20°C , Mostly cloudy | Kigali-Rwanda

Nyamagabe: “Igi ry’Umwana” ryafashije amagana y’abana gukira imirire mibi

Yanditswe na NTAWITONDA JEAN CLAUDE

Ku ya 05-03-2021 saa 03:24:16
Abajyanama bakurikirana ubuzima bw'abana umunsi ku wundi mu gihe bakiri munsi y'imyaka iitanu (uri ku munzani afite imyaka itatu n'igice)

Umuryango wa Nzabirinda Alphonse na Mukarugwiza, ni umwe mu miryango ivuga imyato ubutabazi bwatanzwe na Leta binyuze muri gahunda zigamije kurwanya igwingira n’izindi ndwara ziterwa n’imirire mibi.

Uwo muryango warwaje umwana imirire mibi atarageza no ku mwaka umwe utuye mu Kagari ka Ngiryi, Umurenge wa Gasaka mu Karere ka Nyamagabe, bishimira ko umwana wabo yakize mu gihe gito nyuma yo gutangira kwitabwaho by’umwihariko.

Uretse ubufasha yabonye binyuze muri gahunda Leta igenera abatishoboye ku bufatanye n’abaterankunga barimo na Baki y’Isi, ukwigomwa kw’abakozi b’ibigo nderabuzima, abo mu Karere no ku Mirenge muri gahunda yiswe “Igi ry’Umwana”

Uwo muryango ni umwe mu isaga 430 yagaragayeho icyo kibazo guhera mu mwaka wa 2019, ariko ubufatanye bw’Inzego z’ibanze n’iz’ubuzima mu Karere bukaba bwarabaye umusemburo wo gukura mu mirire mibi abana basaga 350 mu gihe gito.

Igi ry’Umwana ni agashya kakomotse mu Kigo Nderabuzima cya Sovu mu Murenge wa Huye wo mu Karere ka Huye, ariko ikaba ikomeje kugira uruhare mu guhindura ubuzima bw’abana mu Karere ka Nyamagabe.

Mu mwaka wa 2017 ni bwo ubwo buryo bwatangijwe n’Umubikira Sr. Uwanyirigira Solange uyobora Ikigo Nderabuzima cya Sovu, muri Gahunda ya “Kundwa Kibondo” yashyiriweho kondora abana bari mu mirire mibi hadasigaye n’ababyeyi babo.

Kwita ku bana bafite ibyo bibazo byatumye Ikigo Nderabuzima cya Sovu gitahura ko ababyeyi benshi bavuza abana imirire mibi, na bo ubwabo baba bayifite nyuma yo kubona ko hari bamwe bacura abana babo ibyo baba batekewe kwa muganga ngo bibondore.

Mu mwaka wa 2019 ni bwo ubuyobozi bw’Akarere ka Nyamagabe bwafashe umwanzuro wo gufatira urugero kuri iyo gahunda nyuma y’ubugenzuzi bwagaragaje ko ako Karere kari gafite abana 430 bari mu mirire mibi, barimo abagera kuri 30 bari mu mirire mibi ikabije (bari mu mutuku).

Umuyobozi wungirije w’Akarere ka Nyamagabe ushinzwe imibereho myiza y’abaturage Mujawayezu Prisca, yatangaje ko mu myaka igera kuri ibiri bamaze batangije gahunda y’Igi ry’Umwana abarwaye imirire mibi bagabanyutse bakagera kuri 76 barimo 6 bari mu mirire mibi ikabije.

Umuyobozi wungirije w’Akarere ka Nyamagabe Mujawayezu Prisca, mu Kiganiro n’Imvaho Nshya

Yagize ati: “Twari dufite abana benshi mu mirire mibi mu myaka ibiri ishize, icyo gihe bari bageze muri 430. Tumaze gukora ubusesenguzi twahise dushyiraho ingamba mu midugudu zirimo ibikoni by’imidugudu, kwigisha ababyeyi ibijyanye n’imirire iboneye no kwirinda indwara ziterwa n’umwanda.”

Nubwo ibyo byagize uruhare mu kugabanya wa mubare, ubwo hatangizwaga gahunda y’Igi ry’Umwana ni bwo umusaruro w’abakira wahise uboneka mu gihe kitarenze ibyumweru bibiri.

Igi ry’Umwana yatumye abarwaje imirire mibi bahabwa ibitaro

Visi Meya Mujawayezu akomeza avuga ko igitekerezo cyo gutangiza Igi ry’umwana cyaje nyuma yo gufata umwanzuro wo kujya baha ibitaro ababyeyi barwaje imirire mibi.

Ati: “Ubundi babifataga nk’imirire mibi gusa bakagira ngo ntabwo ari indwara ikomeye cyane idindiza umwana mu mikurire. Tumaze kubashyira mu bitaro, twavuganye n’abayobozi b’ibigo nderabuzima, ni na ho havutse igitekerezo cy’Igi ry’Umwana twanzura ko buri mukozi ushoboye ku bitaro no ku Karere yajya agira icyo yigomwa tugashyira ku ruhande kugira ngo wa mubyeyi n’umwana we bari mu bitaro babone ikibatunga.”

Akomeza avuga ko batohereza umubyeyi mu bitaro gusa ahubwo aba agiye mu ishuri ryo kwita ku isuku no gutegura indyo yuzuye, ndetse akabona n’amahirwe yo kwiyondora kugira ngo yite ku mwana we afite amagara mazima.

Yakomeje agira ati: “Ibyo twaje kubikora kubera ko twari tumaze kubona ubuhamya bwaturutse ku Kigo Nderabuzima cya Sovu mu Karere ka Huye, umubikira ni we wavumbuye ko impamvu bariya bana badakira vuba ari uko na banyina ubwabo baba bashonje. Babibonaga uko babaga bagiye kugaburira abana umubyeyi akabanza gutamira mbere y’uko agaburira umwana we.”

Iyo gahunda yiswe Igi ry’Umwana kuko amafaranga abakozi bigomwa ku kwezi aba ashobora kungana n’agura igi rimwe gusa, yahura ari ay’abantu benshi hakaboneka agura Akawunga, umuceri, ibirayi, imboga n’ibindi byo kurya bitunga ababyeyi n’abana babo bari mu mirire mibi barwariye mu bitaro.

Ababyeyi bigira guteka mu gikoni cy’umudugudu

Mujawayezu ati: “Twarabikoze bitanga umusaruro, mu gihe cy’ibyumweru bitarenze bibiri umwana na nyina babaga bamaze kumera neza. Igihe umwana yabaga ari mu bitaro nk’uko nyina yigishwaga iby’isuku no guteka indyo yuzuye, agakono k’umwana n’ibindi.”

Kugeza ubu Akarere ka Nyamagabe gasigaranye abana 76, barimo 70 bari mu muhondo na batandatu bari mu mutuku, bari mu mirenge 17 igize ako Karere.

Umurenge usigayemo abana benshi ni uwa Kitabi ubarurwamo abana 10, bityo ubuyobozi bukaba bukomeje gukaza ingamba zo kurwanya imirire mibi.

Abakize imirire mibi barashima Leta n’abaterankunga

Abakize imirire mibi mu Karere ka Nyamagabe barashima Leta y’u Rwanda yabashyiriyeho gahunda zitandukanye ndetse n’abaterankunga barimo Banki y’Isi ifasha abatishoboye benshi guhangana n’imirire mibi binyuze mushinga wa SPRP.

Minisiteri y’Ubuzima ivuga ko umushinga wa SPRP wafashije cyane mu kugura ifu ya Shisha Kibondo igizwe n’inntungamubiri zitandukaye, zifasha umwana kugira amagara mazima.

Iyo fu itangwa mu turere 13 uwo mushinga ukoreramo, ihabwa ababyeyi batwite n’abonsa abana bakiri munsi y’imyaka ibiri. Bagomba kuba babarizwa mu cyiciro cya mbere n’icya kabiri cy’ubudehe.

Muri iyo gahunda, harimo n’abahabwa amafaranga y’u Rwanda 7,500 buri kwezi, bakayahabwa buri gihembwe ari ibihumbi 23,000.

Mukantwali Françoise, umwe mu Bajyanama b’Ubuzima bakorera mu Kagari ka Ngiryi mu Murenge wa Gasaka, yavuze ko gahunda za Leta n’iz’abaterankunga zifashe runini mu rugamba rwo guhangana n’imirire mibi.

Yagize ati: “By’umwihariko turashima uwo muterankunga [Banki y’Isi] utanga ifu ya Shisha Kibondo n’amafaranga bigenerwa abatishoboye, kuko bikingira imiryango myinshi kujya mu mirire mibi.”

Amasomo bahabwa mu gikoni cy’umudugudu abafasha kunoza imirire ndetse ibyo bahatekera bikagira uruhare mu gukura abana mu mirire mibi

Inzego z’ibanze mu Karere ka Nyamagabe zikomeje gushyira imbaraga mu bukangurambaga bukomatanyije bufasha abaturage kureka imyumvire yo hasi ikiri izingiro ry’imirire mibi n’indwara ziterwa n’umwanda.

By’umwihariko, kuri ubu biragoye ko wasura urugo rw’umuturage muri ako Karere ngo usange adafite akarima k’igikoni kuko basobanukiwe n’uko kagira uruhare rukomeye mu guhangana n’imirire mibi.

Muri ako Karere hamaze gutangizwa ingo mbonezamikurire zo mu miryango (Home based ECD) zikabakaba 3,000 zirererwamo abana, n’Ibikoni by’Umudugudu bitandukanye aho buri rugo rubonera amasomo yo gutegura indyo yuzuye ku rwego rw’Umudugudu.

Ababyeyi bagaburira abana babo mu gikoni cy’umudugudu, aho bigishirizwa kugira isuku no gutegura indyo yuzuye

Abaturage bo mu Kagari ka Remera barimo guhabwa ingemwe z’imboga zo gutera mu karima k’igikoni

Usanga ingozitandukanye zoroye amatungo azifasha kurwanya imirire mibi

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.