22°C , Mostly cloudy | Kigali-Rwanda
Abaturage bashyize indabo mu mugezi wa Nyabarongo bagamije guha agaciro no kunamira Abatutsi bazize Jenoside ( Ifoto Rose M)

Nzove: Basabwe kuvuga aho imibiri y’abazize Jenoside itarashyingurwa iherereye

Yanditswe na MUKAGAHIZI ROSE

Ku ya 16-05-2018 saa 16:49:30

Abarokotse Jenoside yakorewe Abatutsi mu 1994 bo mu kagari ka Nzove, Umurenge wa Kanyinya mu karere ka Nyarugenge, barasaba umuntu wese waba azi ahaguye ababo muri Jenoside yakorewe Abatutsi kuvuga aho bari ngo bashyingurwe mu cyubahiro kuko bibafasha kuruhuka mu mutima.

Abaturage bashyize indabo mu mugezi wa Nyabarongo bagamije guha agaciro no kunamira Abatutsi bazize Jenoside ( Ifoto Rose M)

Umuhoza Claire, umwe mu barokotse Jenoside wo mu kagari ka Nzove, avuga ko abenshi mu Batutsi muri ako gace bahaguye batagize amahirwe yo kubabona ngo babashyingure mu cyubahiro, ikintu kugeza ubu kibashengura umutima.

Ashimira ubuyobozi bw’u Rwanda kuba bwarazirikanye ko Abanyarwanda bakeneye kujya bibuka ababo  bukabaha umwanya wo kwibuka atari ukugira ngo bagire inzika, ahubwo bashimire Imana ko hari abarokotse kuko umugambi wari uwo kubasiba ariko Imana ntibyemere.

Yagize ati “Hari bamwe mu bantu batekereza ko abantu barokotse Jenoside ari bo bafite ikibazo nyamara baribeshya kuko n’abantu bishe ntiborohewe,  kubera ko dufite ubuyobozi bwiza rero dukeneye kubegera tukababwira ko twabababariye, tukabahumuriza ariko na bo bakwiye kutwereka  aho abantu bacu bari kugira ngo bashyingurwe mu cyubahiro kuko umuntu nta bwo yaremewe gushyingurwa munsi y’umukingo, cyangwa mu gishanga, umuntu abaho nyuma arangije ubuzima agaherekezwa  mu cyubahiro”.

Yakomeje agira ati “Abaturanyi bacu bagize ibyago byo kugwa mu kintu cyo kwambura abacu ubuzima no gutoteza bage baza dufatanye muri ibi bikorwa byo kwibuka kuko barabazi.”

Ahorukomeye Felix, we yishimira ko abarokotse Jenoside bibuka biyubaka bakaba   bafatanya n’abandi baturage  kubaka igihugu cyabo.

Umunyamabanga Nshingwabikorwa w’Umurenge wa Kanyinya Niyibizi Claude, yavuze ko ku bibazo abaturage bo muri uyu murenge bafite byo kuba bataramenya aho imibiri y’ababo yashyizwe kugira ngo ishyingurwe mu cyubahiro, ko bagiye kwegera abaturage bakabaganiriza kugira ngo uwaba afite amakuru ayatange.

Yakomeje avuga ko abarokotse Jenoside muri  uyu murenge bakomeje gukora ibikorwa bitandukanye by’iterambere, ngo ibi bikaba bigaragaza ko abaturage bakomeje kwiyubaka.

Mu kiganiro yatanze, Gasamagera Wellars, Umuyobozi Mukuru w’Ikigo k’Igihugu cy’Amahugurwa mu by’Imicungire y’Abakozi, RIM, yibukije abaturage n’abayobozi ko mu gihe cyo kwibuka hazajya havugwa n’amazina yabo bibuka ngo kuko mu gihe amazina atavuzwe ko bisa nk’aho nta cyo baba bakoze.

Umuhango wo kwibuka witabiriwe n’abaturage batuye muri uyu murenge wa Kanyinya n’abayobozi batandukanye waranzwe n’urugendo rwatangiriye mu mudugudu wa Bibungo.

Nyuma y’uyu muhango abaturage bashyize indabo mu mugezi wa Nyabarongo bagamije guha agaciro no kunamira Abatutsi bazize Jenoside bakajugunywa mu mazi.

 

 

 

TANGA IGITEKEREZO

Leave a Reply

Be the First to Comment!

avatar