19°C , Intermittent clouds | Kigali-Rwanda

Nyamagabe: Abajyanama b’ubuzima biyemeje kwiteganyiriza muri ‘Ejo Heza’

Yanditswe na Twizeyimana Fabrice

Ku ya 22-10-2019 saa 08:29:04
Abajyanama b'ubuzima biyemeje kwitabira no gukangurira abandi gahunda ya Ejo Heza

Abajyanama b’ubuzima bo mu karere ka Nyamagabe n’ababahagarariye ku bigo nderabuzima, bahuguwe kuri gahunda y’ubwiteganyirize bw’igihe kirekire ‘Ejo Heza’ biyemeza ko bagiye gufata iya mbere mu kwitabira iyi gahunda kugira ngo bateganyirize ahazaza habo.

Ejo Heza ni gahunda ya Leta igamije gufasha abanyarwanda n’abanyamahanga batuye mu Rwanda kwizigamira by’igihe kirekire, bityo bikabafasha kuzabona pansiyo mu gihe bazaba bageze mu zabukuru. Ikaba ishyirwaho n’itegeko No 29/2017 ryo ku wa 29/06/2017

Iyi gahunda yashyizweho ku ntego yo kuzamura umuco wo kwizigamira mu banyarwanda, guha buri Munyarwanda n’umunyamahanga utuye mu Rwanda amahirwe yo guteganyiriza izabukuru, kuzamura ubukungu bw’igihugu no kurwanya ubukene muri rusange.

Akarere ka Nyamagabe kamaze iminsi mu bukangurambaga bugamije gushishikariza ibyiciro by’abaturage bitandukanye kwitabira iyi gahunda, kuko buri wese mu kiciro ke atayikumiriweho.

Kuwa 21 Ukwakira 2019, Umuyobozi w’Akarere wungirije ushinzwe imibereho myiza y’abaturage Madamu Mujawayezu Prisca yagiranye inama n’abajyanama b’ubuzima ndetse n’ababahagarariye ku bigo nderabuzima, abakangurira kwitabira ‘Ejo Heza’ nk’uburyo bwiza bwo kwiteganyiriza ikizabagoboka bageze mu zabukuru.

Mujawayezu yababwiye ko kwiteganyiriza ari bumwe mu buryo bwo gukumira bimwe mu bibazo bibangamira imibereho myiza y’abaturage, bihora bihangayikishije ubuyobozi.

Muri iyi nama kandi banashyizeho ihuriro ry’amakoperative y’abajyanama b’ubuzima ku rwego rw’Akarere ka Nyamagabe, riyobowe na Nemeyinkiko Jean Marie Vianney.

By’umwihariko iri huriro rigamije kwimakaza imicungire n’imikoranire myiza mu kwihutisha imibereho myiza y’umuturage.

Abajyanama b’ubuzima hamwe n’ababahagarariye ku bigo nderabuzima biyemeje  gukangukira kwizigamira no kubishishikariza abandi bajyanama bagenzi babo, kandi ibyo bikajyana no guteganyiriza  ahazaza binyuze mu kigega ‘Ejo Heza’.

Biyemeje kandi no kurwanya ibibazo byose bibangamira imibereho y’abaturage biciye mu itorero ry’umudugudu, kandi ngo bizeye ko imikoranire myiza n’ubufatanye bizabafasha kubigeraho.

Mu mpera z’icyumweru gishize, abahagarariye abikorera mu Karere ka Nyamagabe n’ababahagarariye mu mirenge 17 yose igize aka akarere, nabo bagiranye  inama n’ubuyobozi bw’akarere igamije kurebera hamwe uruhare rw’abikorera mu iterambere ry’akarere ndetse no kwihutisha gahunda ya ‘Ejo Heza’.

Abikorera biyemeje kugira uruhare mu gukangurira abandi kwitabira iyi gahunda kuko “Uwakwikubira gahunda y’ubwizigame ya ‘Ejo Heza’ ntayishishikarize n’abandi yaba ashyizemo ukwikunda ndetse ntiyaba anashaka ahazaza heza h’abanyarwanda kuko ‘Ejo Heza’ yaje ari nk’igisubizo ku hazaza heza h’abanyarwanda”.

Umwanditsi:

Twizeyimana Fabrice

Tanga Igitekerezo

Email yanyu ntigaragazwa ku rubuga. Amazina na Email ni ngombwa.