17°C , Mostly cloudy | Kigali-Rwanda
Aba ni abitabiriye gahunda y'imurikabikorwa yateguwe na DJAF ya Nyarugenge (Foto G.Gentil )

Nyarugenge: DJAF yateguye imurikabikorwa rizamara icyumweru

Yanditswe na KAYIRA ETIENNE

Ku ya 12-06-2019 saa 15:18:03

Ihuriro ry’Abafatanyabikorwa b’Akarere ka Nyarugenge DJAF, ryateguye imurikabikorwa rizamara icyumweru cyose rigamije kugaragariza Abanyarwanda no kubasobanurira ibyo abafatanyabikorwa b’akarere kabo bakora hagamijwe iterambere y’umuturage.

Mu kiganiro kihariye yagiranye n’Imvaho Nshya ejo hashize ku wa Kabiri tariki 11 Kamena 2019, Crescence Mukantabana, Umuyobozi wungirije w’Ihuriro ry’Abafatanyabikorwa b’Akarere ka Nyarugenge yatangaje ko ari igikorwa  ngarukamwaka bafite mu mihigo kuva DJAF yashingwa.

Ati: “Ni iminsi abafatanyabikorwa batandukanye b’Akarere ka Nyarugenge bamurika ibyo bakora, banabisobanurira abaturage dore ko ari bo twese dukorera hagamijwe kurushaho kumuteza imbere. Abaturage bafite uburenganzira bwo gusobanukirwa ibibakorerwa ndetse bakamenya n’aho ibigo byaje kumurika bikorera na serivisi bibagomba.”

Mukantabana yakomeje asobanurira Imvaho Nshya ko, gahunda y’imurikabikorwa igitangira mu Karere ka Nyarugenge mu myaka ishize, ngo bahereye ku munsi umwe, bukeye babikora iminsi ibiri. Ati “ Kubera ko abafatanyabikorwa babonye ko ibyo bakora na serivisi batanga bikunzwe cyane n’abaturage, byabaye ngombwa ko basaba Ubuyobozi bw’Ihuriro ryabo DJAF,  kongera iminsi ikagera nibura kuri 7 kugira ngo bamurike ariko banagurishe ibyo bakora”.

Muri iryo murikabikorwa ry’abafatanyabikorwa ribera i Nyarugenge guhera ku wa Mbere w’iki cyumweru, hagaragaramo ibikorerwa mu Rwanda “Made in Rwanda”, ubona bikunzwe cyane n’abanyamahanga batuye mu gihugu n’abagisura.

Umuhoza Aline, umukobwa w’imyaka 22 y’amavuko udoda amakanzu mu bitenge akanataka ku mipira amabara anyuranye harimo n’izina Rwanda, yatangaje ko imurika bategurirwa na DJAF ngo ribinjiriza cyane kuko babona ababagurira ibyo bakorera mu Rwanda. Mu kiganiro n’umunyamakuru w’Imvaho Nshya yagize ati: “Ngira ngo na we wabirebaga uburyo bariya banyamahanga banguriye imipira n’udukapu abagore bitwaza twikoreye mu bintu bitandukanye by’ino aha iwacu.”

Nyinawumuntu Elizabeti ucuruza imbuto zitandukanye asubiza ikibazo niba babasha gucuruza ibyo bazanye, we yagize ati “Icyo dusaba DJAF ni uko yazatwongera iminsi yo kumurika ibikorwa byacu, nibura bikava ku minsi irindwi tukabikora mu gihe k’ibyumweru bibiri. Impamvu ni ukugira ngo tubashe kwinjiza amafaranga menshi. Nubwo ge ngeze aha mu masaha atandatu y’amanywa, ariko maze kugurisha imbuto nyinshi kuko aha muri Nyarugenge hari abantu b’abasirimu bazi agaciro k’imbuto kandi ubona bagura bazishimiye.”

Mu bafatanyabikorwa batangiye kumurika ibikorwa no kugaragariza abaturage serivisi batanga, hagwiriyemo abanyabugeni n’abanyabukorikori. Harimo kandi ibigo bitanga serivisi z’ubuzima nka RSSB, abasuzuma indwara z’amaso n’amenyo kandi ku buntu. Harimo abakozi basobanurira Abanyarwanda iby’igishushanyombonera cy’Umujyi wa Kigali n’ibindi bigo bikora imirimo itandukanye muri Nyarugenge”.

Icyashimishije abamurika ibikorwa ni uko guhera ku munsi wa mbere abaturage bari batangiye kubagana kandi bakinjira buri hantu basobanuza uko bakora ibyo bazanye kumurika. Ibyo ni byo bijyanye n’intego za DJAF nk’uko byasobanuwe na Mukantabana ko, ngo ari igihe abafatanyabikorwa barimo sosiyete sivile, abikorera n’ibigo bikorera muri Nyarugenge bagomba gusobanurira abaturage ibyo bakora.

Aba ni abitabiriye gahunda y’imurikabikorwa yateguwe na DJAF ya Nyarugenge (Foto G.Gentil )

TANGA IGITEKEREZO

Leave a Reply

Your email address will not be published. Required fields are marked *