28°C , Sunny | Kigali-Rwanda

Nyaruguru: Umushinga w’Isoko na Gare watwaye asaga miriyoni 800 wahinduye isura ya Kibeho

Yanditswe na Twizeyimana Fabrice

Ku ya 11-09-2019 saa 07:30:27
Kibeho Modern Market, isoko ryahinduye isura ya Kibeho ku buryo bugaragara

Umujyi wa Kibeho mu Karere ka Nyaruguru, ubu uragaragara mu isura nshya, nyuma yo kuzura ku isoko na gare bigezweho, byubatswe mu mushinga mugari ‘Kibeho Modern Market and Car Parking’ watwaye amafaranga y’u Rwanda abarirwa muri miriyoni 840.

Ni umushinga witezweho kuzamura iterambere ry’uyu mugi n’akarere muri rusange, ndetse unorohereze abaturage gukora ubushabitsi (business) bubinjiriza amafaranga atubutse.

Muri iyi nkuru turibanda kuri iri soko rya kijyambere abacuruzi bahawemo imyanya yo gukoreramo ku wa 10 Nzeri 2019, naho gare yo tuzayigarukaho ku buryo burambuye mu yindi nkuru tuzabagezaho.

Ubuyobozi bw’Akarere ka Nyaruguru buvuga ko iri soko ryubatswe muri gahunda yo korohereza abacuruzi gukorera mu nyubako ijyanye n’igihe kandi hahendutse, kuko byari byagaragaye ko inzu zo gucururizamo zirimo guhenda kuko zari nke kandi abazikeneye biyongera.

Mu kiganiro yagiranye n’Imvaho Nshya, umuyobozi w’Akarere ka Nyaruguru wungirije ushinzwe iterambere ry’ubukungu Gashema Janvier, yavuze ko iri soko rya kijyambere rigiye no gufasha bamwe mu bacuruzi bari bagiye kubura aho bakorera, kuko inyubako bakoreragamo mbere zashenywe mu gikorwa cyo kwagura umuhanda wa Kibeho.

Yagize ati: “Hari abaturage bacu bashakaga gukora ubucuruzi bakazitirwa no kubona amazu bakoreramo cyangwa se n’ibiciro by’amazu ahenze kuko ari na make, ku buryo rero biraza korohereza abashaka gukora ‘business’ kuba bahacururiza, ariko n’abashaka guhaha na bo bakaba babona aho bahahira.

Ikindi kubera ko n’umuhanda wa kaburimbo uzasenya amwe mu mazu afatanye n’umuhanda muri ubu buryo barimo kuwagura, byari kuzashoboka ko abaturage bacu bagira ikibazo cyo kuba babona aho bakorera mu gihe ayo mazu yabo yaba yashenywe wenda batarabasha guhita biyubakira andi, nacyo ni ikindi ririya soko rizakemura”.

Visi Meya Gashema arakangurira abacuruzi kugana iyi nyubabo igezweho y’isoko bagafatamo ibibanza bakahacururiza, kuko n’ibiciro by’aho gukorera bidakanganye nk’uko bamwe bashobora kubikeka.

Yakomeje agira ati: “Abatekereza ko imyanya yo gucururizamo ishobora kuba ihenze twabamara impungenge rwose, kuko iyo igihugu cyatekereje kwegereza igikorwa remezo abaturage akenshi kiba kigira ngo kinabagabanyirize uwo mutwaro w’amafaranga. N’ubwo batagiramo ubuntu ariko ntekereza ko ibiciro bizaba biciriritse.”

Bamwe mu baturage bo mu Karere ka Nyaruguru baganiriye n’Imvaho Nshya, bagaragaje ko iri soko rya kijyambere ari igikorwa remezo kiziye igihe, kuko uretse kuba ryarahinduye isura y’Umujyi wa Kibeho urimo gukura, ngo rizaba igisubizo ku bahatuye ndetse n’abakerarugendo byagaragaraga ko bakeneye aho guhahira hasobanutse.

Nsabimana Anselme, ni umwe mu batuye i Kibeho ndetse wifuza gukorera muri iri isoko. Yaganiriye n’Imvaho Nshya ubwo we n’abandi bacuruzi bari bitabiriye gahunda yo gutanga ibibanza byo gukoreramo muri iri soko rya kijyambere.

Yabwiye Imvaho Nshya ko iyi nyubako iziye igihe, kuko urwego Kibeho igezeho yari ikeneye isoko rijyanye n’igihe, kandi ngo iyi nyubako ntizatahira guhindura isura y’umugi wabo gusa, ahubwo baniteguye kuyibyaza umusaruro.

Yagize ati: “Ubusanzwe hano habaga twa dusoko duto two mu cyaro, ku buryo umuntu yavuga ko nta soko twagiraga. Kuba rero twabonye isoko rya kijyambere hari abacuruzi bacururizaga hirya no hino byumvikana ko bazacururiza hamwe, hakabaho ko n’ugiye gushaka icyo yagura azajya akibonera hamwe kandi hafi.

Ni inyubako igaragara mu gace kacu hagiye kugaragara neza, icyo ni cyo cya mbere, kandi twiteguye kuyibyaza umusaruro kuko n’ubu tuvugana harimo gutangwa amabwiriza, ubundi tugafatamo imyanya”.

Iri soko riri haruguru ya gare

TANGA IGITEKEREZO

Leave a Reply

Your email address will not be published. Required fields are marked *