21°C , Mostly cloudy | Kigali-Rwanda

Nyaruguru: Abakingiwe COVID-19 bati: “Inkingo ni ubuzima”

Yanditswe na NYIRANEZA JUDITH

Ku ya 05-03-2021 saa 20:32:37
Abaturage b'Umurenge wa Nyabimata bavuga ko bishimiye ko bahawe urukingo rwa COVID-19 (Foto: Akarere ka Nyaruguru)

Hirya no hino mu bigo nderabuzima byo mu Karere ka Nyaruguru abaturage batangiye guhabwa urukingo rwa COVID-19, babyishimiye bavuga ko kwirinda biruta kwivuza.

Abaturage b’Umurenge wa Nyabimata bo bavuga ko bishimiye ko bahawe urukingo rwa COVID-19 kandi ko bagiye gukomeza gushyira mu bikorwa amabwiriza yo kwirinda iki cyorezo.

Umujyanama w’Ubuzima mu Murenge wa Nyabimata, Akagari ka Mishungero, mu Mudugudu wa Rubindi, Ndagijimana Jean yagize ati: “Nyuma yo gukingirwa COVID-19 ndumva nta bwoba na buke mfite kuko si ubwa mbere nkingirwa. Umubiri wanjye wongerewe ubudahangarwa mfite icyizere ko nirinze COVID-19. Inkingo ni ubuzima.”

Abaturage bo mu Murenge wa Ruheru bo bishimira ko bahawe urukingo rwa COVID-19, bagahamya ko inkingo ari ubuzima. Igikorwa cyo gukingira abakozi COVID-19 cyanatangiye mu Bitaro bya Munini.

Iki gikorwa cyo gukingira COVID-19 mu Rwanda cyatangiye mu Turere twose. Ibitaro by’Uturere ndetse n’ibigo nderabuzima bikaba birimo gukingira ibyiciro by’abarusha abandi ibyago byo kwandura cyangwa kuzahazwa na COVID-19.

Abajyanama b’ubuzima bari mu bakingiwe ku ikubitiro (Foto: Akarere ka Nyaruguru)

Abakingiwe ku ikubitiro ni Abajyanama b’Ubuzima kuzamura kugeza ku muganga mukuru mu bitaro bya kaminuza, abakozi bo kwa muganga, mu bitaro ndetse no mu bigo nderabuzima.

Abandi ni abafite indwara karande bakunda no kwivuriza muri ibyo bigo nderabuzima ndetse n’ibitaro ku buryo kubamenya na bo byoroshye. Ikindi kiciro ni icy’abantu bakuru bafite hejuru y’imyaka y’amavuko 65 bafite indwara karande cyangwa batazifite nkuko byatangajwe na Minisiteri yUbuzima.

Biteganyijwe ko abakingiwe uyu munsi bose bazahabwa doze ya kabiri y’urukingo nyuma y’ibyumweru bine, kugira ngo babe bafite ubwirinzi bwuzuye bujyanye n’ubushobozi bw’urukingo bahawe.

Minisiteri y’Ubuzima kandi yibukije abantu bose bahawe urukingo ko bidakuraho gukomeza kubahiriza amabwiriza yo kwirinda ikwirakwira rya COVID-19, arimo kwambara neza agapfukamunwa, kutegerana hakubahiriza intera, gukaraba intoki n’ammazi meza n’isabune kenshi cyangwa alukolo yabugenewe.

Abaturage bo mu Murenge wa Ruheru na bo bishimiye ko bahawe urukingo rwa COVID-19 (Foto: Akarere ka Nyaruguru)

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.