28°C , Sunny | Kigali-Rwanda

Nyaruguru: Umusaruro w’ibirayi ubu ugeze kuri Toni 29/Ha babikesha ishwagara bahawe na Kagame

Yanditswe na Twizeyimana Fabrice

Ku ya 12-09-2019 saa 08:27:31
Umusaruro w'ibirayi wariyongereye cyane muri Nyaruguru

Abahinzi b’ibirayi bo mu Karere ka Nyaruguru barashimira Perezida wa Repubulika Paul Kagame, wabahaye ishwagara yabafashije gukemura ikibazo cy’ubutaka busharira, ubu umusaruro w’ibirayi ukaba warazamutse ku buryo budasanzwe iwabo, kuko kuri hegitari imwe ubu barimo gusaruraho impuzandengo ya Toni 29.

Mu mwaka wa 2013, ni bwo Perezida Kagame yemereye abaturage bo mu Karere ka Nyaruguru ishwagara ifasha ubutaka kwera neza, nyuma y’uko bari bamugaragarije ko ubusharire bw’ubutaka bwabo butuma batabona umusaruro w’ubuhinzi ushobora kubahaza.

Imvugo yahise iba ingiro, ishwagara yegerezwa abaturage, ndetse banahabwa ifumbire n’imbuto.

Muri 2016, abahinzi 328 bahinga mu gishanga cya Rwoganyoni bo baricaye bajya inama, basanga kwishyira hamwe ari yo nzira yabafasha kubyaza umusaruro aya mahirwe adasanzwe bahawe na Perezida Kagame, bashinga koperative ‘Jya mbere muhinzi Kibeho’.

Mu kiganiro yagiranye n’Imvaho Nshya, Umuyobozi w’iyi koperative Bizumuremyi Jean Claude, yagaragaje ko nyuma y’imyaka 3 gusa bahuje imbaraga, ubu umusaruro wabo w’ibirayi umaze kwikuba hafi inshuro eshatu, ibi bakabifata nk’ibidasanzwe mu karere kabo kari karazahajwe n’inzara kubera ubutaka bubi.

Yagize ati: “Uyu munsi raporo duheruka gukora twari tumaze gusarura toni 520 mu gihembwe k’ihinga kirangiye, ndetse turacyakomeza dukura, ubundi mbere twari hasi cyane ku buryo na toni 100 tutazigezagamo. Mbere amasoko ntiyari atuzi ariko ubu no hanze y’akarere kacu tuhafite amasoko kandi ibirayi byacu birakunzwe cyane.

No mu imurikagurisha ry’Intara y’Amajyepfo riheruka kubera mu Karere ka Muhanga twarigaragaje rwose, twacuruje toni zigera mu munani mu minsi 10 ryamaze. Ubundi uyu munsi umusaruro w’ibirayi turi kuri toni 29 kuri hegitari, ni yo mpuzandengo y’igishanga cyose, mbere twabonaga hagati ya toni 8 na toni 10”.

Umusaruro w’ibirayi wariyongereye cyane muri Nyaruguru

Ibyagezweho ni imbuto z’imiyoborere myiza

Bizumuremyi kimwe n’aba bahinzi b’i Kibeho bagenzi be ahagarariye, bahamya ko ubu bwiyongere bw’umusaruro babukesha inkunga n’inama bahabwa n’ubuyobozi, by’umwihariko Perezida wa Repubulika.

Yagize ati: “Tubikesha ubuyobozi bwiza, ku nama twagiye tugirwa, urumva nk’iyo shwagara twayikuye kuri Nyakubahwa Perezida wa Repubulika avuga ati byibuze inaha ni iki cyakorwa kugira ngo abantu ubuhinzi bwabo butere imbere nk’utundi turere.

Aduha ishwagara ni yo kuri uyu munsi yazamuye agaciro k’umuhinzi wo mu karere ka Nyaruguru. Perezida wa Repubulika turamushimira ibyiza yatugejejeho, aho akura Imana ige imwongerera”

Ubuyobozi buti “Perezida Kagame yakoze ibyari byarananiranye »

Umuyobozi w’Akarere ka Nyaruguru wungirijwe ushinzwe iterambere ry’ubukungu Gashema Janvier, yabwiye Imvaho Nshya ko ubwiyongere budasanzwe bw’umusaruro babubona nk’igitangaza kidasanzwe.

Avuga ko inkunga ya Perezida Kagame n’imiyoborere myiza ye, byabafashije gukora ibyari byarananiranye, Nyaruguru yarangwagamo inzara abaturage basuhuka magingo aya ikaba isigaye ari ikigega k’igihugu.

Yagize ati “Umusaruro w’ibirayi warazamutse ku buryo bunashimishije cyane, bajyaga bavuga ko ubutaka bwa Nyaruguru busharira ariko nyuma y’aho Nyakubahwa Perezida wa Repubulika adufashije akaduha ishwagara kuri Nkunganire, n’ifumbire n’imbuto nziza byose bitangwa kuri nkunganire ubukungu bushingiye ku buhinzi muri Nyaruguru bwarazamutse.

Ibyo dukora byose tubikora mu ishimwe rya Nyakubahwa Perezida wa Repubulika kuko ni we watekereje ibyari byarananiranye, abaturage bacu basuhuka, ariko ubu ngubu bakaba batangiye kuba ikigega k’igihugu, abaturage aho tugiye hose bahora batubwira ngo tubashimirire Nyakubahwa Perezida wa Repubulika, natwe nk’abayobozi rero turamushimira byimazeyo”.

Visi Meya Gashema akomeza avuga ko aya mahirwe Akarere ka Nyaruguru kagize batazapfusha ubusa, ahubwo bazakomeza kuyabyaza umusaruro bagateza imbere ubuhinzi bakarenga intego yo kwihaza gusa, ahubwo bagasagurira n’amasoko.

Yagize ati: “Kandi tumubwira ko natwe amahirwe aba yaduhaye tutagomba kuyapfusha ubusa, tugomba kuyabyaza umusaruro tugahangana n’ikibazo k’inzara tukayica burundu ndetse tukagera aho abaturage bacu bahingira amasoko, atari ugutekereza ibyo kurya gusa.”

No mu buhinzi bw’ibigori ntibasigaye inyuma

Aba bahinzi bo muri koperative ‘Jya mbere muhinzi Kibeho’ bavuga ko uretse ubuhinzi bw’ibirayi bateje imbere ku buryo bugaragara, no mu buhinzi bw’ibigori ngo ntibasigaye inyuma.

Umuyobozi w’iyi koperative Bizumuremyi Jean Claude avuga ko ubu barimo gusarura toni 4,5 mu gihe mbere ngo kubona toni 3 byari bigoranye.

Avuga ko mu rwego rwo kubera abandi igisubizo, ubu bafite uruganda rutunganya umusaruro w’ibigori, rufite agaciro k’amafaranga y’u Rwanda miriyoni 42, rukaba rufasha abaturage bose muri rusange kuko ntawe ugikenera ifu y’ibigori itunganyije neza ngo bimusabe kujya i Kantarange.

Uyu muyobozi wa koperative, avuga ko mu kerekezo bihaye harimo gukomeza kwagura ibikorwa by’ubuhinzi, byanashoboka umusaruro babona bakaba bagira uburyo bwo kuwongerera agaciro, kugira ngo amafaranga binjiza nyuma yo kwihaza mu biribwa, nayo akomeze kwiyongere.

Aheraga toni 10 z’ibirayi ubu barahasarura toni 29 babikesha ishwagara bahawe

TANGA IGITEKEREZO

Leave a Reply

Your email address will not be published. Required fields are marked *