28°C , Sunny | Kigali-Rwanda

PAC: Amasoko ya REB yagaragayemo akaboko k’abantu benshi

Yanditswe na Mugisha Benigne

Ku ya 12-09-2019 saa 14:25:19
Dr. Ngabitsinze Jean Chrysostome, Perezida wa Komisiyo ya PAC (Foto Mucyo)

Perezida wa Komisiyo y’Inteko Ishinzwe Amategeko ishinzwe gukurikirana imikoreshereze y’imari n’umutungo bya Leta (PAC), Dr. Ngabitsinze Jean Chrisostome, atangaza ko amasoko atangwa n’Ikigo k’Igihugu cy’Uburezi (REB) yagaragayemo akaboko k’abantu benshi.

Ibi umuyobozi wa PAC yabibwiye itangazamakuru kuri uyu wa 12 Nzeri 2019, nyuma y’igice cya mbere cyo kumva ibisobanuro bya REB ku bijyanye n’imyubakire y’amashuri n’itangwa ry’amwe mu masoko.

Yagize ati: “Uburyo amasoko atangwa muri REB bigaragara ko harimo akaboko k’abantu benshi, ntibakurikiza amategeko, bayatanga kuri kampani zitujuje ibyangombwa, ubundi bakayatanga batuzuye umubare wa ngombwa. Hajemo kubikora nkana n’ikintu cya ruswa.”

Dr. Ngabitsinze avuga ko asanga biterwa n’uko muri kiriya kigo hariyo amafaranga menshi abantu bajya inama y’uburyo bavanamo ayabo, ntibite ku gaciro k’ibikorwa n’icyo bizamarira Igihugu, bigaragaza umuco mubi yise umuco w’ubusambo, umuco wo kwikunda kurusha gukunda akazi Igihugu kiba cyatanze.

Dr. Ngabitsinze avuga ko igikorwa cyo kubaka amashuri bigaragara ko cyanyerejwemo amafaranga y’u Rwanda asaga miriyoni 300 ku ngengo y’imari ya miriyari yagombaga gukora iki gikorwa.

Dr. Ngabitsinze Jean Chrysostome, Perezida wa Komisiyo ya PAC (Foto Mucyo)

Abayobozi ba REB kandi babajijwe ku isoko ryo kugura inka ryahawe rwiyemezamirimo udashoboye, bikarangira ridakozwe ryose kandi n’amafaranga ya garanti atangwa na rwimezamirimo ntatangwe.

Ku bijyanye n’isoko REB yatanze mu kugura inka zo guhemba abarezi babaye indashyikirwa, Dr. Ngabitsinze avuga ko isoko ryahawe rwiyemezamirimo utabasha kuzigura kuko isoko ryavugaga ko azazigura akishyurwa ariko ikibabaje ngo ni uko amafaranga ya garanti agomba gutanga akagarukira ikigo atigeze ayakatwa.

Perezida wa Komisiyo ya PAC akomeza avuga ko inka zatanzwe ari nke kandi muri izo hari izatanzwe zitujuje ibyasabwaga n’isoko zidahaka amezi atatu.

Ati: “Namwe murabyumva guha umwarimu watoranyijwe nk’indashyikirwa agahabwa inka azi ko ifite amezi atatu agategereza akabura, mu gihe yari yiteze ko ibyara mu mezi make! Hariya habayeho gutanga amasoko mu buryo butari bwo.”

Dr. Ngabitsinze avuga ko ku bijyanye na kampani ya ‘High Command’ ku isoko ryo gushyira amasomo muri mudasobwa z’abana, avuga ko naryo ritakozwe ko ahubwo amahirwe ari uko amafaranga atatanzwe bitewe n’uko uwari yarihawe ku bwumvikane bw’ubuyobozi bw’ikigo na rwiyemezamirimo atabashije kubikora.

Ati: “Kumva ko umuyobozi w’ikigo yihamagarira kampani akayiha isoko rifite za miriyari hafi 7 ari umuntu umwe, yatindije Leta, yatindije iterambere, amahirwe tubifitemo ni uko Leta itabihombeyemo yananiwe akazi bataramuha amafaranga.”

Perezida wa PAC avuga ko mu bijyanye na raporo z’imicungire y’imari harimo ibibazo by’uburyo bandika mu bitabo byabo, ngo bishoboka ko umuntu yahuza n’ubumenyi buke cyangwa ubushake buke.

Avuga ko hari ikindi kibazo gikomeye cyane kijyanye no kubaka amashuri ataramba kandi hakoreshejwe amafaranga menshi cyane, bivuze ko amashuri yubatswe ngo atazaramba bitewe n’uburyo yubatswemo.

Dr. Ngabitsinze avuga ko ikibazo kiri mu mafaranga aba yakoreshejwe kandi agaciro k’icyakozwe ntikagaragare.

Avuga ko igikurikira aya makosa yagaragaye bizakorwa n’inzego uko zikurikirana, akavuga ko komisiyo ayoboye izatanga imyanzuro uko inzego zigenda zikurikirana.

Kabasha Didas ni umuyobozi wungirije wa kampani yitwa Rwimbogo, ikaba ari yo yahawe isoko ryo kugura inka zizahabwa abarezi babaye indashyikirwa, avuga ko bahawe isoko riri mu byiciro bibiri nyuma y’ipiganwa, aho batangiye gukora hazamo ikibazo k’indwara y’uburenge yari yibasiye Intara y’Uburasirazuba, biba ngombwa ko habaho akato muri iyo ntara, bituma imirimo ihagarikwa.

Avuga ko byagize ingaruka ku masezerano bari barahawe, basaba REB kubaha igihe k’inyongera, bigera n’aho babibwira Minisiteri y’Uburezi, nayo ngo ibasubiza ko bajya kuganira na REB ariko ngo abayobozi bayo banga kubyemera.

Ati “Twari dufite isoko riri mu byiciro bibiri, rimwe ryari iryo gutanga inka mu Ntara y’Amajyepfo, n’ikindi cyo kuzitanga mu Ntara y’Uburasirazuba. Isoko ryose ryari rigizwe n’inka 255, hamwe ari inka 103 ahandi ari inka 152.”

Kabasha avuga ko batanze inka 54 haza gupfamo 3, akemeza ko uretse gutakaza isoko ngo baranahombye kuko bakoreshaga amafaranga ya banki kandi isoko bakaza kuryamburwa.

Avuga ko nyuma yo guhabwa isoko haje gusohoka amabwiriza ya RAB y’uko nta nka izongera gutangwa idahaka amezi ane, ibyo na byo byaje byiyongera ku masezerano bari basinyanye na REB, ngo ariko ibyo byose REB yarabyirengagije ibima amasezerano y’inyongera.

Kabasha avuga ko iryo soko ryo gutanga inka ryatanzwe mu mwaka wa 2018, ritangira gushyirwa mu bikorwa guhera muri Mata 2018.

Kayira Antoine, ni umukozi wa RPPA (Ikigo k’Igihugu gishinzwe amasoko ya Leta) mu ishami rya Audit (igenzura ku ikoreshwa ry’amafaranga), avuga ko igishushanyombonera cy’amasoko gitegurwa mu gihe hategurwa ingengo y’imari kugira ngo bahuze ibikenewe n’isoko n’amafaranga yarigenewe kandi ntihabeho ikinyuranyo kinini cyane.

Ati “Abashinzwe amasomo ubundi bagomba gukorana bya hafi n’abashinzwe imari mu kigo kandi isoko rigatangwa n’amafaranga yaryo ahari.”

Avuga ko igitabo k’ipiganwa gitegurwa n’urwego rushinzwe iyo mirimo muri icyo kigo, nyuma igitabo k’ipiganwa kiratangazwa, itariki yagera bagafungura amabahasha.

Avuga ko isuzuma ritagomba kurenza iminsi 21, mu gihe habaho impamvu yo kurenza iyi minsi ba rwiyemezamirimo basabye isoko barabimenyeshwa n’impamvu ya byo.

Ku bijyanye n’ububasha umuyobozi afite bwatuma atanga isoko ku kigo kimwe nta piganwa ribaye, Kayira avuga ko ibyo ari amakosa akomeye, aboneraho akanya ko kugaruka kuri Kampani y’Umuhindi izwi ku izina rya ‘High Command’ wahawe uburenganzira n’Umuyobozi mukuru wa REB ngo ashyire amasomo muri mudasobwa z’abana.

Ati “Iki ni ikibazo gikomeye ndetse ni amakosa akomeye kuko icyo gihe umuyobozi w’ikigo aba yivanze mu masoko kandi ntaho agomba guhurira nayo cyane ko ikigo kiba gifite akanama gashinzwe amasoko.”

Umuyobozi mukuru wa REB, Dr. Ndayambaje Irenée n’itsinda ry’abakozi ba REB bafite aho bahurira n’amasoko n’imyubakire no kugura inka zagombaga guhabwa abarezi b’indashyikirwa, yagerageje gusobanura amakosa yose yagaragaye mu masoko ari nako yifashisha ababishinzwe gusobanura kurushaho, ariko abagize PAC bo bagiye bagaragaza inshuro nyinshi ko batanyuzwe.

Umuyobozi mukuru wa REB, Dr Ndayambaje Irenee n’abakozi ba REB

TANGA IGITEKEREZO

One Comment on “PAC: Amasoko ya REB yagaragayemo akaboko k’abantu benshi”

  1. Kunyereza umutungo wa Leta uboneka uvuye mu mirimo ikomeye abanyarwanda baba bakoze bagasagurira igihugu Batanga umusoro ntaho bitaniye no guca igihugu umugongo kuko benshi bagumya kubihomberamo nirwa rubanda rugufi,none se ubwo twazava muri bwabukene bwatubayeho akarande gute nyine?

Leave a Reply

Your email address will not be published. Required fields are marked *