25°C , Mostly cloudy | Kigali-Rwanda

Nyarugenge: Abaturage basabwe kwirinda ‘Coronavirus’

Yanditswe na Kayitare Jean Paul

Ku ya 06-03-2020 saa 15:17:11
Abaturage ba Nyarugenge basabwe kwirinda Koronavirusi bagira isuku (Foto Kayitare J.Paul)

Ibikorwa by’ubukangurambaga ku isuku n’Umutekano byakomereje mu murenge wa Nyarugenge muri Gare ahazwi nka Down Town mu karere ka Nyarugenge mu Mujyi wa Kigali.

Ni igikorwa cyabaye ku munsi kuri uyu wa Gatanu tariki 06 Werurwe 2020, ubuyobozi bwa Nyarugenge bukaba bwasabye abaturage kwirinda icyorezo cya Koronavirusi bihatira kugira isuku.

Ubukangurambaga bwo kwirinda Koronavirusi bwatangijwe n’urugendo rwavuye muri Car Free Zone rwerekeza Down Town, aho abaturage bagiye bakangurirwa kugira isuku, bakaraba intoki mu buryo bwo kwirinda indwara zirimo na Koronavirusi nubwo itaragera mu Rwanda.

Nshutiraguma Esperance, Umuyobozi Nshingwabikorwa wungirije w’Akarere ka Nyarugenge avuga ko ubukangurambaga bugamije gukangurira abantu kugira isuku hagamijwe kwirinda icyorezo cya Koronavirusi.

Yagize ati “Hariho icyorezo cya Koronavirusi gihangayikishije Isi, ari cyo cyatumye duhuriza hamwe abaturage kugira ngo tubabwire uburyo bwo kwirinda iki cyorezo. Nk’uko bizwi, Koronavirusi ni icyorezo gihangayikishije Isi yose n’igihugu cy’u Rwanda muri rusange”.

Akomeza avuga ko Akarere ka Nyarugenge kakoreye ubukangurambaga Down Town ahahurira abaturage benshi kugira ngo babakangurire kwirinda ariko ngo biri no mu murongo Minisitiri w’Intebe yatanze wo kwirinda icyorezo cya Koronavirusi.

Yongeraho ati “Ubukangurambaga buzakomereza mu mirenge yose igize akarere ka Nyarugenge kugeza ku rwego rw’imidugudu, ni igikorwa tuzakomeza. Mu nzu z’ubucuruzi turabasaba gushyiraho kandagira ukarabe cyangwa gukoresha uburyo bwa alukoro (Alcohol) bwo guhanagura intoki”.

Mukamana Allen witabiriye ubukangurambaga bwo kurwanya icyorezo cya Koronavirusi, avuga ko icyo basabwa kitagoye ku buryo buri wese yagombye kubyumva bityo ko gukaraba intoki bidasaba ikintu kinini.

Ati “Nishimiye inyigisho twahawe n’abayobozi bacu ariko si n’ikintu kigoye kuko gukaraba intoki biroroshye ahubwo ni ikintu twagombye kugira umuco no kuramukanya kubyirinda mu gihe hakiriho iyi ndwara na byo twabyirinda nk’uko twagishijwe mu gihe cyose Koronavirusi itaragera mu Rwanda”.

Ngango JMV ucururiza mu Down Town avuga ko agiye kugerageza kudasuhuzanya no kwitabira gukaraba intoki mu gihe agiye kwinjira mu nyubako iyo ari yo yose kugira ngo ashobore kwirinda icyorezo cya Koronavirusi.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.