20°C , Partly sunny | Kigali-Rwanda
Muri santere y'ubucuruzi ya Karengera havutse imirimo myinshi kubera amashanyarazi ( Foto Bahuwiyongera S.)

Nyamasheke: Amashanyarazi yongereye imirimo muri santere ya Karengera

Yanditswe na admin

Ku ya 21-11-2017 saa 13:21:44

Abakorera imirimo itandukanye yinjiza amafaranga muri santere y’ubucuruzi ya Karengera, iri mu murenge wa Kirimbi, mu Karere ka Nyamasheke baravuga ko  guhabwa amashanyarazi byabongereye amahirwe y’iterambere kuko imikorere ihari itandukanye kure n’iyari ihari atarabageraho.

Ubwo Imvaho Nshya yasuraga iyi santere y’ubucuruzi imaze imyaka irenga 60 ihari, abahacururiza n’abahakorera indi mirimo myinshi yinjiza amafaranga bayitangarije amashanyarazi yababereye imbarutso y’iterambere rikomeye bafite, kuko mbere nta terambere rigaragara bari bafite.

Muri santere y’ubucuruzi ya Karengera havutse imirimo myinshi kubera amashanyarazi ( Foto Bahuwiyongera S.)

Bavuga ko mbere bagikorera mu kizima batarenzaga saa moya z’umugoroba bagikora ugasanga hari amafaranga batinjizaga menshi, kuba nta buryo bwo gusudira bwabagaho ngo wasangaga bakingisha inzugi z’ibiti, bagahora bikanga kwibwa n’uduke twarimo.

Kuba nta kinyobwa gikonje wari kuhabona na byo ngo ntibyishimirwaga n’abayigeragamo, kwiyogoshesha cyangwa gushyirisha umuriro muri telefoni bigasaba gukora urugendo rurerure ariko ubu ngo byose birahari, barakora amasaha menshi bakinjiza menshi n’imirimo yariyongereye.

Habumuremyi Aimable uhagarariye abacuruzi bo muri iyi santere y’ubucuruzi yahamirije Imvaho Nshya ko iyi myaka mike cyane bamaranye aya mashanyarazi yababereye isoko yo kongera ubukungu kuko imikorere yarushijeho kunoga.

Yagize ati “Nubwo iyi santere y’ubucuruzi imaze hano igihe kirekire ariko iterambere rifatika ryayo rimaze imyaka itarenga 8 kuko mbere umuturage uciriritse ntiyashoboraga kongera amafaranga kuko ntaho yari kuguza yiteza imbere, ikindi ntibanakunde gukora kuko bangaga ko ayo bakoreye bayibwa kubera kubura aho bayabitsa hizewe ariko ubu hari SACCO.

Ikindi ni uko kuba nta mashanyarazi twagiraga nta mikorere yari ihari, utangiye kuzamuka akajya ahari amashanyarazi n’aho azagana ikigo k’imari akiteza imbere.”

Horanishya Aloys, perezida w’inama y’ubutegetsi ya Twiteze Imbere Kirimbi SACCO iri muri iriya santeri,  avuga ko aho amashanyarazi abonekeye ababagana baka inguzanyo babaye benshi cyane bigaragara ko ari cyo cyari kibuze ngo biteze imbere, imikorere ikaba yarahindutse n’abagujije bakishyura neza bigatuma n’abandi bayafata na bo bagatera imbere, akemeza ko iyo amashanyarazi atahagera n’iyi SACCO itari kongera imikorere.

Ku byerekeranye n’umusaruro bagomba kubyaza aya mahirwe, Umuyobozi w’Akarere ka Nyamasheke Kamari Aimé Fabien yabwiye Imvaho Nshya ko ibi byose biri muri gahunda ya Perezida Kagame yo guha abaturage bose amahirwe y’iterambere, akabasaba kongera amasaha y’akazi, bakanoza ibyo bakora kugira ngo barusheho kongera ubukungu.

BAHUWIYONGERA SYLVESTRE

TANGA IGITEKEREZO

Leave a Reply

Your email address will not be published. Required fields are marked *