address will not be published. Required fields are marked *