18°C , Intermittent clouds | Kigali-Rwanda

Nyarugenge: Hakajijwe ingamba ku kibazo cy’abajya kwivuza nta mituweli

Yanditswe na Mutungirehe Samuel

Ku ya 12-07-2019 saa 15:20:17
Nzaramba Kayisime Umuyobozi w'Akarere ka Nyarugenge, avuga ko ubukangurambaga nk'abayobozi bashyiramo imbaraga ari bwo bwatumye bagera ku 100% mu kwishyura mituweri

Bamwe mu bayobora ibitaro bitandukanye bikorera mu Mujyi wa Kigali, birimo n’ibitaro by’ikitegererezo bya Kaminuza bya Kigali (CHUK) bagaragaza ko bagiterwa igihombo n’abantu bavura batazwi aho baba nta n’ubwishingizi bafite bikagora ibitaro mu mitangire ya serivisi zifuzwa.

Akarere ka Nyarugenge gafite igice kinini cya Nyabugogo gikorerwamo imirimo itanditse yaba ubwikorezi bukorwa n’abantu n’indi mirimo itari mu makoperative, kavuga ko hagiye gushaka uko begera abo bantu bakabashishikariza gutanga mituweri.

Umuyobozi w’Akarere ka Nyarugenge, Nzaramba Kayisime, yabwiye Imvaho Nshya ko ubusanzwe Leta yishyurira ubwisungane mu kwivuza abari ku kiciro cya mbere cy’Ubudehe, abandi kugera mu kiciro cya kabiri, icya gatatu n’icya kane bakiyishyurira ariko umwanya mwiza akarere gaheruka kwegukana mu kwishyura ubwisungane mu kwivuza bwa mituweri utaturutse mu kubishyurira ahubwo ari umusaruro w’ubukangurambaga bwakozwe mu mwaka ushize wa 2018/2019.

Ku kijyanye n’abakora imwe mu mirimo itanditse kandi baba batameyekanye aho batuye bitewe no kwimukira mu midugudu ntibibaruze mu buyobozi, Umuyobozi w’Akarere Nzaramba yavuze ko hari ubundi buryo bwo kwifashisha mu kubageraho kandi bizatuma n’abatarabarurwa ko batuye muri ako karere bagerwaho, bikozwe n’abayobozi mu nzego z’ibanze.

Ati: “Birumvikana ntiwajya kwegera abantu utazi aho baherereye, tuzagenda twifashisha amasibo; ni ingo 10, 15, zituye hamwe, bishyira hamwe bakifasha mu kwikemurira ibibazo birimo no kwishyura mituweri.

Tubigisha ko nubwo utahita umunsi umwe utanga amafaranga 3000 ya mituweri ushobora kwizigamira igicero kimwe k’ijana (100) bikagufasha kugura mituweri mu gihe runaka kuko icya mbere tubabwira ari uko ugomba kwibuka gukunda ubuzima bwawe, ibyo ukora utabuzigamiye nta cyo byaba bimaze.”

Akarere ka Nyarugenge gaherutse kwegukana umwanya wa mbere mu kwishyura ubwisungane mu kwivuza bwa mutuweri, 100%, umwaka ushize wa 2018/2019, kakaba kavuga ko gahunda ari iyo kuguma kuri uwo mwanya no muri uyu mwaka utangiye wa mituweri 2019/2020.

Tanga Igitekerezo

Email yanyu ntigaragazwa ku rubuga. Amazina na Email ni ngombwa.