23°C , Mostly cloudy | Kigali-Rwanda
Minisitiri w'Urubyiruko Mbabazi Rosemary atangiza igikorwa cyo gutunganya urwuri, ari kumwe na Guverineri w'Intara y'Iburasirazuba Mufulukye Fred, n'abandi bayobozi batandukanye hamwe n'abaturage ( Foto Hakizimana Y.)

Nyagatare: Hatangijwe ‘imiyoborere twifuza ishyira umuturage ku isonga’

Yanditswe na Hakizimana Yussuf

Ku ya 05-12-2018 saa 04:56:41

Urwego rw’Igihugu rushinzwe Imiyoborere (RGB) rwatangije gahunda nshya yo kwimakaza imiyoborere myiza yiswe “Imiyoborere twifuza ishyira umuturage ku isonga”.

Ni gahunda yatangirijwe mu Karere ka Nyagatare, mu Ntara y’Iburasirazuba.

Ubwo iyi gahunda yamurikirwaga abaturage yabanjirijwe n’igikorwa cyo gukora umuganda wo gutunganya urwuri rw’umuturage.

Uwo muturage yeretswe uko urwuri ruzima rukwiye kuba rumeze.

Impamvu yatumye RGB ihuza iki gikorwa no gutunganya inzuri, ni uko ubushakashatsi bwerekana uko abaturage banyurwa na serivisi bahabwa, bugaragaza ko mu Ntara y’Iburasirazuba abaturage benshi batanyurwa n’imitangire ya serivisi mu buhinzi n’ubworozi.

Mbabazi Joy ni umuturage wahawe umuganda, yagize ati: “Ndashimira buri wese wampaye umuganda, ni ikimenyetso k’imiyoborere myiza, ni umuco mwiza twese dukwiye gukurikiza”.

Umuyobozi w’agateganyo wa RGB, Dr. Usta Kayitesi, yagize ati: “U Rwanda rwahisemo imiyoborere ishingiye ku muturage, imiyoborere twifuza ni imiyoborere ishyira umuturage ku isonga mu bikorwa by’iterambere, akaba ku isonga abigiramo uruhare abikora, no kurinda ibyo twagezeho. Ibyo tumaze kugeraho ni abaturage bakoresheje imbaraga zabo, bakazura u Rwanda, bakaruha izina bayobowe na Perezida wa Repubulika, umuturage ari ku isonga rero nta wasenya ibyo twagezeho, ibikorwa byiza tumaze kugeraho biroroshye gukomeza kubiteza imbere tutarangaye, uwashaka kubisenya ntabwo twamwemerera”.

Uyu muhango wari witabiriwe na Minisitiri w’Urubyiruko Mbabazi Rosemary, yashimye iyi gahunda y’imiyoborere. Yagize ati: “Imiyoborere myiza ni inkingi ihetse izindi zose mu guteza imbere igihugu cyacu n’umuturage, igihugu cyacu kigomba kurangwa na serivisi nziza, kigomba kurangwa n’ahatari akarengane, tugomba no kurangwa no kwegera abaturage bagahabwa ijambo mu bibakorerwa, tumaze kubibona; Nyakubahwa Perezida wa Repubulika amaze guhabwa ibihembo byinshi cyane bijyanye n’imiyoborere myiza”.

Minisitiri w’Urubyiruko Mbabazi Rosemary atangiza igikorwa cyo gutunganya urwuri, ari kumwe na Guverineri w’Intara y’Iburasirazuba Mufulukye Fred, n’abandi bayobozi batandukanye hamwe n’abaturage ( Foto Hakizimana Y.)

Yakomeje avuga ko iyi gahunda yatangijwe y’Imiyoborere ije kuganira izindi gahunda zari zisanzwe ziriho mu kwimakaza imiyoborere myiza ariko ngo iyi yo ikazaba ifite umwihariko wo kurushaho guha abaturage umwanya n’ijambo mu bibakorerwa, abayobozi bakajya bakemura ibibazo by’abaturage babasanze aho batuye, bitabaye ngombwa ko hategerezwa ko umuyobozi mukuru ajyayo abaturage bakamutura ibibazo.

TANGA IGITEKEREZO

Leave a Reply

Your email address will not be published. Required fields are marked *