25°C , Partly cloudy | Kigali-Rwanda

Nyamagabe: Hamuritswe ibirayi bya Seka, Twigire, Ndamira, Cyerekezo na Gisubizo

Yanditswe na Twizeyimana Fabrice

Ku ya 12-02-2020 saa 15:27:56
Izi mbuto nshya zitanga umusaruro ushimishije

Ikigo k’igihugu gishinzwe guteza imbere ubuhinzi n’ubworozi RAB n’ikigo mpuzamahanga giteza imbere ubuhinzi bw’ibinyabijumba (CIP) bamuritse kandi banita amazina amoko atandatu y’imbuto nshya z’ibirayi, yitezweho kongera umusaruro wabyo.

Izi mbuto z’ibirayi zamuritswe ni Seka, Twigire, Ndamira, Cyerekezo, Seka na Gisubizo, zifite ubushobozi bwo kumera mu cyumweru kimwe maze zikaba zaterwa kandi zikera mu gihe gito.

Ni igikorwa cyabereye mu karere ka Nyamagabe mu murenge wa Tare ku wa 12 Gashyantare 2020, ariko kizakomereza mu turere twa Karongi na Musanze ku wa 4 no ku wa 5, aho abaturange bazamurikirwa izi mbuto z’ibirayi bakanazita amazina. Iki gikorwa kitabiriwe n’abahinzi b’ibirayi, abayobozi b’inzego z’ibanze, koperative z’abahinzi b’ibirayi, abikorera ku giti cyabo n’abafatanyabikorwa batandukanye.

Ni imbuto z’ibirayi zakorewe mu Rwanda, by’umwihariko zikaba zaragaragaje ko zishobora gutanga umusaruro ushimishije, kwera vuba no kwihanganira indwara n’imihindagurikire y’ikirere, ku buryo zitezweho gukemura ikibazo k’imbuto nziza abahinzi bo muri aka karere bamaze iminsi bataka.

Ku wa 17 Ukuboza 2019, abatubuzi b’imbuto z’ibirayi hamwe n’abahinzi mu karere ka Nyamagabe na Nyaruguru basuye umurima shuri izo mbuto nshya zageragerezwagamo ndetse bazihabwaho ibisobanuro birambuye.

Icyo gihe Umukozi wa RAB Dr Placide Rukundo, yagaragaje ko bizeye ko izi mbuto ari igisubizo ku bahinzi n’abakunzi b’ibirayi, kuko bizongera umusaruro bakihaza ndetse bagasagurira isoko.

Yagize ati: “Aya moko atandukanye y’ibirayi yagaragaje ubushobozi bwo gutanga umusaruro ungana na toni ziri hagati ya 18 na 20 kuri hegitari. Zimwe muri zo zifite ubushobozi bwo kumera mu cyumweru kimwe kandi zikera vuba, ibi bikaba ari igisubizo ku bahinzi n’abakunzi b’ibirayi kuko bizongera umusaruro w’ibirayi ku isoko”.

Kirimi Sindi, umuyobozi w’Ikigo mpuzamahanga giteza imbere ibinyabijumba, (CIP) mu Rwanda, yashimye inzego zose zifatanya n’iki kigo muri gahunda zo gushaka igisubizo k’imbuto z’ibirayi zibereye ubutaka, zigatanga umusaruro mwinshi kandi zikera vuba.

Yagize ati “Nk’Ikigo mpuzamahanga giteza imbere ibinyabijumba, (CIP) turashimira cyane RAB, Akarere ka Nyamagabe n’abahinzi twafatanyije mu kazi katoroshye kugira ngo haboneke izi mbuto z’ibirayi nshya turimo twishimira uyu munsi.”

Umuyobozi w’Akarere ka Nyamagabe wungirije ushinzwe Ubukungu n’Iterambere Kabayiza Lambert, yashimiye RAB na CIP ko bazanye imbuto nshya y’ibirayi itari iyo kurya mu rugo gusa ngo birangire ahubwo ni imbuto itanga umusaruro utubutse ku muhinzi agasagurira isoko na we akiteza imbere.

Ikigo k’igihugu gishinzwe guteza imbere ubuhinzi n’ubworozi (RAB) n’ikigo mpuzamahanga giteza imbere ibinyabijumba, (CIP) mu Rwanda, bemeza ko biba byiza iyo abahinzi bafite amoko menshi y’imbuto, bakabasha kugira amahitamo y’iyo bashaka bitewe n’intego y’ubuhinzi bwabo.

Inyinshi mu mbuto z’ibirayi zisanzwe zihingwa mu Rwanda ahanini zagenewe kuribwa bisanzwe, magingo aya hakaba hashyizwe imbaraga mu gushaka imbuto zera ibirayi bikoreshwa mu nganda zibitunganya.

Abahinzi bishimiye ko imbuto nshya bamurikiwe zera vuba kandi zigatanga umusaruro ushimishije.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.