23°C , Intermittent clouds | Kigali-Rwanda

Nyagatare: Mufulukye yahanuye abanyeshuri bashya muri Kaminuza y’u Rwanda

Yanditswe na Twizeyimana Fabrice

Ku ya 08-11-2019 saa 08:06:48
Guverineri Mufukukye aganira n'abanyeshuri batangiye Kaminuza

Guverineri w’Intara y’Iburasirazuba Mufulukye Fred, yahaye impanuro abanyeshuri bashya batangiye umwaka wa 2019/2019 muri kaminuza y’u Rwanda ishami rya Nyagatare, abasaba  gushyira umutima ku cyabazanye bakagendera kure ibyaha bikunze kuranga urubyiruko.

Kuwa 7 Ugushyingo 2019 ni bwo Guverineri Mufulukye yifatanyije n’ubuyobozi bwa Kaminuza y’u Rwanda, ishami rya Nyagatare mu muhango wo kwakira abanyeshuri bashya no gusoza icyumweru bari bamaze mu itorero.

Mufulukye yasobanuriye aba banyeshuri bashya imiterere y’iyi Ntara muri rusange n’Akarere ka Nyagatare ndetse n’amahirwe yihariye ahagaragara, ababwira ko uretse kuhigira amasomo, bazanamenya ibyiza by’igihugu batari basanzwe bazi.

Yababwiye ko nyuma yo gutozwa ubu na bo binjiye mu zindi ntore, abibutsa ko intore zigendera ku ndangagaciro na kirazira z’umuco nyarwanda, bityo bakwiye kurangwa n’imyitwarire ntangarugero rwiza, birinda zimwe mu ngeso zikunze kuranga urubyiruko.

Yagize ati “Murasabwa kugira imyitwarire myiza, mwaratojwe, ubu mwasanze izindi ntore, mwatumwe kuza gushaka ubwenge. Turabasaba kwirinda ingeso mbi zirimo kunywa mugasinda, ibiyobyabwenge, ubusambanyi, ahubwo indangagaciro na kirazira by’umuco Nyarwanda abe ari byo bibaranga.

Banyeshuri, twaje hano kubaha ikaze no kubagezaho impanuro zijyanye n’imyitwarire, mwaje kwiga, mugomba kwiga kandi mugatsinda kuko ni mwebwe bayobozi b’igihugu cyacu b’ejo hazaza”.

Guverineri Mufulukye kandi yababwiye ko bakwiye kurangwa n’ibikorwa biteza imbere igihugu binyuze mu guhanga udushya, kugira ngo intego yo gukomeza kwihutisha iterambere igerweho.

Yakomeje agira ati “Gukunda igihugu si indirimbo, ni ibikorwa…. Ndabasaba gukundana ubwanyu no kuba umwe, mugashyira hamwe ni bwo tuzagera ku iterambere twifuza.

Turifuza u Rwanda rutarangwamo amacakubiri, turifuza u Rwanda rufite urubyiruko rukunda Igihugu, rufite intumbero yo kwiyubaka no gukora ibikorwa biteza imbere igihugu. Turabasaba gukora cyane mugahanda udushya.”

Yabijeje ko uretse ubwenge bazakura muri iyi Kaminuza baje kwigamo, bazabona n’amahirwe yo gutembera iyi Ntara n’akarere ka Nyagatare by’umwihariko bakishimira ibyiza bihari ndetse mu by’ibanze bazahungukira hakaba harimo no kwibonera amateka yo kubohora igihugu kuko aka karere ari ko kayabumbatiye.

Ati “Intara y’Iburasirazuba ni Intara nziza cyane, Intara nini, ifite ibyiza nyaburanga, ifite ubuhinzi n’ubworozi bya kijyambere. Muzayitembere, by’umwihariko mu karere ka Nyagatare uretse kugira ibyo byiza navuze, ni nayo ibumbatiye amateka y’urugamba rwo kubohora igihugu”.

Guverineri kandi yabasabye kugaragaza isura nyayo y’u Rwanda no kwirinda ibihuha bisubiza abanyarwanda inyuma.

Umuyobozi w’akarere ka Nyagatare Mushabe David Claudian, yahaye aba banyeshuri ikaze anabizeza ko ubuyobozi bwiteguye kubaba hafi no gukora igishoboka ngo babone imibereho myiza n’umutekano bifuza, anashimira ubuyobozi bw’igihugu bwohereje aba banyeshuri hano kuko yizeye ko hamwe na bo akarere kazarushaho kuba keza.

Aba banyeshuri bahigiye imbere ya Guverineri w’Intara kugira uruhare muri gahunda za Leta, kuba umusemburo w’iterambere, kugira umuco wo kuzigama no kurwanya ubushomeri n’ibiyobyabwenge, kubakira abatishoboye 3 no kurwanya imirire mibi, gusigasira ibyagezweho, kwihangira imirimo n’ibindi.

Umwanditsi:

Twizeyimana Fabrice

One Comment on “Nyagatare: Mufulukye yahanuye abanyeshuri bashya muri Kaminuza y’u Rwanda”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.