20°C , Partly cloudy | Kigali-Rwanda

Nyarugenge: Urubyiruko rushimirwa kwitabira ku bwinshi ibikorwa by’icyunamo

Yanditswe na MUTUNGIREHE SAMUEL

Ku ya 17-04-2018 saa 08:12:53

Urubyiruko rwo mu karere ka Nyarugenge, by’umwihariko mu murenge wa Kimisagara, rushimirwa uruhare rukomeye rugaragara mu bikorwa byari biteganyijwe mu cyumweru k’icyunamo cyo kwibuka ku nshuro ya 24 Jenoside yakorewe Abatutsi mu 1994, narwo rugashimangira ko kwibuka bifasha kumenya amateka ya Jenoside kugira ngo itazongera kuba ukundi.

Umunyamabanga Nshingwabikorwa w’Umurenge wa Kimisagara, Havuguziga Charles, avuga ko muri rusange abaturage bitabira ibiganiro ku buryo bushimishije by’umwihariko urubyiruko.

Aba ni bamwe mu rubyiruko rwo mu murenge wa Kimisagara, basoma amazina y’Abatutsi bishwe muri Jenoside yakorewe Abatutsi mu 1994 muri uwo murenge (Foto Mutungirehe S.)

Ati “By’umwihariko urubyiruko, rwitabiriye ku buryo budasanzwe, mu biganiro no gutanga ibitekerezo no kubaza ibibazo wasangaga urubyiruko ruhagaze neza muri biganiro.

Icyo dusaba urubyiruko ni kimwe, ni uko rukomeza gutanga umusanzu warwo mu kwitabira ibiganiro, bamagana abapfobya n’abahakana Jenoside bakoresheje uburyo bunyuranye. Urubyiruko uyu munsi ni ba bandi rushingiye ku ikoranabuhanga (ICT Based), bakurikira imbuga nkoranyambaga, nibadufashe bagaragaze ukuri kw’iki gihugu, mu byo basoma ibyo basanga atari ukuri bagaragaze ukuri kwabyo.”

Iyikunda Gidon, ni umwe mu rubyiruko rwo muri uwo murenge ari naho yarokokeye, Jenoside yabaye afite imyaka ibiri, avuga ko iyo yumvise amateka yayo yumva ko urubyiruko ari rwo ahanini rwitabiriye gukora Jenoside biciye mu bantu bakuru baboheje bo muri Leta y’icyo gihe.

Ati “Icyo nshimira Imana ni ku bw’iyi Leta dufite ubu; irashishikariza urubyiruko ibintu byinshi, ni twebwe mbaraga z’igihugu kandi zubaka, ni yo mpamvu ibyabaye ntatekereza ko byakongera kuba ukundi kuko ntekereje aho urubyiruko tugeze, uko tubanye nta kuvuga iby’amoko, twabaye Abanyarwanda.”

Ahamya ko impamvu byaba ari ikibazo ku rubyiruko rumwe rutakitabira ibiganiro mu cyunamo bishobora kuba bituruka ku myumvire y’ababyeyi babo.

Ati “Hari ababyeyi bafite ya myumvire ya kera, ugasanga iyo myumvire barimo barayishyira mu bana babo. Icyo nabwira abo bantu ni uko barimo bica abana mu mutwe, ibyabaye twabonye ingaruka zabyo; abo babyeyi  bagifite iyo myumvire bashyira muri abo bana nababwiza ukuri ko bakababwiye ibibi byabaye bakanabereka ibyiza turimo kugenda tugeraho kugira ngo barusheho no kwitabira ibiganiro kugira ngo tumenye ibyabaye bityo turusheho kubikumira bitazongera kuba.

Nk’urubyiruko dukwiye kujijuka, dukwiye kumva Leta y’Ubumwe bw’Abanyarwanda ibyo idusaba; niba itubwira ngo tube umwe, twifatanye muri byose kugira ngo tubashe guteza imbere igihugu cyacu.”

Yakomeje avuga ko n’abatarahigwaga mu gihe cya Jenoside yakorewe Abatutsi, cyane abatarayikoze na bo byaba byiza bagize uruhare mu kuvuga amateka no gutanga ubuhamya bw’ibyabaye, uko babibonye n’aho imibiri y’Abatutsi bishwe muri Jenoside iherereye kugira ngo bashyingurwe mu cyubahiro.

Umunyamabanga Nshingabikorwa w’Umurenge wa Kimisagara, yagaragaje ko nubwo muri rusange byagenze gutyo ariko nko mu gihe cyo gutangiza icyunamo hari umuntu umwe wagaragaje ingengabitekerezo ya Jenoside ariko na we yashyikirijwe inzego zibishinzwe kugira ngo zikore iperereza.

TANGA IGITEKEREZO

Leave a Reply

Be the First to Comment!

avatar