21°C , Partly sunny | Kigali-Rwanda

Nyuma yo kujurira, Rayon Sports yagabanyirijwe ibihano yari yafatiwe na FERWAFA

Yanditswe na BUGINGO FIDELE

Ku ya 15-02-2020 saa 16:58:48
Rayon Sports yagabanyirijwe ibihano

Ikipe ya Rayon Sports yari yafatiwe ibihano bikomeye nyuma yo kutitabira irushanwa ry’Intwari 2020 ryabaye kuva tariki 25 Mutarama kugeza 01 Gashyantare 2020. Nyuma yo kujurira, ibi bihano byaraganyijwe.

Iri rushanwa rya 2020 ryagombaga kwitabirwa na Rayon Sports yegukanye umwanya wa mbere muri  shampiyona ya 2018-2019, APR FC, Police FC na Mukura. Ikipe ya Rayon Sports yasabye  ishyirahamwe ry’umupira w’amaguru mu Rwanda “FERWAFA” ko irushanwa ryakinwa nk’ibisanzwe hagakina abakinnyi bose hatitawe ku mubare w’abanyamahanga  nk’uko bigenda muri shampiyona n’igikombe cy’Amahoro  ndetse n’abakinnyi bashya bakemerwa gukina.

Iki kifuzo, FERWAFA yaracyanze isaba ko abakinnyi bamerewe gukina iri rushanwa ari abafite  ibyangombwa  ndetse n’abanyamahanga bakaba batatu ku mukino nk’uko bisanzwe. Ibi ikipe ya Rayon Sports yarabyanze  yandika ivuga ko yikuye mu  irushanwa ariko hafashwe ikemezo cyo gutumira ikipe ya Kiyovu yasoreje ku mwanya wa 5.

Tariki 07 Gashyantare 2020 ni bwo hateranye inama ya Komite Nyobozi ya FERWAFA  aho yigaga ku myitwarire y’iyi kipe ya Rayon Sports.  Ikipe ya Rayon Sports yashinjwe kutubahiriza amategeko ya FERWAFA nk’umunyamuryango avuga ko bagomba gukurikiza amategeko ndetse no kwitabira amarushanwa yose  ategurwa.

Icyo gihe Rayon Sports ikaba yarahawe igihano cyo kutazitabira imikino y’irushanwa ry’Intwari  umwaka utaha wa 2021  mu gihe yaramuka isoje umwaka w’imikino wa 2019-2020  mu myanya 4 ya mbere. Rayon Sports yabujijwe gutegura no kwitabira imikinoya gicuti yaba iy’imbere mu gihugu ndetse no hanze y’igihugu mu gihe kingana n’amezi 12. Rayon Sports kandi ikaba yaciwe ibihumbi 300 by’ihazabu.

Ubuyobozi bw’ikipe ya Rayon Sports bwajuririye ibi bihano bahawe  aho bagaragazaga ko bahanwe batigeze hababwa umwanya wo kwisobanura, kuba amategeko y’irushanwa  atarashyizweho n’inteko rusange.

Nyuma yo gusuzuma ingingo zatanzwe n’ubuyobozi bw’iyi kipe ya Rayon Sports,  tariki 14 Gashyantare 2020,Komisiyo y’ubujurire ya FERWAFA yanzuye ko igihano cyo gutanga ihazabu y’amafaranga ibihumbi 300 kigumaho.

Igihano cyo gutegura no kutitabira imikino ya gicuti  cyavuye ku mezi 12 kiba ukwezi kumwe mu gihe icyo kutitabira imikino  ya gicuti hanze y’u Rwanda cyakuweho.

Igihano cya gatatu iyi kipe yahawe kwari ukutazitabira irushanwa ry’Intwari  umwaka utaha 2021 igihe iyi kipe ya Rayon Sports yaje mu makipe 4 ya mbere. Iki gihano kikaba cyarakuweho, ikipe ya Rayon Sports ikaba yemerewe gukina iri rushanwa mu gihe izaba yasoje umwaka w’imikino wa 2019-2020 mu makipe 4 ya  mbere.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.