20°C , Partly sunny | Kigali-Rwanda
Abaturage bo muri Shangi bishimira igikombe k'imihigo bahawe ( Foto Bahuwiyongera S.)

Nyamasheke: Muri Shangi biyemeje kuzaba aba mbere mu mihigo

Yanditswe na admin

Ku ya 21-11-2017 saa 13:16:36

Abaturage b’Umurenge wa Shangi mu Karere ka Nyamasheke bavuga ko ari ubwa mbere babonye igikombe k’imihigo, kikaba kibagezeho babaye aba 3 ku rwego rw’Akarere nyuma ya Bushekeri na Karengera, nyuma yo kukimurikirwa bakaba ngo biyemeje kongera ibikorwa by’iterambere ubutaha bakazaba aba mbere.

Ubwo bagishyikirizwaga babwiye Imvaho Nshya ko bagikesha gukora cyane no kubungabunga ibyo bagezeho, bakaba bari bakinyotewe cyane kuko kuva imihigo yatangira bari batarafata ku gikombe, babona ibikombe bijya ahandi bikaba byarabateye gukora cyane kugira ngo na bo kizabagereho.

Abaturage bo muri Shangi bishimira igikombe k’imihigo bahawe ( Foto Bahuwiyongera S.)

Nzeyimana Jean Nepomscène uyobora koperative ikora umurimo w’ubuvumvu muri uyu murenge, yabwiye Imvaho Nshya ko iki gikombe kibateye imbaraga zo kongera ubukungu bw’umurenge no kubungabunga ibyo bagezeho.

Yagize ati “Kuba natwe tugeze ku gikombe k’imihigo ni ukubera imbaraga twakoresheje mu iterambere n’umutekano, aho twakoze byinshi, twubaka tunatunganya ibikorwaremezo mu bufatanye no gukorera ku ntego, tukaba twahize kongera iterambere ry’ubukungu, isuku no kurushaho kwibungabungira umutekano, ubutaha tukazegukana igikombe cya mbere.”

Umunyamabanga Nshingwabikorwa w’uyu murenge, Ndindayino Jean Claude, yabwiye Imvaho Nshya ko abaturage bamaze kumenya akamaro ko gukorera ku mihigo kuko usanga byose babikora nk’irushanwa, ari yo mpamvu banejejwe no kuba na bo bageze ku gikombe mu gihe umwanya wa hafi bigeze kubona ari uwa 5 ubundi bahoraga inyuma.

Yagize ati “Imihigo hafi ya yose twayesheje neza, ariko uwatunaniye ni uwo gushishikariza urubyiruko rurangije imyuga gukora imishinga ituma ruhanga imirimo rukaguza amafaranga muri SACCO rukiteza imbere, kuko ababigiyemo bakoze imishinga, igihe bagiye guhabwa amafaranga bashaka guhindura ya mishinga basabye ntibaba bakiyahawe bituma tutawesa. Indi yose twarakoze cyane tugera kuri 87,6%, kandi n’uyu mwaka twiteguye kuza imbere.”

Umuyobozi w’Akarere ka Nyamasheke Kamari Aimé Fabien yabwiye Imvaho Nshya ko yishimira ko imihigo muri uyu murenge igira impinduka mu iterambere ry’abawutuye, kuko ngo urebye uko bagenda biteza imbere bitewe no kubyaza umusaruro ibikorwaremezo n’uburyo babibungabunga ngo badasubira mu bukene barimo mbere yo kubibona, bitanga ikizere k’iterambere rirambye ry’Akarere kose.

BAHUWIYONGERA SYLVESTRE

TANGA IGITEKEREZO

Leave a Reply

Your email address will not be published. Required fields are marked *