19°C , Partly cloudy | Kigali-Rwanda
Nyarugabo Moise (16), ufite inzozi zo kuzakina hanze y'u Rwanda

Nyarugabo afite inzozi zo kuzakina hanze y’u Rwanda  

Yanditswe na BIZIMANA ERIC

Ku ya 02-09-2018 saa 08:19:34

Nyarugabo Moise ni rutahizamu ukiri muto ubarizwa mu ishuri ry’umupira w’amaguru rya Heroes FC i Bugesera. Yumvikanye cyane mu minsi ishize ubwo ikipe y’igihugu y’umupira w’amaguru y’abatarengeje imyaka 17 yakinaga imikino yo gushaka itike y’imikino y’Afurika y’abatarengeje imyaka 17 “CAN U-17”.

Nyarugabo Moise (16), ufite inzozi zo kuzakina hanze y’u Rwanda

Uyu mukinnyi ukiri muto   nyuma yo gutsindira Amavubi ibitego bine muri iyi mikino yabereye muri Tanzania agafasha ikipe y’igihugu kuza ku mwanya wa kane, Imvaho Nshya yaganiriye na we   agira byinshi avuga ku  buzima bwe muri rusange  ndetse n’intego afite mu  mupira w’amaguru.

Imhaho Nshya (IN):  Tuguhaye ikaze

Nyarugabo: Murakoze

IN: Nyarugabo yavutse ryari, ni muntu ki?

Nyarugabo: Nitwa Nyarugabo Moise, ndi umuhungu wa kabiri mu muryango w’abana batatu nkaba umwana wa kabiri wa Rukundo Edison na Nyirakandi Theresia.

Navukiye i Rubavu mu murenge wa Mudende, tariki 03 Kamena 2002.

Amashuri abanza nayigiye iwacu i Mudende, ubu ngeze mu mwaka wa kabiri w’amashuri yisumbuye muri GS Kamabuye i Mayange mu Bugesera.

IN: Izina Nyarugabo bakubwiye ko barikwitiye iki?

Nyarugabo: Papa yabaye umusirikare muri RDC, hari Minisitiri muri Kongo  witwaga Nyarugabo bari inshuti  cyane, nange mvutse anyitirira Nyarugabo, ariko nta bwo nigeze mubaza cyane icyo bisobanuye.

IN: Watangiye  gukina umupira gute?

Nyarugabo: Nawutangiye kera ndi mu mashuri abanza. Nigeze kuza kwa marume i Kigali, nkina mu ishuri ry’abana i Kanombe, mpakina imyaka 3, iyi Centre yayoborwaga na Perezida wa Heroes ariko atarashinga Academy nyuma bashinga Academy maze imyaka ibiri, ubwo yose hamwe ni imyaka itanu.

IN:  Watekereje gute kuza muri Kigali?

Nyarugabo: Nge nabwiye iwacu ko i Rubavu biba bigoye gukina umupira, barambwira bati nta cyo jya kwa nyokorome hari igihe wazahagirira amahirwe, ndaza nyine ngize amahirwe njya muri iryo shuri.

Nge nakundaga gukina n’ubu ndabikunda nubwo icyo nshaka ntarakigeraho.

I.N: Ni iki wifuza kugeraho?

Nyarugabo: Urwego nshaka kugeraho ni urwo gushimisha ababyeyi nkakina mu makipe akomeye. Abenshi twumva inzozi zacu ari ugukina muri Rayon Sports na APR FC  ariko inzozi zange mfite nta bwo ari ugukina hano mu Rwanda. Ni ugusenga cyane Imana ikamfasha nanahakinnye nahakina igihe gito nkahita njya hanze.

IN: Ese ubwo ni  nkahe wumva urota gukina?

Nyarugabo : Nge numva nifuza gukina mu Bufaransa, mu Bubiligi, ahantu nk’aho.

IN: Ese utangira gukina wakinaga nka rutahizamu?

Nyarugabo: Ntangira nakinaga hagati, nta muvuduko nari mfite, kubera ko nta myitozo myinshi nari mfite. Ngeze aho njya kuri karindwi (imbere ku ruhande rw’iburyo), nyuma umutoza arampindura anjyana ku icumi, abona ndakina neza, nange ndamubwira nti nta kibazo imyanya yose nayikina. Ubundi mu mupira umuntu yiyemeza ko umwanya wose wawukina.

Navuye  ku 10 banjyana ku 9 ngeze mu Mavubi mu mikino ya gicuti nkatsinda, tugeze Tanzania mba rutahizamu uko. Imana yangiriye neza, kuko hari ibyo nakoze nubwo atari byiza cyane, ni ugusenga cyane nkazakora ibyiza birenzeho.

IN: Mu mikino yabereye Tanzania  watsinze ibitego bine, abantu bose batangira kukwibazaho,  wowe  wabyakiraga  gute?

Nyarugabo: Nge nta bwo nabaga mbizi. Muri Tanzania ntitwamenyaga ibyo bavuga. Gusa abatoza batubwiraga ko Abanyarwanda badukurikirana, tukumva ni ibisanzwe. Nta bwo nari nzi ko banamvuga pe. Icyantunguye ni uburyo nageze ku kibuga k’indege nkumva abantu barimo kunshaka, babaririza ngo Moise Moise arihe? Naribazaga nti ninge bari guhamagara cyangwa? Byarantangaje, buri wese ambwira ngo shyiramo imbaraga, nange nkabasubiza ngo ni Imana yabikoze.

IN: Hari abana batangira bazi umupira, bavugwa bagahita bahindura imyitwarire bikarangira bibagiranye, ese wowe  ntushobora kwisanga muri iki kiciro?

Nyarugabo: Kumvuga nge byampaye imbaraga zo gukora cyane kugira ngo noneho nkore ibirenzeho. Nabonye ko nkoresheje imbaraga zirenze, nazajya njya ahantu bankeneye nkitwara neza.

IN: Ni nde mukinnyi ufatiraho urugero, ukumva wamera nkawe?

Nyarugabo: Mu Rwanda nakundaga Karekezi Olivier ariko ntumbaze impamvu namukundaga.

Nakuze mwumva, narebye imikino mike ye arimo gusoza umupira, ariko ukuntu nakuze mwumva, numvaga ari wa muntu ukunda igihugu kandi ukunda gukora. Ibyo Karekezi yakoze nta bwo ari byo nshaka gukora. Nshaka gukora ibirenzeho.

IN: Haba hari igihe wavugaga uti ngiye kureka umupira?

Nyarugabo: Nkiri muto nigeze kuvunika akagombambari (Cheville). Mama twabanaga  cyane arambwira ngo wazaretse gukina umupira; nibuka ko ntanagiye kwa muganga ahubwo banyunze. Namaze amezi atandatu ariko maze gukira nsubiramo, Mama akambuza nge nkamubwira ngo nta bwo nashobora kureka umupira. Byageze aho Mama arabikunda na Papa aza kubikunda kugeza ubu, bibagirwa ya mvune. Ubu ababyeyi bange baranshyigikiye. Nubwo abantu bakina umupira hari igihe baba batari mu buzima bwiza ariko iyo umubyeyi abonye umwana agize amahirwe akabona abamufasha baramushyigikira.

IN: Muri Heroes ubayeho ute? wumva uzahaba kugeza ryari?

Nyarugabo: Ubuzima bwaha  ni nko mu rugo. Dukina umupira bakanatwibutsa kwiga. Nta bwo wazana amanota ari munsi ya mirongo itanu, ntibibaho.

Ibindi ni ikipe ibizi ariko kuva twaragiye mu kiciro cya kabiri hari igihe bazanshyiramo. Nta bwo ndabimenya.

IN: Ni ubuhe butumwa uha abana mungana  bakina umupira  mu byiciro by’abakiri bato?

Nyarugabo: Abana tungana bakina dushyiremo imbaraga kandi dukunde umupira. Iyo ukunda umupira ukanasenga Imana ibigufashamo. Ntibacike intege, ntawe uba uzi amahirwe y’umuntu aho ari. Ushobora gukina muri Centre ukabura ikipe ariko Imana yateganyije ukabona ikipe iraje ugeze ku myaka 18 kandi utari ubyiteze. Ikindi ni ukubaha abayobozi, bagenzi bawe n’abatoza, n’undi uri hanze waba umuruta cyangwa akuruta.

Icyo nzi umupira ni ikinyabupfura. Ndanashaka guhagararira igihugu cyange neza byanze  bikunze. Ni yo gahunda mfite. Ngize amahirwe nkajya muri U-20 byaba byiza kurushaho. Ngomba gukora cyane.

IN: Tubifurije amahirwe masa.

Nyarugabo: Murakoze.

 

 

 

 

 

 

 

 

 

 

 

 

TANGA IGITEKEREZO

One Comment on “Nyarugabo afite inzozi zo kuzakina hanze y’u Rwanda  ”

Leave a Reply

Your email address will not be published. Required fields are marked *