22°C , Partly sunny | Kigali-Rwanda

Nyarugenge: Basobanuriwe uko wakizigama 2.000 ukazajya uhembwa 90 000 muri Ejo Heza

Yanditswe na Mutungirehe Samuel

Ku ya 05-10-2019 saa 07:09:59
Niyonzima Jean Damascene asobanurira abagore bahagarariye abandi muri Nyarugenge uko bakizigamira no gukomeza kubishishikariza abandi (Foto Samuel M)

Abagore bagize inama y’igihugu y’abagore (CNF) ku rwego rw’akarere ka Nyarugenge, mu Mujyi wa Kigali, basobanuriwe ibyiza biri muri gahunda ya Ejo Heza, mu mibare berekwa uko uwizigamye amafaranga make atangirirwaho 2000 Frw agahera afite imyaka 16 y’amavuko akageza ku myaka y’izabukuru 55 agatangira kujya afata amafaranga 90.000 buri kwezi kugeza ashaje.

Ni mu kiganiro bahawe n’umukozi w’akarere ka Nyarugenge ushinzwe iterambere ry’ishoramari na serivisi z’imari, Niyonzima Jean Damascène, mu nteko rusange ya CNF aho bamurikaga ibyo bakoze mu ngengo y’imari y’umwaka wa 2018/2019 no kugaragaza imihigo ya 2019/2020 no kuyisinya imbere y’umuyobozi w’akarere.

Niyonzima yabanje kwibutsa abi ba mutima w’urugo bagahagariye abandi ko Ejo Heza ari gahunda yagiyeho kugira ngo ifashe abanyarwanda kwizigamira baba abakorera imishahara n’abatayikorera, cyane ko abo byabagoraga mbere gushaka uko bizigamira byizewe.

Yavuze ko Gahunda ya Ejo Heza igena ko umuntu wo mu kiciro cya mbere n’icya kabiri cy’ubudehe, uzizigamira nibura amafaranga 2.000 ku kwezi ahereye ku myaka 16 y’amavuko ukahera ku myaka 55, abikoze imyaka 39 yose, azajya ahabwa ibihumbi 90 (90.000) ku kwezi nk’ay’izabukuru (pension).

Akomeza abereka ko uri mu kiciro cya gatatu uzizigama ahereye ku myaka 30 y’amavuko akizigama 2.000 buri kwezi nawe azajya ahembwa amafaranga 18.000 buri kwezi nk’umushahara w’izabukuru.

Ati “Ni make kuko wizigamye make 2.000 buri kwezi, noneho bara nawe uramutse ukubye nka kabiri cyangwa gatatu ubwo bwizigame amafaranga wazajya ubuhabwa. Ni ukuvuga ngo waba ugeze hafi bya bindi 18 ubikubye gatanu.

Ku bari mu kiciro cya kane bo, muri iyi gahunda babara ko yakizigama nibura amafaranga 72.000 buri mwaka.

Ku bizigamye bose, gahunda ya Ejo Heza ibagenera ibyo bagenerwa mu myaka itatu ya mbere kuva gahunda itangiye bituma barushaho kwitabira.

Mukamurenzi Jeannette yabajije aho umuntu wizigamye ashobora kubariza ibijyanye n’ingwate mu gihe akeneye kugira igikorwa akora gisaba kuguza kandi afite ubwo bwizigame bumwemerera inguzanyo.

Yasubijwe ko yemerewe kwaka inguzanyo, cyangwa akaba yayitabaza mu gihe runaka bibaye ngombwa ariko nabyo bikagira igihe gisabwa kuba umazemo n’ayo wabona bitewe n’ubwizigame wakoze.

Ibarura rusange ryo mu 2012 ryasanze abanyarwanda 6% ari bo bizigamira iza bukuru nabwo ari bamwe bakorera umushahara w’ukwezi. Rirongera risanga mu myaka 20 abakuze bazaba bikubye kabiri, barenze miliyoni.

Umwanditsi:

Mutungirehe Samuel

Tanga Igitekerezo

Email yanyu ntigaragazwa ku rubuga. Amazina na Email ni ngombwa.