21°C , Partly cloudy | Kigali-Rwanda
Umuyobozi w'Akarere ka Nyanza Ntazinda Erasime asobanurira abanyamakuru ikigamijwe(Foto Sezibera A)

Nyanza: Iby’imitungo ya koperative inyerezwa n’abayobozi bazo byasubiwemo

Yanditswe na Sezibera Anselme

Ku ya 04-11-2018 saa 10:58:43

Ubuyobozi bw’Akarere ka Nyanza bwasabye abaturage kujya bahita batanga amakuru bakimenya ko umutungo wa koperative runaka ucunzwe nabi.

Meya wa Nyanza, Ntazinda Erasme, avuga ko akenshi babona ibintu bipfa ntibabivuge, bakazajya kubyerura byarageze i wa Ndabaga, rimwe na rimwe bitagifite igaruriro.

Ibyo byagarutsweho mu kiganiro ubuyobozi bw’akarere bwagiranye n’abaturage b’umurenge wa Muyira mu rwego rwo kwegera abaturage no kumva ibitekerezo byabo kugira ngo bagire uruhare mu igenamigambi.

Umuyobozi w’Akarere ka Nyanza, Ntazinda Erasime, yashishikarije abo abaturage kujya bakurikirana amakoperative yabo umunsi ku wundi kugira ngo hirindwe kwangirika byinshi.

Ntazinda avuga kuri koperative zisa n’izahagaze kubera imicungire mibi harimo “Urugangazi”, avuga ko akarere gafatanyije n’umushinga wa MINAGRI PASPA bari kongera guhuriza hamwe abanyamuryango b’iyo koperative kugira ngo uruganda yari ifite rwongere rukore kandi bitarenze uyu mwaka wa 2018 ruzaba rukora kandi neza.

Ntazinda atangaza ko ubuyobozi bwa koperative bwigenga ariko abayobozi bazo badashobora gukora amakosa ngo birangirire aho ngaho, kuko icyo gihe nk’akarere kabakurikirana gafatanyije n’Urwego rw’Igihugu rw’Amakoperative (RCA).

Asaba abanyamuryango ba koperative kudategereza ngo ibintu bigere i wa Ndabaga kugira ngo ikibazo kibone kugaragara ndetse bikagira ingaruka kuri bamwe bakarinda iyo bazivamo.

Abakangurira kujya bagana abakozi b’akarere bashinzwe amakoperative mu tugari no mu mirenge.

Ubwo yakomozaga ku ngamba ziteganywa, Ntazinda yagize ati: “ubuyobozi bw’akarere bukomeza kwigisha no guhugura abaturage kugira ngo bakurikirane imikorere ya koperative zabo hakiri kare, kuko hari aho bigera ugasanga amafaranga yabo yarayatwawe, habaho no gukurikirana abakoze ayo makosa bakaba ntayo bagifite barayamaze.”

Umuyobozi w’Akarere ka Nyanza Ntazinda Erasime asobanurira abanyamakuru ikigamijwe (Foto Sezibera A)

Nyabyenda Madeleine wo mu Murenge wa Muyira mu Karere ka Nyanza avuga ko hari ubwo usanga abayobora koperative bangiza imitungo y’abanyamuryango hanyuma iterambere ryazo rigahagarara.

Agira ati: “Buriya byagiye bibaho ko abantu bibumbira mu makoperative bikagera aho abayobozi bazo bahemukira abanyamuryango bakayitwara umutungo ariko kugira ngo abasigaye babone intege zo kugaruza no gukurikirana ibyo batwaye bikabaca intege”.

Nyabyenda avuga ko ibyo ahanini biterwa n’uko abanyamuryango benshi baba badasobanukiwe n’imicungire ya koperative.

Agira ati: “Hari igihe tuba twibumbiye mu matsinda tukiyemeza kujya dutanga ibiceri 300 ku kwezi kugira umwaka nushira tugiye kwinjira mu gikorwa cyo kugabana umutungo wareba ugasanga ibyo uhawe ntaho bihuriye n’ibyo watanze. Ibyo rero bituma ducika intege zo kuba mu matsinda kubera ko nta nyungu tubonamo”.

Habimana Aphrodis wo Murenge wa Muyira avuga ko kwibumbira mu makoperative ari byiza ariko hari abagiye bacibwa intege inyungu iboneka hamwe na hamwe bitewe n’uburiganya bwa komite zayo.

Ikindi kandi abo baturage bahuriza hamwe ni uko mu gihe habayeho ubwo buriganya mu micungire ya koperative gukurikirana umuyobozi uyiyoboye wabukoze bibagora, bagasaba ubufasha ubuyobozi bw’ibanze bubegereye.

Dusengimana Jacques, Agoronome w’Umurenge wa Muyira mu Karere ka Nyanza na we hari koperative zifite imicungire itanoze bidakurikiranwe byaviramo abaturage bamwe gucika intege.

Agira ati: “Ni byo koko hari amakoperative yagaragaweho gucungwa nabi nk’iyitwa “Urugangazi” na koperative z’abahinzi b’umuceri kuko mu igenzurwa dukora tureba ishusho y’umutungo zifite usanga inyungu n’ubushobozi zifite ari bikeya ari nabyo byatumye zimwe zihagarara.”

“Ariko si zose zicunzwe nabi kuko hari n’izindi z’intangarugero mu kugira imicungire myiza harimo nk’ayo usanga agizwe n’abajyanama b’ubuzima ariko ugasanga anahinga. Hari n’indi igerageza y’ikusanyirizo y’amata”.

Dusengimana avuga ko nk’akarere bakora ubuvugizi ku kigo cy’Igihugu cy’amakoperative (RCA), abashinzwe kugenzura imitungo n’abagenzacyaha ku bayinyereje, izo nzego zikaboherereza abagenzuzi.

Nk’uko abisobanurira Imvaho Nshya avuga ko iyo abo bagenzuzi ba RCA babonye bya bihombo byatejwe n’abayobozi ba koperative kandi bibahama babakurikirana. Gusa ngo ntibikunze kubaho ari na byo asaba ko byakosorwa bikongerwamo imbaraga.

Dusengimana yifuza ko RCA yagira umukozi ushinzwe amakoperative ku karere kugira ngo akumire icyo kibazo kuko bajya guturuka i Kigali abayobozi barashegeshe umutungo w’abanyamuryango.

Avuga ayo makosa aterwa no kuba komite ngenzuzi na nyobozi bya koperative usanga imwe ikorera mu kwaha kw’indi bikaba nkaho ari imwe.

Ati: “Komite ngenzuzi yakagombye kuba igenzura komite nyobozi ariko ntibikorwa kuko no mu nama zikorwa usanga ngenzuzi itinya nyobozi kuko iba ibarusha amafaranga”.

Muyira ni wo murenge wabaye uwa mbere mu yindi yose mu kwesa imihigo y’umwaka wa 2017/2018, mu gihe akarere ka Nyanza ubarizwamo ariko kaje ku mwanya wa nyuma.

TANGA IGITEKEREZO

Leave a Reply

Your email address will not be published. Required fields are marked *