17°C , Partly cloudy | Kigali-Rwanda

Nyanza: Ubutwari mu kurinda ibyagezweho, gusigasira umuco n’amateka

Yanditswe na Ntawitonda Jean Claude

Ku ya 01-02-2020 saa 07:05:59
Ingoro y’Umwami iri mu Rukari ni hamwe mu hagaragaza umurage w'amateka y'u Rwanda

Akarere ka Nyanza, gafatwa nk’igicumbi cy’Umuco n’Amateka, karizihiza Umunsi w’Intwari z’u Rwanda kuri uyu wa 1 Gashyantare 2020 kishimira intambwe yatewe mu gusigasira iterambere ryagezweho rishyigikiwe n’umusingi w’abakurambere b’intwari bitanze batizigama, bagahanga u Rwanda rukavamo ubukombe.

Umuyobozi w’Akarere ka Nyanza, Ntazinda Erasme yatangarije Imvaho Nshya ko uyu munsi ari uwo kuzirikana ubutwari bwaranze Abanyarwanda batandukanye basize urugero rwiza rwo gukunda Igihugu.

Yagize ati: «Uyu munsi ni umunsi ukomeye twibuka ko hari abatanze ubuzima bwabo ngo tubeho. Ni umunsi wo kutirebaho ngo umuntu aharanire inyungu ze bwite ahubwo agaharanira inyungu rusange z’Abanyarwanda. Ni umunsi wo gukunda Igihugu no kukitangira. »

Yakomeje avuga kuri gahunda zateguwe n’Akarere ka Nyanza zirimo gufasha urubyiruko kwiga amateka y’Intwari z’u Rwanda. Ati: «Urubyiruko rwasuye ahatabarijwe Intwari y’Imena, Umwami Mutara III Rudahigwa, ngo rumenye amateka ye n’icyo rwamwigiraho. Nk’uko i Nyanza ari ku gicumbi cy’umuco; ubutwari na bwo bukwiye kuba umuco kuri buri wese.»

Ashimira ingabo zahoze ari iza FPR-Inkotanyi zabohoye u Rwanda zikongera kugaragaza no kugarura umuco w’ubutwari zihagarika Jenoside yakorewe Abatutsi. Ati: «By’umwihariko ndashimira Nyakubahwa Perezida wa Repubulika Paul Kagame mfata nk’intwari kuko ibikorwa yakoze kandi akomeje gukorera u Rwanda n’Abanyarwanda ari iby’ubutwari.»

Umuco n’amateka y’u Rwanda akomeje gusurwa na benshi

Akarere ka Nyanza gasurwa n’abantu benshi bakurikiye amateka n’Umuco Nyarwanda. Mu karere ka Nyanza ni ho usanga ibimenyetso bitandukanye byaranze amateka y’u Rwanda kuva mbere y’umwaduko w’abazungu kugeza nyuma y’ubukoroni.

Gasurwa na ba mukerarugendo basaga ibihumbi 70 buri mwaka, akaba ari bo bazwi banditswe mu bitabo by’ingoro z’umurage w’u Rwanda.

Ahagaragaza umwihariko wa Nyanza nk’ahantu hakorerwa ubukerarugendo bushingiye ku muco n’amateka ni ku Ngoro y’Umurage wo Kwigira ya Rwesero (Kwigira Museum of Rwesero) iherereye mu Murenge  Busasamana, Akagari ka Rwesero, yubatswe ahagana mu mwaka wa 1957 iteganyirizwa kuba Ingoro y’Umwami Mutara III Rudahigwa, waje gutanga atayimukiyemo.

Hari kandi n’Ingoro y’Umwami iri mu Rukari iherereye Murenge wa Busasamana, Akagari ka Rwesero, ku Musozi wa Mwima mu birometero bibiri uvuye mu Mujyi wa Nyanza. Ingoro y’Umwami, Urukari yahinduwemo inzu ndagamurage isurwa cyane na ba Mukerarugendo batari bake baba bifuza kumenya amateka y’Ubwami mu Rwanda.  Mu gusura Urukari hasurwa Kambere, yatunganijwe nk’uko Ingoro y’Umwami yari iteye. Mu rukari kandi tuhasanga ingoro y’Umwami yubatswe mu buryo bugezweho ari na ho Mutara III Rudahigwa yabaga.

Ingoro y’Umwami, Urukari yahinduwemo inzu ndagamurage isurwa cyane naba Mukerarugendo

Ikindi gisurwa cyane ni Icyuzi cya Nyamagana giherereye mu Kagari ka Nyanza Umurenge wa Busasamana cyubatswe n’Umwami Mutara III Rudahigwa, avuye mu rugendo yakoreye mu Bubiligi mu 1949. Icyo cyuzi cyongerera ubwiza Umujyi wa Nyanza, nk’aharasukirwa usohotse mu mihanda myiza iteyeho ibiti byongera ubwiza n’amahumbezi mu Mujyi wa Nyanza.

Icyuzi cya Nyamagana

Hari kandi n’ibigega bibika imyaka (Food Store) byitiriwe Umwami MUTARA III Rudahigwa byubatswe mu kagari ka Kavumu ku nkengero z’Umuhanda Kigali- Huye; bikaba ari bimwe mu nyubako z’Umwami Mutara III Rudahigwa abakerarugendo bashobora gusura mu Karere ka Nyanza. Umwami Mutara III Rudahigwa yubakishije ibi bigega mu rwego rwo guhangana n’ibura ry’ibiribwa ryatumaga bakunda guhura n’ikibazo cy’inzara muri icyo gihe.

Ibigega by’Umwami MUTARA III Rudahigwa

Mu bindi bisurwa cyane hari Kiriziya ya Christ Roi-Nyanza, n’Inkiko z’Umwami za Nyanza (Nyanza Royal Courts 1&2) yatabarijwemo Umwami Mutara III Rudahigwa, ndetse n’Inzira z’Ubukerarugendo gakondo zahawe icyangombwa cyo mu rwego rwa mbere.

Izo nzira uko ari eshatu zitwa « Nyanza Cultural Trails » ziratandukanye ariko ziruzuzanya.

Iya mbere yitwa ‘Royal Trail’ ifite ibirometero 10 izenguruka Umujyi wa Nyanza igakikiza Ingoro ebyiri zihari ari zo Ingoro y’Abami mu Rukari ahahoze hatuye Umwami Mutara III Rudahigwa n’Ingoro y’Umurage wo kwigira iherereye ku Rwesero.

Ingoro y’Umurage wo kwigira ya Rwesero mu Karere ka Nyanza

Iyo nzira kandi inyura ahari ibindi byiza biranga amateka y’u Rwanda mu Karere ka Nyanza nk’Umusezero w’Abami i Mwima hatabarijwe Umwami Mutara III Rudahigwa tariki ya 28 Nyakanga 1959; Umwami Kigeli V wahatabarijwe ku ya 15 Mutarama 2017 ndetse n’Umwamikazi Gicanda Rosalie wahatabarijwe tariki ya 20 Mata 1995.

Inzira ya kabiri yitwa ‘Big View’ y’ibirometero umunani ituruka mu Mujyi wa Nyanza ikagera ku musozi wa Remera. Iyo uri kuri uwo musozi wa Remera uba ushobora kureba ku ntera y’umurambararo wa kirometero 50.

Ubasha kureba imisozi itandukanye ikikije Nyanza ndetse waterera amaso kure ukaba wabona ibindi bice by’u Rwanda birimo n’ibirunga biri mu Majyaruguru y’Igihugu.

Inzira ya gatatu yitwa ‘Gatagara Trail’ y’ibiromtero 12 ituruka mu Mujyi wa Nyanza ikagenda ikikiza ibishanga ikagera i Gatagara ahari ibikorwa by’ububumbyi biteye imbere ndetse n’ikigo cyita ku bafite ubumuga.

Ntitwakwibagirwa kandi ahandi hantu nyaburanga hagaragaza umuco n’amateka harimo ku Mariba ya Mutende, i Mututu ku Biraro bya Rudahigwa n’ahandi hatandukanye.

Ubutwari mu gusigasira ibyagezweho

Insanganyamatsiko y’uyu mwaka iragira iti: «Ubutwari mu Banyarwanda, Agaciro kacu.» Ubuyobozi bw’Akarere ka Nyanza burasaba abaturage gukomeza gusigasira umuco w’ubutwari mu bikorwa bya buri munsi bigamije iterambere ariko banaharanira kubungabunga amateka n’iterambere ry’ibimaze kugerwaho.

Ubuzima

Urwego rw’ubuzima rugenda rutera imbere bikagaragazwa n’ibikorwa remezo ndetse n’ibipimo by’ubuzima. Mu Karere ka Nyanza, hari Ibitaro by’Akarere bya Nyanza byamaze kuvugururwa kugeza ubu. Hubatswe inzu ababyeyi babyariramo (maternity) ndetse n’isuzumirwamo ibizamini (Laboratory). Muri ibi bitaro kandi, hashyizwemo abaganga b’inzobere batatu barimo uw’abana (Pediatrician), uw’abagore (Gynecologist) ndetse n’uw’indwara zo mu mubiri (General Practitioner). Akarere ka Nyanza gafite  kandi ibitaro byihariye bivura indwara z’ubumuga bya HVP Gatagara (Specialized Hospital).

Ibigo nderabuzima byariyongereye bigera kuri 17, birimo 3 byubatswe vuba n’amavuriro y’ingoboka 30 (Health Posts), byose byubatswe  hagamijwe ko abaturage babona serivisi z’ubuvuzi hafi yabo kuri buri kagari.

Mu Karere ka Nyanza ibipimo by’ubuzima byarazamutse, aho kuboneza urubyaro byavuye kuri  43% bigera kuri 60%, umubare w’imfu z’ababyeyi bapfa babyara na wo waragabanutse aho umwaka ushize wose, nta mubyeyi wapfuye abyara mu Karere. Imfu z’abavuka na zo zavuye kuri 40/1000 zigera kuri 10.9/1000.

Umubare w’abarwayi bapfa bishwe na Marariya na wo waragabanutse n’imibare y’abarwayi bayo iragabanuka bitewe na gahunda zitandukanye zirimo gutanga inzitiramibu ziteye umuti, gutera imiti yica imibu mu nzu n’ibindi.

Ibyagezweho mu buhinzi n’ubworozi mu kwigira kw’abaturage

Ubuhinzi

Ubuhinzi bwateye imbere hahingwa ibihingwa byatoranyijwe kandi biberanye n’imiterere y’Akarere ari byo: Ibigori bihingwa ku butaka buhuje bugera kuri hegitari 3580, ibishyimbo bigahingwa kuri hegitari 28000, imyumbati kuri hegitari 6600, umuceri kuri hegitari 1040 na ho Soya igahingwa kuri hegitari 600.

Hongerewe ubwanikiro bugera kuri 17 ndetse hari kubakwa ubundi bushya 19. Hari ubuhunikiro 11 n’inzu zisarurirwamo imboga 8.

Ibihingwa ngengabukungu mu Karere ka Nyanza bigizwe n’ikawa ihinze ku buso bungana na hegitari 1159,52, urusenda ruri kuri hegitari 37,7, Iboberi kuri hegitari 147,3, Makadamiya kuri hegitari 20, imboga kuri hegitari 710, na ho imbuto haterwa ibiti bisaga ibihumbi 16 buri mwaka.  Urusenda, Iboberi na Makadamiya ni ibihingwa bishya byahaye abaturage akazi n’amafaranga.

Buri mwaka huhirwa hegitari 391 harimo ubuso buto bungana na hegitari 90 i musozi, no kuri hegitari 301 zuhirwa mu cyanya cyatunganyijwe cya Nyanza-23 (Rwabicuma) .

Ubworozi

Mu Karere ka Nyanza habarurwa inka zose hamwe 54,113. Muri gahunda ya Girinka, hamaze gutangwa inka 10,425 ndetse buri mwaka inka ibihumbi 5 ziterwa intanga.

Mu Karere ka Nyanza habarurwa litiro 39,860 z’amata zikamwa buri munsi, ayakirwa n’inganda ni litiro 22,500 ku munsi. Hari inganda nini ebyiri zifite ubuziranenge mpuzamahanga (Zirakamwameza Dairy, Nyanza Milk Industries) n’izindi nganda 3 ziri muri gahunda ya «Zamukana Ubuziranenge», hakaba kandi amakusanyirizo atatu n’amakoperative 3 akusanya amata.

Ku bijyanye n’iterambere ry’ibikorwa remezo, abaturage bagerwaho n’amazi meza bavuye kuri 49% mbere ya 2010 bagera kuri 76% mu 2020. Mu bwikorezi, mu mugi hubatswe imihanda ya kaburimbo ireshya na kirometero16.9 ivuye kuri kirometero 5.8 mbere ya 2010. Mbere ya 1994 ahari kirometero 15 gusa z’umuhanda Kigali-Akanyaru. Ingo zahawe amashanyarazi zageze kuri 37% zivuye ku 10%, na ho ingo zituye ku midugudu itunganye ziva kuri 26% zigera kuri 47%.

UBUREZI

Habaye iterambere mu byiciro binyuranye by’uburezi mu Karere;

  1. Amashuri y’inshuke ni 88 yigamo abanyeshuri 9978;
  2. Amashuri abanza ni 84 yigamo abanyeshuri 75139;
  3. Amashuri yisumbuye y’uburezi rusange ni 46 yigamo abanyeshuri 23401;
  4. Amashuri ya TVET ni 13 yigamo abanyeshuri 4256;
  5. Amasomero y’abakuze ni 120 yigamo abasaga 3800 buri mwaka;
  6. Amashuri makuru na Kaminuza ni 3 ari yo ILPD, Hanika Anglican Integrated Polytechnic na UNILAK ishami rya Nyanza.

Ibigo by’amashuri yisumbuye 25 biri muri gahunda ya SMART CLASSROOM. Buri kigo cyagenewe mudasobwa za Positivo 100 zikoreshwa n’abanyeshuri mu gihe cy’amasomo na mudasobwa 5 zikorehwa n’abarimu mu gutegura amasomo bigisha.

Ibyumba by’amashuri birongerwa buri mwaka. Muri uyu mwaka 2019-2020 hazubakwa ibyumba 140 harimo 34 bizubakwa ku ngengo y’imari isanzwe, n’ibyumba 106 bizubakwa ku nkunga ya Banki y’isi.

IMIYOBORERE myiza N’UBUTABERA

Mu miyoborere myiza n’ubutabera hakozwe byinshi birimo:

  1. Nk’Inteko z’abaturage, aho zagiye zikemura ibibazo bitabaye ngombwa ko abaturage bajya mu nkiko cyangwa mu buyobozi;
  2. Abunzi bagiye bakemura ibibazo byinshi;
  3. Kurangiza imanza zisanzwe byageze kuri 87%;
  4. Imanza z’imitungo zaciwe n’inkiko Gacaca zasagaga ibihumbi 58900 inyinshi zararangijwe, hasigaye izigera ku 3893 zirimo izifite ibibazo bituma zitarangizwa;
  5. Hakozwe ukwezi k’umuturage abaturage bagakemurirwa ibibazo ku bufatanye n’inzego zose;
  6. Hashyizwe imbaraga mu bikorwa by’ubumwe n’ubwiyunge no kubanisha Abanyarwanda, by’umwihariko urugendo rw’isanamitima ku bumwe n’ubwiyunge n’igikorwa cy’umuco Nyarwanda cya « Impundu Mubyeyi » aho imiryango itarabonye abayihemba ngo inategeshwe urugori kubera ingaruka za Jenoside igenda ibikorerwa n’abaturage bose.

VUP

Gahunda za VUP zifasha abaturage kwikura mu bukene mu nkingi zayo zose zirimo imirimo y’amaboko, imirimo yoroheje, inkunga y’ingoboka ndetse na serivisi z’imari, aho zafashije abaturage cyane. Abagenerwabikorwa b’izi gahunda ubu barenga ibihumbi 11 buri kwezi bavuye ku 8500 mu myaka ine ishize.

Inzira z’Ubukerarugendo gakondo zahawe icyangombwa cyo mu rwego rwa mbere

  1. Kuba nta ntwari y’Ingenzi iraboneka bigaragaza ubushishozi bwa CHENO – Bamporiki
  2. CHENO yasabye itangazamakuru gukoresha ikoranabuhanga mu kumenyekanisha amakuru y’ukuri
  3. Ibihugu byateye imbere ni ibifite abantu bubakiye ku muco wabo – CHENO

Umwanditsi:

Ntawitonda Jean Claude

Tanga Igitekerezo

Email yanyu ntigaragazwa ku rubuga. Amazina na Email ni ngombwa.