26°C , Partly sunny | Kigali-Rwanda
Imirimo yo gutunganya imihanda izashyirwamo kaburimbo igeze kure (Foto Hitimana S)

Nyagatare: Imihanda yo mu mujyi wa Nyagatare ireshya na Km 4  igiye gushyirwamo kaburimbo

Yanditswe na HITIMANA SERVAND

Ku ya 19-02-2018 saa 08:36:28

Ubuyobozi bw’Akarere ka Nyagatare, bugaragaza ko mu rwego rwo gukomeza guha isura nziza Umujyi wa Nyagatare nk’umwe mu mijyi yunganira Kigali, hagiye kubakwa ibilometero bine by’imihanda ya kaburimbo.

Imirimo yo gutunganya imihanda izashyirwamo kaburimbo igeze kure (Foto Hitimana S)

Iyi mihanda igiye gushyirwamo kaburimbo ni igendanye n’igishushanyombonera cy’Umujyi wa Nyagatare. Ubuyobozi bugaragaza ko izafasha abagenda n’abakorera muri uyu mugi gukorera ubushabitsi bwabo ahantu hasukuye, hejuru y’ibi kandi n’isura y’uyu mugi ikazarushaho kuba nziza.

Kayitare Didace, Umuyobozi w’Akarere ka Nyagatare wungirije ushinzwe iterambere ry’ubukungu, yatangarije Imvaho Nshya ko ibi biri gukorwa mu rwego rwo gushyira mu bikorwa ikerekezo cy’umugi uri mu kiciro cya kabiri k’imigi yunganira Kigali.

Yagize ati:”Uyu mujyi wa Nyagatare uri mu migi itanu yatoranyijwe ngo yunganire umurwa mukuru wa Kigali. Ni muri urwo rwego ibikorwarenezo muri uyu mugi, bigendera kuri iki kerekezo.

Tugiye gukora ibilometero 5 by’imihanda ya Kaburimbo, ariko gahunda ni uko izagenda yongerwa uko ubushobozi bugenda buboneka.”

Abakorera mu mujyi wa Nyagatare cyane cyane abahacururiza bishimiye iki gikorwa, ngo kuko uretse koroshya ingendo bizafasha mu kubungabunga isuku.

Kayitare Cassien yagize ati:”Twishimira ko umugi wacu uri gukura, by’umwihariko rero kubakirwa imihanda ya kaburimbo bizatuma aho dukorera harushaho gusa neza.

Ikindi ni uko inaha hakunze kuba imiyaga wasangaga izana imikungugu mu bicuruzwa byacu, ariko mu gihe imihanda iri imbere y’aho dukorera izaba yuzuye, tuzaca ukubiri n’iki kibazo.”

Ngoga John uba i Nyagatare nk’umunyeshuri muri Kaminuza, avuga ko imihanda myiza izakuraho imbogamizi z’ibyondo bahuraga nazo bava cyangwa bajya mu masomo yabo mu gihe k’imvura.

Ati “Iyo imvura iguye uri mu ishuri ku mugoroba cyangwa nijoro byabaga ikibazo kumanuka uza ku macumbi kuko asa n’ari kure kandi inzira z’ino zigira urwondo rwinshi. Iyi mihanda igiye kubakwa rero iratubera igisubizo kandi n’iyo ugenda mu mugi ufite imihanda ya kaburimbo usanga bisa neza, abantu ari abasirimu.”

Muri iki gihe uyu mujyi wa Nyagatare urimo kuvugururwa, abubaka nabo basabwa kubaka bafite ibyangombwa kandi bakubahiriza igishushanyombonera cy’umugi, kuko bibarinda kugongwa n’imihanda ikorwa nk’iyi kuko aho iba yaragenewe haba hazwi.

 

TANGA IGITEKEREZO

Leave a Reply

Be the First to Comment!

avatar