Nyaruguru: Umaze hafi ukwezi asembera yijejwe kwinjira muri 2020 ari mu nzu nshya

Yanditswe na Twizeyimana Fabrice

Ku ya 02-12-2019 saa 15:59:56
Inzu Uwimana arimo kubakirwa yubakishijwe ibiti (Foto Twizeyimana F.)

Ubuyobozi bw’Akarere ka Nyaruguru bwatangije umushinga wo kubakira umubyeyi witwa Uwimana Chantal, wari umaze ibyumweru bisaga bitatu acumbikiwe n’abaturanyi nyuma y’uko inzu yabagamo isenywe n’imvura imaze iminsi igwa ubudasiba.

Umushinga wo kubakira uyu mubyeyi utuye mu mudugudu wa Nyarusovu, Akagari ka Mubuga mu Murenge wa Kibeho watangiranye n’umuganda usoza ukwezi kw’Ugushyingo, wabaye kuya 1 Ukuboza 2019.

Abayobozi batandukanye batanze umusanzu w’imbaraga z’amaboko yabo mu kubakira uyu mubyeyi utishoboye umaze hafi ukwezi acumbitse. Barimo Depite Mukamana Elizabeth, abagize komite nyobozi y’aka karere, n’abahagarariye ingabo na Polisi y’igihugu.

Igikorwa cyo kubakira uyu mubyeyi kandi cyanitabiriwe n’itsinda ry’abayobozi mu itorero ry’Abametodisiti ku rwego rw’Igihugu riyobowe na Musenyeri Kayinamura Samuel, baniyemeje gukomeza kubaka iyi nzu kugeza irangiye, akinjira mu mwaka wa 2020 atuye mu nzu nziza kurusha iyo yahoranye mbere y’uko isenyuka.

Musenyeri Kayinamura yagize ati “Twamaze kwiyemeza ko iriya nzu tugiye gukurikirana ibikorwa byayo tukayuzuza, bavuze ibyumweru bitatu ndatekereza ko mutagiye kuryama (abwira abapasiteri), ntabwo uriya mubyeyi agomba kuzinjira mu mwaka mushya agisembera, kandi inzu yubatse neza rwose n’ibikoresho.”

By’umwihariko Paruwasi ya Ndago yahawe inshingano zo gukurikirana umunsi ku munsi imirimo yo kubakira uyu mubyeyi ku buryo izaba yarangiye mu gihe biyemeje.

N’ubwo adasobanura neza agaciro k’iyi nzu igiye kubakirwa Uwimana, Musenyeri Kayinamura avuga ko izaba iteye umucanga, irimo isima ndetse ikabamo n’ibikoresho by’ibanze mu nzu nk’ibitanda, matola zo kuryamaho n’ibindi.

Umuyobozi w’akarere ka Nyaruguru Habitegeko François, nawe yashimangiye ko bahize umuhigo wo gufasha Uwimana Chantal akinjira mu kerekezo 2020 afite aho kuba hamuhesha agaciro, kandi ngo yizeye ko bizagerwaho ku bufatanye n’abafatanyabikorwa biyemeje kubigiramo uruhare.

Yagize ati “Turifuza ko uriya mubyeyi twubakiye tutazinjira mu kerekezo 2020 agisembera, Rwose hariya twahahigiye imihigo ikomeye cyane dufatanyije na Pasiteri wanyu ko tugomba gutuza uriya mukecuru mu byumweru bibiri, byakabya bikaba bitatu tukaba twamutuje.”

Meya Habitegeko yafatanyije n’abaturage mu guca umusingi w’inzu ya Uwimana (Foto Twizeyimana F)

Uwimana watangiye kubakirwa yatangaje ko inzu yari asanzwe atuyemo yari nto kandi idakomeye, akaba ari yo mpamvu imvura yayihiritse.Avuga ko nta bushobozi afite bwo kwiyubakira kuko ubusanzwe atunzwe no ‘guca inshuro’ kandi n’umugabo we wakagombye kugira icyo amufasha akaba afungiye ibyaha bifitanye isano n’urugomo yakoze.

Ku bwe ngo iyi nzu yumvise bavuga ko bagiye kumwubakira aracyayifata nk’inzozi yiteguye ko zizaba impamo mu gihe gito.

Uretse Uwimana wahawe umuganda wo kumwubakira inzu mu itondo ry’ahahoze iyasenyutse, abaturage bafatanyije n’abayobozi mu nzego zitandukanye mu guhoma inzu ya Nyirabahimandwa consolate w’imyaka 80, kuko nayo yari ifite ibibazo bitandukanye.

Uyu mukecuru yavuze ko kuba abayobozi batandukanye barimo n’umudepite baza kumuha umuganda ari ibintu bidasanzwe, abona nk’imbuto zeze ku miyoborere myiza u Rwanda rufite.

Yakomeje agira ati “Ndashima ubuyobozi bwiza bwa Nyakubahwa Perezida Paul Kagame kubera ko bukomeje kwita ku mibereho myiza yacu.”

Abaturanyi b’uyu mukecuru basabwe gukomeza kumuha umuganda, kugira ngo nawe azinjire mu kerekezo 2020 ari mu nzu nziza, aryamamo agasinzira atikanga ko yahirima.

Visi Meya Kayitesi Collette na Depite Mukamana Elizabeth bahereza urwondo abafundi

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.