27°C , Mostly cloudy | Kigali-Rwanda

Nyamagabe: Guverineri yashimye uruhare rw’abaturage mu kwicungira umutekano

Yanditswe na Twizeyimana Fabrice

Ku ya 12-02-2020 saa 15:32:58
Abahize abandi mu kwicungira umutekano no guteza imbere imibereho myiza y'abaturage bashimiwe

Guverineri w’Intara y’Amajyepfo Gasana Emmanuel, yashimiye uruhare abaturage bo mu karere ka Nyamagabe bagira mu kwicungira umutekano ndetse anashyikiriza ibihembo imirenge, utugari n’imidugudu yabaye indashyikirwa mu marushanwa yateguwe n’iyi Ntara.

Ayo marushanwa yateguwe n’Intara y’Amajyepfo yahuje Umurenge wa Kitabi n’Umurenge wa Uwinkingi, akaba yari agamije gusigasira umutekano, guteza imbere imibereho myiza, kwimakaza imiyoborere myiza, kwimakaza isuku ahantu hose muri byose no kwimakaza indangagaciro Nyarwanda.

Guverineri Gasana yashimiye abaturage bo mu Mirenge ya Kitabi na Uwinkingi ko bitwaye neza mu marushanwa kandi bakaba baragize uruhare runini mu kwicungira umutekano kuko basobanukiwe ko umutekano ari wo shingiro ry’ubukungu mu iterambere twifuza.

Yababwiye ko gusigasira umutekano ari uguhozaho, bityo badakwiye kwirara ngo bumve ko uwo bafite uhagije, ahubwo bakwiye guhora bakaza ingamba zo kuwubungabunga, ku buryo nta wabaca mu rihumye ngo awuhungabanye.

Ubu butumwa kandi burajya gusa n’ubwatanzwe na Polisi y’igihugu muri iyi Ntara, aho yasabye abaturage kugira uruhare mu kwirindira umutekano barara amarondo kandi bagatangira amakuru ku gihe ku bangiza cyangwa bashobora guhungabanya umutekano.

Abaturage bo muri iyi mirenge n’ab’Akarere ka Nyamagabe muri rusange, basabwe no gukomeza gukumira n’ibindi byaha bishobora guhungabanya umutekano no kuvutsa bamwe uburenganzira bwabo ko gusambanya abangavu, gukura abana mu ishuri, n’amakimbirane mu ngo.

Bamwe mu baturage bo mu mirenge yahembwe, bishimiye ko ingamba bafashe mu kwicungira umutekano zabyaye umusaruro kandi zikaba zarahawe agaciro ubwo bagenerwaga ishimwe.

Mu gitekerezo yatanze anyuze ku rubuga rwa Twitter, uwitwa Munyeshuri yagize ati “Tubijeje guhora ku isonga mu kwicungira umutekano, iri shimwe ntirizatuva mu nzara. Hamwe na Leta y’ubumwe dufite, imvugo ni yo ngiro. Nyamagabe mu ruhando rw’imihigo imvugo ni yo ngiro”.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.