23°C , Mostly cloudy | Kigali-Rwanda
Perezida Kagame aganira na Nyiramandwa ubwo aheruka gusura Akarere ka Nyamagabe

Nyiramandwa yashyikirijwe inka yashumbushijwe na Perezida Kagame

Yanditswe na Twagira Wilson

Ku ya 14-03-2019 saa 16:10:25

Umukecuru Nyiramandwa Rachel w’imyaka 109 utuye mu Kagari ka Ngiryi mu Murenge wa Gasaka mu Karere ka Nyamagabe yashyikirijwe inka yahawe n’Umukuru w’Igihugu, Paul Kagame.

Iyo nka yayimwemereye ubwo yasuraga Akarere ka Nyamagabe tariki ya 26 Gashyantare uyu mwaka.

Perezida Kagame aganira na Nyiramandwa ubwo aheruka gusura Akarere ka Nyamagabe

Uyu mukecuru aravuga ko iyi nka igiye kumubera akabando kazamushajisha neza, akaba ashima Umukuru w’Igihugu.

Nyiramandwa aganira n’abanyamakuru ubwo yari amaze guhabwa inka ye, yavuze ko atari ubwa mbere atunze inka ahawe n’Umukuru w’Igihugu gusa ngo iya mbere yamuhaye yapfuye izize indwara.

Nyuma y’uko iyo nka ipfuye Nyiramandwa Rachel ngo yabonaga amata ari uko ayaguze mu mafaranga asanzwe afata y’ingoboka.

Mu ruzinduko Umukuru w’Igihugu aherutse kugirira mu karere ka Nyamagabe, uyu mukecuru yamugaragarije ikibazo cy’uko inka yari yaramugabiye yaje gupfa. Umukuru w’Igihugu Paul Kagame yahise amwizeza kuzamushumbusha indi vuba.

Nyuma y’ibyumweru bigera hafi kuri 3, Inka Umukuru w’Igihugu yamwemereye yamugezeho. Uyu mukecuru ashima kuba noneho agiye kongera kunywa amata y’inka ye atarinze kuyagura. Uretse ibi kandi iyi nka ngo izanatuma abona ifumbire.

Mukaruziga Annonciata usanzwe ubana na Nyiramandwa, aravuga ko iyi nka bahawe n’Umukuru w’Igihugu ibaruhuye ingendo bakoraga bajya kumushakira amata, dore ko ngo ari yo amutunze yonyine.

Umuyobozi w’Akarere ka Nyamagabe, Uwamahoro Bonaventure, aravuga ko nk’akarere bazafasha Nyirankundwa kubona ubwatsi bw’inka n’umuvuzi w’amatungo mu rwego rwo kuyirinda indwara za hato na hato

Iyo nka yahawe na Perezida wa Repubulika ni imfirizoni y’isine ikaba yonsa inyana y’ikibamba; ikaba ikamwa litiro 11 z’amata ku munsi.

Nyiramandwa Rachel yabyabye abana 4 kuri ubu asigaranye umwe gusa ari na we babana, abandi 3 bazize Jenoside yakorewe abatutsi mu 1994.

Nyiramandwa yashyikirijwe inka yashumbushijwe na Perezida Kagame

Perezida Kagame aganira na Nyiramandwa ubwo aheruka gusura Akarere ka Nyamagabe

TANGA IGITEKEREZO

Leave a Reply

Your email address will not be published. Required fields are marked *