21°C , Intermittent clouds | Kigali-Rwanda

Nyaruguru: Dr. Mukeshimana yabasabye kwita ku cyayi no kongera umusaruro wacyo

Yanditswe na Twizeyimana Fabrice

Ku ya 08-11-2019 saa 08:28:00
Minisitiri w'ubuhinzi n'ubworozi Dr Mukeshimana Geraldine atera icyayi

Minisitiri w’Ubuhinzi n’Ubworozi Dr. Mukeshimana Gerardine, yatangije igihembwe k’ihinga ry’icyayi 2019/2020, asaba abahinzi kurushaho kukitaho no kongera umusaruro wacyo mu bwiza no mu bwinshi.

Igihembwe k’ihinga ry’icyayi cyatangirijwe mu murenge wa Kivu mu karere ka Nyaruguru kuwa 7 Ugushyingo 2019, aho Minisitiri Mukeshimana n’abandi bayobozi bifatanije n’abaturage  mu muganda wo gukorera  icyayi  muri zone ya  Muganza-Kivu Tea Factory.

Dr. Mukeshimana yashimiye abahinzi b’icyayi uburyo basigaye bakitaho, binatuma kigira uburyohe kigahiga ibindi ku isoko mpuzamahanga.

Yagize ati “Ndashimira mwe abahinzi muri hano mwese ku bw’imbaraga n’umuhate mwagiye mwongera mu gukorera icyayi cyanyu kandi cyacu. Igiciro kigurwaho icyayi cy’u Rwanda kuba kimaze gutumbagira nk’uko mwabyumvise nabyo ni mwe tubikesha. Mukomereze aho.

Mumaze iminsi mubyumva ko icyayi cy’u Rwanda iyo kigeze ku isoko mpuzamahanga kiba mudasumbwa. Ejo bundi hashize, cyaguzwe amadolari y’Amerika arenga 7 ku kilo mu nganda 4 zo mu Rwanda. Ni ibyo kwishimira. Turabasaba ko bitaba amateka agarukira aho”.

Yakomeje abasaba ko kwita kuri iki cyayi byajyana no kongera umusaruro wacyo, ndetse abizeza ko Leta nayo izakomeza kubaba bugufi nk’uko bisanzwe.

Minisitiri Mukeshimana yakomeje agira ati “Nk’uko umuntu atabaho adafite ibimutunga, ni ko igihingwa icyo ari cyo cyose kitabaho kidafite ikigitunga, n’icyayi kirimo. Mukwiye rero kwita ku mirima yanyu y’icyayi mukakitaho nk’uko mwiyitaho kugira ngo kibahe umusaruro. Leta nayo izabahora hafi.

Mu mpera z’umwaka wa 2018 ubuso bwari buhinzeho icyayi muri Nyaruguru bwari bugeze kuri Ha 4,319. Birashoboka ko ubu buso twabukuba inshuro 4 cyangwa 5 bukagera hagati ya hegitari ibihumbi 16 na 20 zihinzeho icyayi. Birashoboka dushyize hamwe.”

Dr. Mukeshimana yagarutse kandi kuri uyu munsi nyir’izina wo gutangiza igihembwe k’ihinga ry’icyayi, avuga ko ufasha abahinzi b’icyayi kunguka ubumenyi bushya mu kubagara icyayi, gusimbuza icyayi cyangiritse, no gushyiramo ifumbire mvaruganda hagamijwe kongera umusaruro kuri hegitari.

Ati “Uyu munsi twahujwe no gutangiza igihembwe k’ihinga mu cyayi. Iki gikorwa ngarukamwaka cyagiriye umumaro munini abahinzi, mu iyamamazabuhinzi, kandi mwabonye ko hatangirwa ubumenyi bwinshi, mu gutera icyayi, kukibagarira no gusimbuza ingemwe zitafashe”.

Nyuma yo gutangiza ku mugaragaro igihembwe k’ihinga  ry’icyayi 2020 A mu makoperative y’icyayi yasuye uruganda rwa Muganza -Kivu Tea Factory,  asaba ubuyobozi gukomeza  gufatanya n’abahinzi kongera umusaruro uva kuri hegitari.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.