17°C , Partly cloudy | Kigali-Rwanda

Nyanza: Abagenzacyaha bibukijwe kurangwa n’ubushishozi n’ubunyangamugayo

Yanditswe na Twizeyimana Fabrice

Ku ya 12-02-2020 saa 15:23:13
Abagenzacyaha barahiye basabwe kurangwa n'ubunyangamugayo

Abakora umwuga w’ubugenzacyaha baributswa ko umwuga bakora ukomeye kandi ubasaba kugira ubushishozi n’ubunyangamugayo bwinshi kugira ngo babashe kuzuza inshingano zabo.

Byagarutsweho na Minisitiri w’Ubutabera akaba n’Intumwa Nkuru ya Leta mu butumwa yageneye abagenzacyaha 90 bamushyikirije indahiro zabo ku wa 11 Gashyantare 2020 mu karere ka Nyanza.

Muri ubwo butumwa Minisitiri Busingye yahaye aba bagenzacyaha, yabibukije ko umwuga wabo ari mwiza, ariko nanone hari ibyo ubasaba birimo ubushishozi n’ubwitange buhagije, bikaza byiyongera ku bunyangamugayo.

Yagize ati: “Mbashimiye ko mwinjiye mu Bugenzacyaha. Ni umwuga mwiza ariko usaba ubwitange buhagije kuko ari mwe mushinzwe gukumira ibyaha, kubitahura no gukora iperereza igihe byakozwe mugakora dosiye yujuje ibisabwa, mukuzuzanya n’izindi nzego kugira ngo hatangwe ubutabera bunoze.

Ibyo byose bikaba bigomba gukorwa mu bushishozi n’ubunyangamugayo, hirindwa kubogama. Ni muri urwo rwego tubasaba gukomeza gukorana ubunyangamugayo mushyira mu bikorwa amasomo mwahawe n’ayo mukomeza guhabwa n’ubunyamwuga mugenda mwubaka, bityo umwuga twifuza ugashinga imizi.

Minisitiri Busingye yabasabye kurwanya ibyaha mu buryo bwose bushoboka, by’umwihariko ibyaha bihangayikishije igihugu n’umuryango nyarwanda muri iyi minsi, birimo ihohoterwa rishingiye ku gitsina n’irikorerwa abana.

Yakomeje agira ati:  “Ku ihohoterwa rishingiye ku gitsina, gusambanya no gutera inda abana; nk’igihugu turambiwe ibi byaha cyane cyane byibasira abagore n’abakobwa. Ibi byaha bigomba kurwanywa mu ngo n’ahandi hose abantu baba. Buri wese afite inshingano zo kubyamagana no gutanga amakuru abireba.

Ariko nkamwe Bagenzacyaha, mu bushishozi n’ubwenge bwanyu, murasabwa namwe kugaragaza ko murambiwe n’ibi byaha mu gihe iperereza risanzwe ubiregwa yarabikoze, amategeko arahari, ahasigaye ni ukuyashyira mu bikorwa”.

Yunzemo ati “Turasabwa twese guhindura imyumvire ku ihohoterwa rikorerwa abagore gusambanya abana nibwo bizacika burundu kandi twese nitubishyiramo ubushake n’imbaraga nta kabuza bizacika.

Mu gihe hakiri abatinyuka kubikora, umuntu yakeka ko bitacika nyamara Abagenzacyaha, Abashinjacyaha, Abacamanza, Inzego z’Ubuyobozi zitandukanye, ntibagiwe abaturage ubwabo, tugomba gukora ku buryo nta muntu yaba muto, yaba mukuru, yaba abifashijwemo n’umuryango ubitinyuka. Ibi byose ariko birasaba gutanga amakuru haba ababikorewe n’ababonye aho bikorwa, bakirinda kubihishira kuko kubihisha ni ugutiza uhohotera ingufu”.

Muri uyu muhango wo kwakira indahiro z’aba bagenzacyaha, Urwego rw’Igihugu rw’Ubugenzacyaha, RIB, rwanaboneyeho umwanya wo gushyikiriza ishimwe umukozi warwo, Ndahimana Frodouard, wanze kwakira ruswa inshuro eshanu ndetse akaba aherutse no kwanga ruswa umuturage wo mu Karere ka Nyanza yashatse kumuha.

Byabaye ku wa 8 Gashyantare 2020 ubwo umugabo witwa Hakizimana Aloys yafatirwaga mu cyuho agerageza guha ruswa y’amafaranga ibihumbi 40 uyu mukozi wa RIB.

Ni icyaha cyabereye mu Murenge wa Nyagisozi nk’uko byatangajwe na Polisi y’igihugu.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.