20°C , Mostly cloudy | Kigali-Rwanda

Nyuma ya Jenoside, abanyamuryango ba Koperative ASSOPTHE bakomeje kwiyubaka

Yanditswe na Amani Claude

Ku ya Apr 10, 2018 saa 7:53

Ubuyobozi bwa Koperative y’abahinzi b’icyayi ASSOPTHE bwemeza ko mbere y’uko u Rwanda rubohorwa hagahagarikwa Jenoside yakorewe Abatutsi mu 1994, koperative yari ihagaze nabi ariko nyuma yo guhagarika Jenoside koperative igeze ahashimishije mu rugendo rwo kwiyubaka.

Inzu SACCO ya koperative y’abahinzi b’icyayi ASSOPTHE ikoreramo

Umucungamutungo wa Koperative ASSOPTHE Rushigajiki Cyprien, yatangarije Imvaho Nshya ko ubwo ingabo za RPF/Inkotanyi zahagarikaga Jenoside yakorewe Abatutsi, icyayi cyaguraga hagati y’amafaranga 23 na 25 ku kiro. Kubera imiyoborere myiza y’ubuyobozi bukuru bw’igihugu kuri ubu icyayi kigeze ku mafaranga 236 ku kiro.

Umucungamutungo wa Koperative ASSOPTHE Rushigajiki Cyprien

Ubwo koperative yatangiraga, abanyamuryango bari mbarwa ariko kubera gahunda yo gushishikariza Abanyarwanda kwibumbira mu makoperative, abanyamuryango bamaze kuba 3552. Ubuso buhingwaho icyayi na bwo bwarongerewe aho bugeze kuri hegitari 1020.

Abanyamuryango bishingiye Ikigo k’Imari iciriritse (SACCO), aho bizigamira ndetse bakaguza bagamije kwiteza imbere. Hubatswe izindi nyubako Koperative ikoreramo, bubakira abana bato aho kwigira( Gardienne ebyiri), isomero ndetse biyubakira na Sitasiyo bafatiraho lisansi.

Inzu ya SACCO Koperative ASSOPTHE

Mu rwego rwo gukomeza kwiyubaka biguriye iminzani 12 ipima icyayi aho umwe ugura arenze miliyoni 2 n’igice, bagura imodoka 8 harimo izibafasha gutunda icyayi.

Ubuzima bw’abanyamuryango bwarahindutse

Perezida w’Inama y’Ubutegetsi muri koperative ASSOPTHE Madamu Mukantabana Dorothée, avuga ko buri munyamuryango yishyurirwa ubwisungane mu kwivuza.  Inka zirenga 210 zimaze guhabwa abanyamuryango muri gahunda ya Girinka kandi nyuma y’umwaka buri munyamuryango ahabwa ubwasisi aho usanga hari ufata agera ku mafaranga ibihumbi 500 bitewe n’umusaruro agemura ku ruganda.

Madamu Mukantabana yemeza ko buri munyamuryango abayeho neza kuko bose biyubakiye amazu meza,  ku buryo usanga iterambere mu bikorwa remezo riri ahari icyayi  cya ASSOPTHE rishingiye ku buhinzi bw’icyayi.

Nubwo ubuyobozi bwa Koperative ASSOPTHE bukomeje gutera amashyamba ku misozi, burasaba ko bwakorerwa amaterasi y’indinganire kubera ko hari igihe imvura igwa ikamanura isuri icyayi kikangirika. Abanyamuryango ba koperative basanga  kandi byaba byiza bahawe n’umuhanda wa kaburimbo.

Mu gihe cyo kwibuka abarokotse Jenoside yakorewe Abatutsi hari ibikorwa

Buri mwaka Koperative ASSOPTHE igira gahunda yo kwibuka abanyamuryango bazize Jenoside yakorewe Abatutsi aho basura inzibutso ikanafatanya n’ubuyobozi bw’inzego z’ibanze mu bikorwa byo gufasha abatishoboye barokotse Jenoside.

Bwana Rushigajiki yemeza ko umuntu abereyeho undi, yagize ati: “Abantu bagomba gufashanya. Mu gihe cyo kwibuka tube hafi y’abarokotse Jenoside yakorewe Abatutsi, tubatege amatwi kandi tubafashe.”

Ubuyobozi bwa Koperative burahamya ko kwibuka ari ngombwa  kandi ko abarokotse Jenoside yakorewe Abatutsi badakwiye guheranwa n’agahinda ahubwo ko bagomba gukomeza gukora bagatera imbere.

Madamu Mukantabana arasaba ababyeyi gufata iya mbere bagatoza abana babo kurangwa n’indangagaciro z’ubupfura n’ubumwe, bakarindwa ingengabitekerezo ya Jenoside n’amacakubiri kuko ari bo Rwanda rw’ejo.

Ubuyobozi bwa Koperative buributsa abagifite imitima iboshywe gusaba imbabazi kandi bakavugisha ukuri ku byo bazi, usabwe imbabazi akazitanga bimuvuye ku mutima kuko ari uburyo bwo komora imitima.

Perezida Kagame arashimirwa

Ubuyobozi bwa Koperative ASSOPTHE burashimira Nyakubahwa Perezida wa Repubulika Paul Kagame wayoboye urugamba rwo kubohora u Rwanda agahagarika Jenoside yakorerwaga Abatutsi, akaba yarahuje Abanyarwanda bakunga ubumwe  mu mahoro n’umutekano.

Abanyamuryango ba Koperative ASSOPTHE banyuzwe n’uko Nyakubahwa Paul Kagame yagize uruhare kugira ngo igiciro k’icyayi cyongerwe n’abahinzi bacyo bagahabwa imigabane mu nganda zigitunganya.